LUKASI 16:13 - Ha`bari Ndjema ya I Maore

¹³ Kav̄u murumizi ashindrao arumishe warumisa waili, mana au atsoenga umoja, av̄endze umoja, au atsofungana na umoja, umoja amuoneye. Kamushindri murumishia Mungu v̄umoja na mali.»

LUKASI 16:13 ပူးပေါင်းရင်းမြစ်များ

MATIYO 4:10

Sa ile Insa amuambia: «Lawa v̄anu Shetwani! Mana v̄uangihwa: ‹Utsomuãɓudu Mwalaho Monyezi Mungu, na umurumishia ɗe waye tu ɓas.› »

MATIYO 6:24

«Kav̄u mutru ashindrao arumishiye warumisa waili, mana au atsoenga umoja, av̄endze umoja, au atsodzifungamanisa na umoja, apuzise umoja. Kamushindri murumishia Mungu, mwarumishia na Mali.»

LUKASI 11:23

Mutru kasi v̄umoja na wami, a kinyume na wami, na uwo kasungulidza v̄umoja na wami, asutsapua.»

LUKASI 14:26

«Neka mutru asunijilia aniɗunge, ne asumuv̄endza ɓaɓahe, mayahe, mushe wahe, wana wahe, wananyahe, au ata inafusi yahe rahana wami, katsoshindra aka swihaɓa langu.

LUKASI 16:12

Na neka kamwaka waaminifu hari mwa za munyanyu, mbani atsomuv̄aoni zanyu?

LUKASI 16:9

Ɓasi wami nisumuambiani, namudzifanyiye wandzani ha imali ya lidunia lini, ile pare zamomulawiani, murengwe hari mwa makao ya daima.

LUKASI 9:50

Ɓadi Insa amuambia: «Mwasumuɓalidze; mana mutru kasi kinyume na wanyu, uwo a v̄umoja na wanyu.»

YAKOƁU 4:4

Wanyu wazindzi halisi! Afa kamusujua amba uwandzani na lidunia, uwo uãduwi na Mungu? Ɓasi mutru atsahao ake mwandzani wa lidunia, waye asudzifanya ãduwi wa Mungu.