Даниял 4:30 - Гирами Китаб

³⁰ Ва гьадмусяаьт Навухаднасариин гьаму вари улубкьнийи. Дидхъанмина сарун думу инсанарин арайиъ имдайи, ва, малиси, дугъу укӀ ипӀуйи, завун чигру думу кьяши апӀуйи; дугъʼин, люкьран зирквсиб, куш илибшнийи ва шибарра – ничхрин бацарстар.

Даниял 4:30 ပူးပေါင်းရင်းမြစ်များ

Эвел 10:10

Сифте думу Вавилон, Эрех ва Аккад шагьрарин паччагь вуди гъахьну. Дурар вари Шинар уьлкейиъ айи.

Эстер 1:4

хъа дугъу дурариз паччагьлугъдин девлет, хазна, чан гюрчегʼвал ва заанвалин нурлувал улупнийи. Гьамци варжна миржцӀур йигъан давам гъабхьнийи.

Насигьятар 11:2

Фурс кайирикна гъибди аьйиб, хъа фурс ктрурихьна гъибди аькьюл.

Насигьятар 16:18

Фурслували чӀуруб хуру, хъа заанди улупували ахъуз гъитру.

Насигьятар 29:23

Заанди улупрур апӀиди асккан, хъа фурс ктрури гъазанмиш апӀиди ад.

Даниял 4:31

Гьамци вахтар гъушу; узу, Навухаднасари, кӀул за дапӀну, завузди гъилигза – ва фагьум-фикрихъна гъафизу. Узу ВаритӀанзаануриз шюкюр гъапӀза, Даима Гъузруриз аферин гъапиза ва Дугъан адар гъапӀза: Гьюкум Дугъан вуда гьюкум даима, вари вахтариз – Дугъан паччагьлугъра.

Лука 14:11

Фицики, шли чав учв за апӀури гъашиш, гьадму асккан хьиди, хъа учв аскканди дисрур заан хьиди.

Лука 14:9

хъа увузна дугъаз теклиф гъапӀури, увухьна дуфну: «Мушв гьадгъан йишв ву», кӀуруси дарибшри, даршиш думуган, начра дубхьну, харжи йишвʼин деуз мажбур хьидива.

Коринф-1 10:31

Гьаддиз, учву ипӀурашра, убхъурашра, фу апӀури гъашишра, вари – Аллагьдин ад бадали апӀинай.

Петрин-1 5:5

Учвура, жигьилар, аьхюдарихъ хъпехъури апӀинай; чиб-чпин гъайгъушнаъ духьну, разивалиъ кӀул ипай, гьаз гъапиш, «Аллагь фурсачйириз къаршу удучӀвуру, хъа разивал улупрудариз Думу рягьим апӀрур ву».

Ачмиш 14:8

Сарсана, кьюрпи малайикра, сарпирин кьяляхъди тӀирхури, гъафи ва гьарай гъапӀу: «Ккадабхъну, ккадабхъну, ккадабхъну Вавилон, машгьур меркез, чан кьяппавалин чяхрихьди вари халкьар тухъ гъапӀу шагьур!»

Ачмиш 16:19

Машгьур вуйи шагьур шубуб йишваз гъутӀубкӀнийи, Аллагь гьясбикк ккадрурарин шагьрар ккадахьнийи. Машгьур вуйи Вавилон кӀуру меркез Аллагьди кӀваин гъапӀнийи ва дидиз Дугъу Чан пис хъял айи чяхрин зах тувнийи.

Ачмиш 17:5

Дугъан унтӀʼин жини сир айи гьамциб ччвур дибикӀнайи: «Вавилон – машгьур меркез, дюнʼяйин аьйибнанна кьяппаваларин дада».

Ачмиш 18:10

Дугъан аьзабариз гъирагъдихъ дийигъну лигури ва гукӀнишну гъадагъну, дюнʼяйин паччгьари пиди: «Язухъ вуда, язухъ вуда яв, эй Вавилон, машгьур вуйи меркез, кьудратлу вуйи меркез. Саб гагьди увʼина яв кьазйир гъафида!»

Ачмиш 18:21

Хъасин кьудратлу малайикди, рягънин ахалсиб зурба гъван гъадабгъну, гьюлизди гатӀабхьну, кӀуру: «Гьамциб кьувватниинди илдипну Вавилон, машгьур меркез! Думу сарун арайиз гъибдар!