1 Emakhosi 20:28 - Siswati 1996 Bible

²⁸ Lomuntfu waNkulunkulu wefika wakhuluma enkhosini yaka-Israyeli, watsi: “Naku-ke lokushiwo nguSimakadze, utsi: ‘Njengobe emaSiriya acabanga kutsi Simakadze ungunkulunkulu wemagcuma, akasiye nkulunkulu wematsafa, yonkhe lemphi yawo ngitayinikela etandleni tenu, kuze nati kutsi mine nginguSimakadze.’ ”

1 Emakhosi 20:28 ပူးပေါင်းရင်းမြစ်များ

2 Samuweli 10:13

Jowabe nelibutfo lakakhe bashuca bahlasela emaSiriya. EmaSiriya ehlulwa, abaleka.

1 Emakhosi 13:1

Ngelivi laSimakadze kwefika umuntfu waNkulunkulu eBetheli aphuma kaJuda, Jerobowamu aseme eceleni kwelilati kutekwenta umhlatjelo.

1 Emakhosi 17:18

Lomfelokati wakhuluma ku-Elija, watsi: “Ngoneni kuwe, muntfu waNkulunkulu? Kantsi lapha kami utele kutangikhumbuta sono sami, ubulale nendvodzana yami.”

1 Emakhosi 18:36

Kwase kutsi ngesikhatsi semhlatjelo wakusihlwa Elija wasondzela ngaselatini wathandaza watsi: “Awu, Simakadze, Nkulunkulu wa-Abrahama, na-Isaka, na-Israyeli, akwatiwe lamuhla lapha kutsi wena unguNkulunkulu wema-Israyeli nekutsi mine ngiyinceku yakho, nekutsi tonkhe letintfo ngitente ngekuyalwa nguwe.

1 Emakhosi 18:37

Ngiphendvule, Simakadze, ngiphendvule, kuze kutsi labantfu batekwati kutsi wena, Simakadze, unguNkulunkulu nekutsi tinhlitiyo tabo uyatigucula.”

1 Emakhosi 20:13

Ngasona leso sikhatsi kwefika umphrofethi enkhosini Ahabi, watsi: “Simakadze utsi: ‘Uyayibona yini lemphi lenkhulu kangaka? Ngitayinikela esandleni sakho, kuze wati kutsi mine nginguSimakadze.’ ”

1 Emakhosi 20:29

Kwaphela emalanga lasikhombisa emabutfo akambe abhekene, kwatsi ngelilanga lesikhombisa kwahlaselwana. Ema-Israyeli abulala emadvodza lahamba ngetinyawo labeti-100 000 emaSiriya ngalanga linye.

2 Tikhronike 32:19

Bakhuluma kabi ngaNkulunkulu waseJerusalema, balingisa ngesikhatsi bakhuluma ngalabonkulunkulu baletinye tive temhlaba, labangumsebenti wetandla temuntfu.

Tihlabelelo 46:11

Nkulunkulu Somandla unatsi, Nkulunkulu waJakobe usiphephelo setfu. Cabanga.

Tihlabelelo 79:10

Betive basholani kutsi: “Uphi-ke loNkulunkulu wabo?” Shangatsi kuphindzisela kwakho singakubona kwenteka kulabo labacitse ingati yetinceku takho.

Eksodusi 16:12

“Ngikuvile kukhonona kwebantfu baka-Israyeli. Batjele utsi: ‘Kusihlwa nitawudla inyama, ekuseni nibe nenala yesinkhwa. Nitawukwati-ke kutsi mine nginguSimakadze longuNkulunkulu wenu.’ ”

Eksodusi 6:7

Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe.

Eksodusi 7:5

EmaGibhithe ngulapho ayawungati khona kutsi nginguSimakadze, nase ngelule sandla sami ngikhulula ema-Israyeli emkhatsini wawo.”

Eksodusi 8:22

Kodvwa live laseGosheni, lapho kuhlala khona sive sami, ngitaliphephisa; bangeke bahlaselwe tibawu, khona utekwati kutsi mine, Simakadze, ngikhona kulelive.

Isaya 36:20

Ngumuphi kubo bonkhe labonkulunkulu balamave lowake wakhona kusindzisa live lakhe esandleni sami? Simakadze-ke yena angayisindzisa kanjani iJerusalema esandleni sami?”

Jeremiya 14:7

Nome tono tetfu tisilahla ngelicala, awu Simakadze, mane wente lutfo ngenca yeLibito lakho. Ngobe kuhlubuka kwetfu kukhulu, sonile kuwe.

Hezekeli 11:12

Ngulapho-ke niyawungati khona kutsi mine nginguSimakadze, ngobe anikatilandzeli timiso tami, nemitsetfo yami anikayigcini, kodvwa nisuke nalingisa letive letinitungeletile.”

Hezekeli 12:16

Kodvwa ngiyawubaphephisa labambalwa babo enkembeni, nasendlaleni kanye nasesifweni lesibulalanako, kuze kutsi kuleto tive lapho baya khona bativume tonkhe tento tabo letimbi letisinengiso. Ngulapho-ke bayawungati khona kutsi mine nginguSimakadze.”

Hezekeli 20:14

Kodvwa ngenca yeLibito lami, ngenta loko lokwakungaligcina lingakonakali emehlweni etive, leto lengangibakhiphe embikwato.

Hezekeli 20:9

Kodvwa ngenca yeLibito lami, ngenta loko lokwakungaligcina lingakonakali emehlweni etive labebahlala emkhatsini wato, nalengatembula embikwato kuma-Israyeli ngekubakhipha eveni laseGibhithe.

Hezekeli 36:32

Ngifuna nati kutsi loko angikwenti ngenca yenu. Banini nemahloni nihlazeke ngenca yekutiphatsa kwenu kabi, ninendlu yaka-Israyeli, kusho iNkhosi Simakadze.

Hezekeli 39:7

“ ‘Libito lami lelingcwele ngiyawulenta latiwe emkhatsini wesive sami, ema-Israyeli. Yebo, Libito lami lelingcwele ngingeke ngisaliyekela lihlanjalatwe, netive tiyawukwati kutsi mine nginguSimakadze, Longcwele ka-Israyeli.

Hezekeli 6:14

Ngiyakwelula sandla sami etikwabo, ngente lelive labo lisale likhala libhungane, kusukela ehlane kuze kuyewufika eDibla, kuyo yonkhe indzawo lapho bahlala khona. Ngulapho-ke bayawukwati khona kutsi mine nginguSimakadze.’ ”

Dutheronomi 29:6

Anizange senidle sinkhwa, aninatsanga naliwayini, nome lesinye sinatfo lesivutjelwa. Ngakwenta kuze ningati kutsi nginguSimakadze Nkulunkulu wenu.

Dutheronomi 32:27

Kodvwa ngakwesaba kucolosha kwesitsa, funa sitsa singacondzisisi kahle, bese sitsi: “Sandla sami sincobile akukentiwa nguSimakadze konkhe loku.” ’