2 Tikhronike 31:14 - Siswati 1996 Bible

¹⁴ Khore, umsa waJimna, umLevi, umgadzi weLisango langaseMphumalanga, yena abengamele leminikelo yesihle leyayiletfwa kuNkulunkulu, nguye bekaba iminikelo leletfwa kuSimakadze kanye netipho letingcwele.

2 Tikhronike 31:14 ပူးပေါင်းရင်းမြစ်များ

Genesisi 46:17

Emadvodzana a-Asheri bekuboJimna, naJishuwa, naJishvi, naBheriya, naSera labengudzadzewabo. Emadvodzana aBheriya bekuboHebere naMalkhiyeli.

1 Tikhronike 26:12

Labomahlalesangweni behlukaniswa baba ticheme ngeticheme, ngebaholi bemindeni yabo, base babelwa imisebenti letsite ekukhonteni Simakadze ethempelini, njengobe bekwenta lamanye emaLevi.

1 Tikhronike 26:14

Inkatho yelisango langasemphumalanga yadla Shelemiya. Kwentiwa inkatho yaZakhariya, umsa wakhe, umeluleki labenekuhlakanipha, yadla yena kutsi agadze lisango langasenyakatho.

1 Tikhronike 26:17

BekunemaLevi lasitfupha ngelilanga ngasemphumalanga, lamane ngelilanga angasenyakatfo, lamane ngelilanga angaseningizimu, bese kutsi lamabili ngasikhatsi sinye agadze ingungumakamelo.

2 Tikhronike 31:13

BoJehiyeli, na-Azaziya, naNahathi, na-Asaheli, naJerimothi, naJozabadi, na-Eliyeli, naJismakhiya, naMahathi, naBhenaya babebaphatsi betindvuna bona baphetfwe boKhonaniya naShimeyi, umnakabo, njengekubekwa kwabo yinkhosi Hezekiya, na-Azariya, indvuna leyayengamele lithempeli laNkulunkulu.

2 Tikhronike 31:15

Abesitwa bo-Edeni, naMiniyamini, naJeshuwa, naShemaya, na-Amariya kanye naShekhaniya, bamelekelela ngekwetsembeka kulamadolobha ebaphristi, babela laba labanye baphristi ngekweticheme tabo, labadzala nalabancane ngalokufananako.

Ezra 1:4

Nakukhona umuntfu loyinsali yebatfunjwa lodzinga lusito ngekubuyela emuva, makhelwane wakhe akamsite. Kufanele labo bantfu basitwe ngesiliva, nangegolide, nangetimphahla, nangetifuyo kanye nangeminikelo yesihle yelithempeli laNkulunkulu waseJerusalema.’ ”

Ezra 3:5

Emvakwaloko, base banikela ngeminikelo leshiswa samuku, lenikelwa njalo, nemihlatjelo yekwetfwasa kwenyanga kanye nayo yonkhe imihlatjelo leyayimiselwe kutsi yentiwe kuyo yonkhe imikhosi yaSimakadze, kanye naleyo leletselwa kutsi ibe ngimihlatjelo yesihle kuSimakadze.

Ezra 7:16

uhambe nesiliva negolide yonkhe longayitfola eveni laseBhabhulona kanye neminikelo yesihle yebantfu nebaphristi labayinikelela lithempeli laNkulunkulu wabo eJerusalema.

Nehemiya 13:13

Ngabeka umphristi Shelemiya, naSadoki, ingcweti yetemtsetfo, nalomunye umLevi lekwakutsiwa nguPhedaya kutsi bengamele letingungumakamelo, ngabeka naHanana, umsa waZakhuri, umsa waMathaniya, waba ngumsiti wabo, ngobe lamadvodza abetsatfwa ngekutsi etsembekile. Babenikwe kutsi banakekele kwabelwa kwalabanakabo tintfo.

Tihlabelelo 119:108

Simakadze, yemukela iminikelo yami yekukudvumisa, ungifundzise imitsetfo yakho.

Levithikusi 2:10

Incenye yawo lesele iyawuba sabelo sa-Aroni nemadvodzana akhe; ingcwele kakhulu ngobe itsetfwe emnikelweni lowentiwa ngemlilo kuSimakadze.

Levithikusi 22:18

“Tjela Aroni nemadvodzana akhe kanye nesive sonkhe sema-Israyeli, utsi: ‘Nome ngangubani wesive sema-Israyeli nome wetive losemkhatsini wenu nakaletsa umnikelo wekushiswa kuSimakadze wekufeza setsembiso nome umnikelo wesihle,

Levithikusi 23:38

Ngaphandle kweliSabatha laSimakadze nangaphandle kwetipho tenu kanye naleminye nje iminikelo lenitentela yona ngetetsembiso neminikelo yenu yesihle leniyinikela kuSimakadze.

Levithikusi 27:28

“ ‘Kodvwa kufanele kubete umuntfu lotawutsengisa nome lotawuhlenga loko lesekunikelwe kuSimakadze, nome kungumuntfu, nome kusilwane, nome kungumhlaba lolifa lakhe. Konkhe loko sekuyawuhlala kukwaSimakadze kungcwelengcwele.

Numeri 29:39

“ ‘Ngetulu kweminikelo yenu yesetsembiso neyesihle, niyakwentela Simakadze ngetikhatsi temikhosi yenu leminikelo lelandzelako: iminikelo yenu yekushiswa, neminikelo yenu yalokutinhlavu, neminikelo yenu yesinatfo kanye neminikelo yenu yekuthula.’ ”

Dutheronomi 12:17

Aniyikudlela emadolobheni enu kwelishumi kwenu kwalokutinhlavu, nome kweliwayini lelisha, nome kwemafutsa, nome kwematubulo emihlambi yenu yetinkhomo, neyetimbuti, neyetimvu, nome ngabe seyini-ke lenetsembisele kwephana ngayo, neminikelo yenu yesihle, netipho tenu letimcoka.

Dutheronomi 12:6

nimikise iminikelo yenu yekushiswa nemihlatjelo, nekwelishumi kwenu, netipho tenu leto lenincume ngato kutsi nitatiletsa, neminikelo yenu yesihle kanye nematubulo enu etinkhomo netimvu.

Dutheronomi 16:10

Niyakube senigubha uMkhosi Wemaviki, lekunguMkhosi Wekuvuna Kolo, kuSimakadze Nkulunkulu wenu ngekuletsa iminikelo yesihle ngangekwesibusiso Simakadze Nkulunkulu lanibusise ngaso.