Genesisi 15:14 - Siswati 1996 Bible

¹⁴ Kodvwa ngiyawusehlulela leso sive lesiyawube sigcilata lesitukulwane sakho; emvakwaloko lesitukulwane sakho siyawuphuma sesinetimphahla letinyenti.

Genesisi 15:14 ပူးပေါင်းရင်းမြစ်များ

1 Samuweli 12:8

“Watsi kube Jakobe efike eGibhithe, boyihlomkhulu bakhala kuSimakadze bacela lusito; Simakadze watfumela boMosi na-Aroni labangubona bakhuphula boyihlomkhulu, babakhipha eGibhithe, babahola, babaletsa kulendzawo.

Tihlabelelo 135:14

Simakadze uyawubavikela bantfu bakhe, ahawukele tinceku takhe.

Joshuwa 24:17

Ngobe nguSimakadze Nkulunkulu wetfu lowasikhipha, tsine nabokhokho betfu, eveni laseGibhithe, endlini yebugcili. Nguye lowenta leto tibonakaliso letinkhulu emehlweni etfu sibuka. Wasilondvolota kuyo yonkhe indlela yetfu nakuto tonkhe tive lesasihamba sidzabula emkhatsini wato.

Dutheronomi 6:22

Satibonela tsine ngewetfu emehlo Simakadze enta tibonakaliso netimanga letesabekako naletinkhulu eGibhithe kuFaro nasemndenini wakhe wonkhe.

Dutheronomi 4:20

Kodvwa nine, Simakadze wanikhipha eGibhithe, emlilweni lomkhulu loncibilikisa insimbi, kutsi nitekuba sive lesilifa lakhe, njengobe senaba ngilo nje.

Tihlabelelo 135:9

Watfumela tibonakaliso netimangaliso, emkhatsini wakho, wena Gibhithe, wamelana naFaro kanye netinceku takhe tonkhe.

Tihlabelelo 51:4

Ngonile kuwe, wena wedvwa, ngente lokunengekako emehlweni akho; ngako kwehlulela kwakho kumsulwa, nekungilahla kwakho ngelicala kulungile.

Eksodusi 3:10

Kota ngitekutfumela kuFaro, kutsi uyewukhulula bantfu bami, emadvodzana a-Israyeli, ubakhiphe eveni laseGibhithe.”

Tihlabelelo 105:42

Ngobe wakhumbula livi lakhe lelingcwele, lalikhuluma ku-Abrahama, inceku yakhe.

Genesisi 48:21

Israyeli wakhuluma kuJosefa watsi: “Manje sengitawufa, kodvwa Nkulunkulu utawuba nani, aphindze anibuyisele eveni labokhokho benu.

Genesisi 50:24

Josefa wakhuluma kubomnakabo, watsi: “Sengitakufa; kodvwa ngiyati kutsi Nkulunkulu utawuba nani anikhiphe kulelive, anibuyisele eveni labetsembisa lona bo-Abrahama, na-Isaka, naJakobe.”

Eksodusi 12:29

Ekhatsi nebusuku Simakadze wabulala onkhe ematubulo eveni laseGibhithe: kusukela esigodlweni etubulweni laFaro lelaliyindlalifa yakhe, kuye etubulweni lesiboshwa lesisejele, nasematubulweni etifuyo.

Imisebenti yebaPhostoli 7:7

Kodvwa ngiyakusehlulela leso sive lesiyawube sibagcilata, emvakwaloko bayawusuka baphume kulelo live bete batengikhonta kulendzawo.’