DANIELI 12:1 - Biblia Ilagho Jiboie Kwa Wandu Wose

¹ “Ngelo iyo, Mikaeli uo malaika m'baa uwizighanagha wandu wako uchawuka. Ichakaia ni ngelo ya wasi jingi ghusewonekie kufuma mbari yazoya kukaia, hata iyo ngelo. Ela ngelo iyo, wandu wako awo marina ghawo ghiandikilo andenyi ya chuo cha Mlungu, wichakirwa.

DANIELI 12:1 ပူးပေါင်းရင်းမြစ်များ

ZABURI 56:8

Oho kwaichi kusumbuka kwapo; kwawikie mtalo ghwa mbori rapo. Nechi raandikilo chuonyi kwako?

ZABURI 69:28

Marina ghawo ndeghivuto andenyi ya chuo cha irangi, hata wisakengirwa andenyi ya mtalo ghwa wahachi.

ISAYA 4:3

Kula mundu uchaasigharika Sioni na Jerusalemu, uo usaghulo ni Mlungu ukaie moyo, uchawangwa mweli,

ISAYA 9:7

Kubonya nguma kwake kwa sere ndekuchaakaia na kutua kungi; Uchaseria kifumbi cha nguma cha ndee Daudi, ukighumangisha wuzuri ghwake kwa hachi na loli; kufuma idana hata kwa kala na kala. BWANA wa majeshi nuo uchaabonya agha.

JEREMIA 30:10

“Idana msakeobua ee kivalwa cha Jakobo mdumiki wapo, msakefwa waya ee wandu wa Israeli; angu nichamkira ahoeni isanga ja kula, na kivalwa chenyu chichafuma ijo isanga weredwaloghe wunyika. Mchawuya na kukaia mhorie nicha, na mndungi ndechamuobosha sena anduangi.

JEREMIA 30:7

Ai, e ituku ja mashiniko, jisefwanane na ituku jingi; ni ngelo ya wasi kwa kivalwa cha Jakobo, elaima ugho wasi ghuchamredia kukia.”

EZEKIELI 13:9

Nichawikaba walodi wiwonagha mawono gha tee, na kulaghua malagho gha tee; ndewichaakaia andenyi ya njama ra wandu wapo, hata ndewichaandikwa andenyi ya chuo cha wandu wa Israeli, angu kungia andenyi ya isanga ja Israeli; nenyo mchamanya kukaia Ini ne Bwana MLUNGU.

EZEKIELI 34:24

Na ini BWANA nichakaia Mlungu wawo, na mdumiki wapo Daudi uchakaia m'baa wawo; ini BWANA najighora ilagho ijo.

EZEKIELI 5:9

Na kwa wundu ghwa wuchafu ghwako ghose kubonyere, nichakubonya maza jingi niseribonyere, sena nisechaaribonya jingi.

DANIELI 10:13

M'baa wa wuzuri ghwa Pashia wanitangalie kwa matuku mirongo iwi na jimweri. Ela Mikaeli, umu wa waja weke malaika wabaa, ukacha kunitesia; kwa kukaia nedesighwa niekeri na uo m'baa wa wuzuri ghwa Pashia.

DANIELI 10:21

Ndekuwadie mndungi unitesiagha, ela Mikaeli uo malaika onyu. Idana nichakumanyisha agho ghiandikilo andenyi ya Chuo cha Loli.

DANIELI 11:45

Nao uchadunga hema rake ra kiwuzuri ghadi na ghadi ya bahari na ghuja mghondi ghughokie ghwa wueli andu Hekalu ikaiagha. Ela sena uchafwa usepatire mndungi omtesia.”

DANIELI 7:10

Kamoda ka modo kerefumieghe, na kuida imbiri kwake. Maelfu gha wandu werekoghe wikimdumikia, na mamilioni gha wandu, werekaighe kimusi imbiri kwake. Koti etanya ikawikwa, na vuo wikakuchulwa.

DANIELI 9:12

Oho kookatisha malagho ghako, agho koreghighorieghe aighu yedu na aighu ya awo widibonyere nguma, kwa kureda bugha aighu yedu. Kwa kukaia maza ribonyero Jerusalemu nderibonyero andu kungi ndoenyi kose.

JOELI 2:2

Ni ituku ja kira na wasi, ituku ja mawingu na kira kibaa. Izungu ja zighe jangia na kufinikira mighondi. Jareda kukamba kwa kira jingi chisewonekie, hata ndechichaawoneka huwu sena anduangi.

