2 Tikhronike 34:4 - Siswati 1996 Bible

⁴ Ngekuyala kwakhe emalati aboBhali abhidlitwa, wagawula nalamalati ekutfuncisela timphepho labesetikwawo, wawajuba aba ticucu, wabhidlita naletinsika ta-Ashera, netithico, netitfombe. Loko wakubhidlita kwaba timvutfu, wakusakatela emadlizeni alabo labebahlabela kuwo imihlatjelo.

2 Tikhronike 34:4 ပူးပေါင်းရင်းမြစ်များ

1 Emakhosi 13:2

Lomuntfu wakhala asola lilati ngekuyalwa nguSimakadze, watsi: “Maye, lilati! Lilati! Naku lokukhulunywa nguSimakadze: ‘Indvodzana letakutsiwa nguJosaya libito layo, itawutalwa emndenini waDavide. Etikwakho utakwenta umhlatjelo ngebaphristi labakhonta bonkulunkulu etindzaweni letiphakeme, bona laba labenta umnikelo lapha etikwakho, ematsambo ebantfu atawushiselwa lapha etikwakho.’ ”

2 Tikhronike 14:5

Wesusa tindzawo letiphakeme nemalati emphepho kuwo onkhe emadolobha akaJuda, nembuso waba nekuthula ngesikhatsi kusabusa yena.

2 Tikhronike 30:14

Besusa emalati eJerusalema, besusa emalati emphepho bawajikijela eSigodzini saseKhidroni.

2 Tikhronike 31:1

Kwatsi kube kuphele konkhe loko, ema-Israyeli labekhona lapho aphumela kuwo onkhe emadolobha akaJuda, abhidlita ematje lekwakutsiwa angcwele, agawula naletinsika ta-Ashera, atilahla phansi. Abhubhisa naletindzawo letiphakeme tekukhontela tithico kanye nemalati kulo lonkhe lakaJuda nelakaBhenjamini, nelaka-Efrayimu kanye nelakaManase. Kwatsi nase bakubhubhise konkhe loko baka-Israyeli, base babuyela bonkhe emadolobheni abo nasemafeni abo.

2 Tikhronike 33:22

Wenta lokubi emehlweni aSimakadze, walingisa uyise Manase. Amoni wakhonta, wenta imihlatjelo kuto tonkhe tithico letatibatwe nguyise Manase.

2 Tikhronike 33:3

Wavusa kabusha tindzawo letiphakeme tekukhontela tithico, letatibhidlitwe nguyise Hezekiya, waphindze wakha emalati aBhali, wamisa netinsika ta-Ashera. Wakhotsama wakhonta tonkhe tinkhanyeti tesibhakabhaka.

2 Tikhronike 34:33

Josaya wesusa tonkhe tithico letisinengiso kulo lonkhe lelalihlala ema-Israyeli. Wenta kutsi bonkhe bantfu labakhile kulaka-Israyeli bakhonte Simakadze Nkulunkulu wabo. Ngaso sonkhe sikhatsi sekuphila kwakhe, sive asizange sisuke ekulandzeleni Simakadze, Nkulunkulu waboyisemkhulu.

2 Tikhronike 34:7

wabhidlita lamalati netinsika ta-Ashera, letithico watisila taba yimphuphu, wajuba emalati emphepho, kwaba tincetu kulo lonkhe laka-Israyeli. Wesuka lapho wabuyela eJerusalema.

Tihlabelelo 18:42

Ngabagaya baba njengelutfuli lolupheshulwa ngumoya, ngabasaphata njengeludzaka lwendlela.

Eksodusi 23:24

Ningabakhotsameli bonkulunkulu babo, ningabakhonti, ningayenti nemikhuba yabo yekukhonta. Bonkulunkulu babo nibobabhidlita kanye netinsika tabo tematje.

Eksodusi 32:20

Watsatsa lelitfole lelase lakhiwe, walishisa ngemlilo, waligaya, lacolisakala laba yimphuphu, walibhuca ngemanti, watsi onkhe ema-Israyeli akalinatse.

Eksodusi 34:13

Emalati abo nibowabhidlita, nephule tinsika tawo tematje, nibhidlite konkhe kwalo-Ashera longunkulunkulukati wabo.

Isaya 27:9

Ngaloku-ke licala lakaJakobe liyawube selihlawulelwe, loku kuyawuba sitselo lesiphelele sekwesulwa kwesono sakhe: Ngesikhatsi enta onkhe emalati ematje, kutsi abe njengematje emcakaco, aphushuke abe timvutfu, kute nayinye insika ya-Ashera nome lilati lemphepho leliyawusala limile.

Levithikusi 26:30

Ngiyawubhidlita tindzawo tenu tekukhontela, ngidzilite nemalati enu etimphepho, tidvumbu tenu ngitibutsisele ndzawonye etikwetithico tenu letite imphilo naletiwile; umphefumulo wami uyawunicansukela.

Mikha 1:5

Konkhe loku kuyakwenteka, ngobe Israyeli onile wahlubuka kuNkulunkulu. Empeleni nje ngubani lekufanele asoleke ngenca yekuhlubuka kwa-Israyeli? Vele, yiSamariya. Ngubani lonelicala lekukhonta tithico kaJuda? Vele, yiJerusalema matfupha.

Dutheronomi 7:25

Tithico tato niyakutishisa ngemlilo. Ningacali nihawukele isiliva negolide lekuto, ningatitsatseli loko, ngobe nitawubanjwa lugibe lwato, ngobe loko kusinengiso kuSimakadze Nkulunkulu wenu.

Dutheronomi 7:5

Naku-ke lenitakwenta kuto: Bhidlitani emalati ato, nephule netinsikamatje tato lekutsiwa tingcwele, nijube tinsika tato tabo-Ashera losithicokati sabo, nishise netithico tato ngemlilo.

Dutheronomi 9:21

Ngaphindza ngatsatsa leyontfo yenu lesono, litfole lenase nilentile, ngalishisa emlilweni. Ngaligaya laba yimphuphu lecolisakele njengelutfuli, ngatsela lolutfuli kulomfula lowawugeleta, wehla kulentsaba.