Ingoma Yetingoma 5:2 - Siswati 1996 Bible

² Ngalala, kodvwa inhlitiyo yami ayizange seyibutsi cutfu butfongo. Lalela! Longitsandzako uyanconcotsa, utsi: “Ngivulele, dzadzewetfu, sitsandvwa sami, tuba lami, wena longenasici wami. Inhloko yami seyinetfwe ngematolo, tinwele tami tinemswakama wasebusuku.”

Ingoma Yetingoma 5:2 ပူးပေါင်းရင်းမြစ်များ

Genesisi 29:20

Ngako-ke Jakobe wamsebentela iminyaka lesikhombisa loRakheli, noko kuJakobe leminyaka lengaka kwaba shangatsi ngemalangana nje, ngobe phela abemtsandza kakhulu.

Tihlabelelo 119:1

Babusisiwe labo labatindlela tabo timsulwa, labo labahamba ngemitsetfo yaNkulunkulu.

Tihlabelelo 81:10

Ngimi Simakadze longuNkulunkulu wenu, lowanikhuphula eveni laseGibhithe. Khamisisani imilomo yenu, mine-ke ngitanifunta nginesutsise.

Taga 23:26

Ndvodzana yami, ngilalele utigcine ngekunakekela tindlela tami.

Ingoma Yetingoma 1:16

Maye, umuhle, sitsandvwa sami bo! Awu, maye, kona uyakhanga! Yebo, nembhedze wetfu utsite klaba!

Ingoma Yetingoma 2:10

Longitsandzako wakhuluma kimi, watsi: “Sukuma, sitsandvwa sami, lotsandzekako wami, wota sambe.

Ingoma Yetingoma 2:14

Tuba lami lelisemifantfwini yemadvwala, etindzaweni tekubhaca emaceleni etintsaba, ngikhombise buso bakho, ungivise neliphimbo lakho; ngobe liphimbo lakho liyanongotela, nebuso bakho buyatsandzeka.

Ingoma Yetingoma 2:8

Lalela, nasi sitsandvwa sami! Bukela, nanguya eta angcabisha engca etintsabeni, agiya etikwemagcuma.

Ingoma Yetingoma 3:1

Onkhe emalanga ebusuku, nangilele embhedzeni wami, bengimfuna lowo lotsandvwa yinhlitiyo yami; ngamfuna, kodvwa angizange ngimtfole.

Ingoma Yetingoma 4:7

Umuhle wonkhe, sitsandvwa sami; kute nalesincane sici kuwe.

Ingoma Yetingoma 4:9

Uyitfumbile inhlitiyo yami, dzadzewetfu, makoti wami. Uyitfumbile inhlitiyo yami ngekungikha kanye nje ngemehlo akho, ngelucu lunye nje lwengcibe yentsamo yakho.

Ingoma Yetingoma 5:11

Inhloko yakhe iyigolide lecengiwe cobo; tinwele takhe tiyakhephuka njengemagagasi, kantsi timnyama njengelihhwabayi.

Ingoma Yetingoma 5:6

Ngamvulela longitsandzako wami, kodvwa longitsandzako wami abesahambile, angasekho. Inhlitiyo yami yayiphumele kuye ngesikhatsi akhuluma. Ngamfuna, kodvwa angizange ngimtfole. Ngambita, kodvwa akazange asabele.

Ingoma Yetingoma 6:9

kodvwa lituba lami, lowakheke kahle wami, yena wehluke yedvwa ngebuhle, uyindvodzakati leyodvwa kunina, ligcabi lalowo lowalitala. Tintfombi tatsi natimbona, tambita tatsi ungulobusisiwe; emakhosikati nemaphovela amdvumisa.

Ingoma Yetingoma 7:9

nemlomo wakho ube njengeliwayini lelendlula tonkhe tinhlobo. Shangatsi liwayini lingacondza ngco kulongitsandzako wami, lishelele kamnandzi etindzebeni takhe temlomo nasematinyweni akhe.