MALAKI 3:16

Niko awo wandu wimuobuagha BWANA wikadedanya, na BWANA ukawisikiria; ukasikira malagho werekoghe wikighora imbiri kwake. Chuo cha wukumbuso ghwa awo weremuobuagha BWANA na kumneka ishima chikaandikwa.

MATHAYO 24:21

Angu kuchakaia na wasi m'baa na ndighi, jingi ghusewonekie kufuma kuzolwa kwa wurumwengu hata idana; nagho ndeghuchaawoneka jingi sena anduangi.

MARKO 13:19

Angu matuku agho, kuchakaia na matiriro jingi ghisewonekie kufuma kuumbwa kwa wurumwengu, hata na jingi sena ndeghichaakaia anduangi.

LUKA 10:20

Elaima msakeboilwa kwa iri, wei pepo rawikilo aisi konyu, ela boilonyi angu marina ghenyu ghaandikilo mlungunyi.”

WAROMA 11:15

Ikakaia kuleghwa kwawo kuaghuredia wurumwengu kupatana na Mlungu, kurumirilwa kwawo-lee kuchakaia wada? Si irangi kwa awo wifue?

WAROMA 11:26

kwa huwu Waisraeli wose wichakia, sa iji iandikilo, “Mkiri uchacha kufuma Sioni nao uchaghuinja wuwiwi ghwa Jakobo

WAEFESO 1:21

ighu nandighi kuchumba kubonya nguma kose, na kudima, na ndighi, na wuzuri, na aighu ya kula irina jiwangilo; si kwa ngelo ihi cheni anduangi, ela hata na iyo ichagha wori.

WAFILIPI 4:3

Nani nakulomba oho wori mngara wa kazi wa loli, kuwitesie awo waka; angu wabonyere kazi mbaa andwamweri nani edumikia ijo Ilagho Jiboie, dikwanye na Klementi na wangara wapo wa kazi wazima; awo marina ghawo ghiko andenyi ya chuo cha irangi.

JUDA 1:9

Ela uo malaika m'baa Mikaeli, iji orekoghe ukisimana na Ibilisi, kwa kubonya nganyi aighu ya mumbi ghwa Musa, nderedimieghe kumtanya kwa madedo ghangi gha kudukana anduangi; ela ukaghamba, “Bwana ndekukemie.”

WUFUNUO 1:5

na kufuma kwa Jesu Kristo uo mshahidi mloli, mvalwa wa imbiri wa awo wifue, na uo uwibonyeragha nguma wazuri wa ndoenyi. Kwake uo udikunde, ukadifungua kwa bagha yake difume kaung'enyi redu,

WUFUNUO 12:7

Niko wuda ghukabuka mlungunyi, Mikaeli na weke malaika wake wikilwa na iyo choka, na iyo choka ikalwa chiaimweri na weke malaika wake;

WUFUNUO 13:8

Na wandu wose wikaiagha ndoenyi wichaitasa; awo, imbiri wurumwengu ghuseumbilo, marina ghawo ghisereandikiloghe andenyi ya chuo cha irangi cha Mwana wa Ng'ondi uo orebwaghiloghe.

WUFUNUO 17:14

Nawo wichalwa na uo Mwana wa Ng'ondi chiaimweri na awo wikwanye, werewangiloghe wikasaghulwa, nawo ni waloli; na uo Mwana wa Ng'ondi uchawisima, angu uo ni Bwana wa weke bwana na Mzuri wa wazuri.”

WUFUNUO 20:12

Nani nerewiwonieghe wafu wabaa na watini, wiko kimusi imbiri ya icho kifumbi cha nguma; na vuo vikakuchulwa. Na chuo chimu chikakuchulwa, nacho ni icho chuo cha irangi. Na awo wafu weretanyiroghe kunughana na maza wereribonyereghe, iro rereandikiloghe andenyi ya ivo vuo.

WUFUNUO 20:15

na ikakaia mndungi userewonekieghe uandikilo irina jake andenyi ya icho chuo cha irangi, orekumbiloghe andenyi ya iyo ndiwa ya modo.

WUFUNUO 3:5

Uo usimagha, ucharushwa nguwo ra chokwa woruwo, nani sichaajivuta irina jake andenyi ya icho chuo cha irangi anduangi; ela nichajirumiria imbiri ya Aba na imbiri ya weke malaika wake.

WUFUNUO 7:14

Nani ngamzera, “Bwana oho kwamanya.” Nao ukanizera, “Awa niwo waja wandu wifumie matirironyi mabaa, nawo warioghoshere nguwo rawo, na kuribonya kukaia ra chokwa kwa bagha ya Mwana wa Ng'ondi.