जकरिया 10:10 - Sunuwar Bible

¹⁰ गो मेको आन कली इजीप्‍त रागी रे आन आंम रागीम लेप्‍पाइक्‍नुङ। गो मेको आन कली अस्‍सुर रे ग्रुंइ‍शा, गिलाद नु लेबानोनम चाक्‍नुङ। नोले मेकेर शुश मुर दुम्‍तीके बाक्‍तीके मबाक्‍ब।

जकरिया 10:10 ပူးပေါင်းရင်းမြစ်များ

यसैया 60:22

मेको नेल्‍ल क्‍येङा महिक्‍सीशो थर का दुम्‍नीम। मिनु नेल्‍ल क्‍येङा आइक्‍च मुरपुकी ठेयब रागी ब्रीशा, सक्ति पाइश्‍शो दुम्‍नीम। मेना गो, परमप्रभु यावेमी मेको रीब पा पाइनुङ” देंत।

येरमीया 22:6

मारदे हना यहूदा ङा पिप आ दरवार आ पर्बम परमप्रभु यावेमी “गे आं कली गिलाद नु लेबानोन ङा डांडा खोदेंशो बाक्‍नेवे। गो इ कली गोरशो रागी नु मुर मबाक्‍शो सहर खोदेंशो सेल्‍नुङ, दे कसम जाता।

येरमीया 50:19

गो इस्राएल कली आं कली योव़तीकेम लेश्‍शा चाक्‍नुङ। मिनु मेको कारमेल नु बाशान मेर जोइ‍ब। एफ्राइम नु गिलाद ङा पहाड मेर मेको आ शोव़लु बेक्‍शो रूब।

होसे 11:10

मेकोपुकी परमप्रभु यावे आ नोले खोइक्‍नीम। मेको चहिं गुप्‍स खोदेंशो पा ग्रीब। मिनु मोपा ग्रीमेनु, आ आलपुकी पच्‍छिम रे पा ख्रिंख्रि पना पन जाक्‍नीम। येरमीया २५:३०; होसे २:१

होसे 11:11

मेकोपुकी इजीप्‍त रागी रे चिक्‍ब खोदेंशो पा बेरशा जाक्‍नीम। अस्‍सुर रे पा ढुकुर खोदेंशो पा ख्रिंख्रि पना पन जाक्‍नीम। गो मेको आन कली आन खिंमी बाक्‍चा गेनुङ” दे परमप्रभु यावेमी देंत।

ओबदिया 1:20

मिनु ग्‍याइश्‍शा लाइक्‍चा पुंइसीशो हालाहम बाक्‍शो इस्राएलीपुकीमी फोनीचीआ रे चारेफाथ सम्‍म ङा रागी आन के सेल्‍नीम। मिनु यरूसलेम रे ग्‍याइश्‍शा लाइक्‍चा पुंइसीशो सेफाराद सहरम बाक्‍शो मुरपुकीम नेगेब ङा सहर आन के सेल्‍नीम।

मीका 7:14

गे इन मुर आन कली कोक्‍केम योव़ङीन। मेको ब्‍वाकीम बाक्‍शो बगाल इन के बाक्‍ब। मेको रिम्‍शो बाक्‍तीकेम बाक्‍नीम। मेको आन कली ङोंइती ङा खोदेंशो पा बाशान नु गिलादमी जोचा गेन। मीका ५:३; येरमीया ५०:१९

जकरिया 8:7

मुर नेल्‍ल आन परमप्रभु यावेमी मार देंत देंशा हना “गो आं मुर आन कली पूर्ब ङा रागी नु पच्‍छिम ङा रागी रे पा प्रोंइ‍नुङमी।

जकरिया 8:8

मिनु गो मेको आन कली यरूसलेममी बाक्‍पाइक्‍चा कली चाक्‍नुङमी। मेकोपुकी आं मुर दुम्‍नी‍म। मिनु गो मेको आन परमप्रभु दुम्‍नुङ। गो मेको आन कली दाक्‍चा मप्रोंइथु, ठीक पाइनुङ” देंत। येरमीया २४:७