Ingoma Yetingoma 8:7

Emanti lamanyenti ngeke alucime lutsandvo, nemifula ingeke ilukhukhule. Nome ngabe umuntfu abenganikela ngawo wonkhe umcebo wasekhaya lakhe kuze atewutsenga lutsandvo, loko bekuyawuba yinhlekisa yodvwa nje.

Isaya 50:6

Nganikela ngemhlane wami kulabo labebangishaya, ngabanika tihlatsi labo lababengidvonsa ngesilevu. Angizange ngibufihle buso bami ekuphukutweni nasekukhafulelweni ngematse.

Isaya 52:14

Njengobe bebabanyenti babeyesaba, kubonakala kwayo kwakuhliphikile kwendlula bonkhe bantfu, nesimo sayo sasonakele kunesabo bonkhe bantfu.

Danyela 8:18

Watsi asakhuluma nami, ngabe sengikulobukhulu butfongo, buso bami bubheke phansi. Wase uyangitsintsa ngesandla, wangisukumisa, ngema ngetinyawo tami.

Zakhariya 4:1

Lengilosi leyayikhulume nami yabuya, yangivusa, njengemuntfu nakavuswa ebutfongweni.

Matewu 7:8

Ngobe wonkhe locelako uyakuphiwa, nalofunako uyatfola, nalonconcotsako uyavulelwa.

Matewu 8:17

kuze kugcwaliseke loko lokwakhulunywa ngumphrofethi Isaya nakatsi: “Wasetfwalela butsakatsaka betfu, watisusa kitsi tifo tetfu.”

Makho 1:35

Ekuseni kusemnyama kakhulu Jesu wavuka wahamba, waphumela ngephandle kwelidolobha waya ehlane, lapho afike wathandaza khona.

Lukha 22:44

Inhlitiyo yakhe yayilusizi; wathandaza ngekuciniseka lokukhulu, titfukutfuku takhe taze taba njengematfonsi engati, atfontsela phansi.

Lukha 6:12

Ngaleso sikhatsi Jesu wenyukela egcumeni ayewuthandaza, wacitsa busuku bonkhe khona lapho athandaza kuNkulunkulu.

Lukha 9:32

Phetro nebangani bakhe babephetfwe butfongo lobukhulu, kodvwa babebhekile bayibona inkhatimulo yaJesu kanye nalamadvodza.

Johane 10:4

Nasaphume nato tonkhe utihola embili, tona timlandzele ngemuva, ngobe tiyalati livi lakhe.

KubaseGalathiya 2:20

ngako-ke mine angisaphili, kodvwa nguKhristu lophila kimi. Nalemphilo lengiyiphilako kulomtimba, ngiyiphila ngekukholwa yiNdvodzana yaNkulunkulu leyangitsandza yatinikela yona matfupha esikhundleni sami.

Kubase-Efesu 5:14

ngobe konkhe lokuvetwa kukhanya kuyabonakala. Ngako-ke kutsiwa: “Phaphama, wena lolele, uvuke kulabafile, naKhristu utakukhanyisa.”

Sembulo 14:4

Laba bangemadvodza langazange asatingcolise ngalabasikati, bamsulwa. Ngibo laba labalandzela liWundlu nome kukuphi lapho liya khona. Kubo bonkhe bantfu ngibo labahlengiwe, balulibo lwaNkulunkulu nelweliWundlu.

Sembulo 3:20

Lalela la, ngime emnyango ngiyanconcotsa; nangabe umuntfu eva livi lami, avule umnyango, mine ngiyawungena kuye, ngidle naye, naye adle nami.

Sembulo 3:4

Noko usenabo bantfu labambalwa lapho eSadesi labangakatingcolisi tingubo tabo, bayawuhamba nami bagcoke letimhlophe, ngobe vele bakufanele.