रोमी 12:3 - Sunuwar Bible

³ परमप्रभु यावेमी आं कली शिशी गेशा, शेंब सेल्‍ती। इन दातेमी सुइ आंम कली ठेयब मसेल्‍सीन। परमप्रभु यावेमी इन कली दोदेंशो थमा सुइक्‍तीक गेवा, मेको मिम्‍शा ब्रेम्‍शो दुम्‍शा बाक्‍कीन। मत्ती २०:२६; १कोरिन्‍थी ४:६; १कोरिन्‍थी

रोमी 12:3 ပူးပေါင်းရင်းမြစ်များ

हितोपदेस 25:27

शुश खुदो जचा नु आंम कली ठेयब मिम्‍शा मान पाइक्‍चा पुंइसीचा, निम्‍फा मुर कली मरिम्‍शो बाक्‍‍ब।

हितोपदेस 26:12

आंम कली “जोक्‍ब तुइक्‍ब मुर नङ” दे मिम्‍ब मुर क्‍येङा मूर्खन रिम्‍शो बाक्‍ब। हितोपदेस ३:७

उपदेसक 7:16

शुश ठीक पाइब मदुमो। मिनु शुश जोक्‍ब तुइक्‍ब यो मदुमो। गे मारदे आंमा खतम सेल्‍सीनेवे? लूका १८:११-१२

मीका 6:8

परमप्रभु यावेमी इन कली, गे बेक्‍शा लाइब मुर, इन कली मार रिम्‍शो बाक्‍मे नु मार पचा माल्‍नीनी, मेको देंशो बाक्‍ब। मार देंशो बाक्‍ब देंशा हना, गे ठीक निसाफ पने, शिशी प‍तीक कली दाक्‍तीन। मिनु इन परमप्रभु आ ङोंइती ब्रेम्‍शो दुम्‍शा गाक्‍कीन। ब्‍यवस्‍था १०:१२; १सामुएल १५:२२

लूका 18:11

फरिसीमी मुर नेल्‍ल आन कली तपांइसीशा, चढ़ेतीक आ नेक्‍था राप्‍शा ‘परमप्रभु यावे, गे रिम्‍शो पाइब बाक्‍नीनी। मारदे हना गो अरु मुर खोदेंशो पा मुर आन मार मार रोइक्‍ब मनङ। गो जोल पाइब यो मनङ। मीश वोंइश आस नाता ख्रोइक्‍ब मनङ। मेरे तिरो पोक्‍ब खोदेंशो पापी मनङ। यसैया ५८:२-३

यूहन्‍ना 3:34

परमप्रभु यावे आ सोइश्‍शोमी परमप्रभु यावे आ लोव़ पाइब। मेकोमी परमप्रभु यावे आ सोक्‍तीमी ब्री‍तीके आ लोव़ पाइब। यूहन्‍ना १:१६

रोमी 1:5

मिनु येसु ख्रीस्‍तमी नेल्‍ल अर्को रागी ङा मुर आन कली आ लोव़ तुइक्‍पाइक्‍चा कली शिशी पा योव़ती। मुरपुकीमी येसु ख्रीस्‍त आ लोव़ टीमेक्‍ल देंशा, शेंथ सोइक्‍ताक्‍यी। रोमी १५:१८; प्रेरित २६:१६-१८; गलाती २,७,९

रोमी 11:20

इन देंशो ठीक बाक्‍ब। मेकोपुकीमी थमा मसुदेम। मिनु परमप्रभु यावेमी मेको आन कली क्‍योरशा ताइक्‍ताक्‍व। इन थमा सुइश्‍शो तशा इन कली चहिं रिम्‍शो फल रवाम केप्‍शो खोदेंशो पा आ मुर सेल्‍तु। काइ ठेयब मलेत्‍थु, परमप्रभु यावे कली मान पा हिंशा बाक्‍कीन। १कोरिन्‍थी १०:१२

रोमी 11:25

आं लोक्‍बपुकी, आं शेंशो ख्रुइश्‍शो लोव़ रिम्‍शो पा रुप्‍तीनी हना, गे ठेयब मलेत्‍नीनी। योव़सीचा पुंइसीशो अर्को रागी ङा मुर आन कली आ मुर सेल्‍ने मथुमा सम्‍म परमप्रभु यावेमी इस्राएली आन कली येसु ख्रीस्‍त आ पर्बम मरुप्‍ब सेल्‍तीमी। यूहन्‍ना १०:१६

रोमी 12:16

थुं का ङा दुम्‍शा, दुशा गारशा बाक्‍कीन। जोक्‍ब तुइक्‍ब नङ, दे ठेयब मलेत्‍तीने। आंम महिक्‍सीशो सुंइ‍सीन। जोक्‍ब तुइक्‍ब ममिम्‍सीने। रोमी १५:५; फिलिप्‍पी २:२; यसैया ५:२१

१ कोरिन्‍थी 15:10

तन्‍न परमप्रभु यावेमी शिशी पा आ सोइश्‍शो नु आ लोव़ शेंब सेल्‍ती। आ शिशी पशो यो मो मबाक्‍ब। मिनु गो नेल्‍ल आन क्‍येङा शुश गेय पाता। मेको नेल्‍ल आं पशो ममाइ, तन्‍न परमप्रभु यावे आ पपाइश्‍शो बाक्‍ब। २कोरिन्‍थी ११:५,२३

१ कोरिन्‍थी 3:10

परमप्रभु यावेमी आं कली रिम्‍शो दारशो खिं सेल्‍ब सेल्‍ती। मिनु आ देंशो टिशा, खिं ङा जग दोशा, बोल्‍यो पा वोइक्‍ता। मेको जग तारी अरुमी प्रोव़ना प्रोव़न लाइक्‍नीम। मेको प्रोव़बपुकीमी दोपा रिम्‍शो दुम्‍बा, मेको मिम्‍शा गेय पामेक्‍ल।

१ कोरिन्‍थी 7:17

प्रभुमी इन कली दोपा योव़शा वोदा मोपान बाक्‍कीन। परमप्रभु यावेमी इन कली दोपा ब्रेत्‍ता मोपा बाक्‍कीन। मेको आं शेंतीक नेल्‍ल ग्रुम्‍तीक खिं आन कली बाक्‍ब।

२ कोरिन्‍थी 10:13

गो आंइ नें बोरपाइक्‍नीकी। मारदे हना परमप्रभु यावेमी आंइ कली अधिकार गेशा, इन कली शेंब सेल्‍तु। आ गेशो अधिकार ङा लाक्‍शा चहिं जोक्‍ब तुइक्‍ब नकी, दे बोरशा मगाक्‍नीकी। रोमी १५:२०; रोमी १२:३

२ कोरिन्‍थी 12:13

तेइ तेइ येसु आ नेंमी खुम्‍सीशा बाक्‍ब आन कली मारेइ मारेइ शेंशा, मारेइ मारेइ पशा कोंइशो खोदेंशो पा इन कली यो पशा कोंइताक्‍न्‍नी। मिनु मार लीम ङा? लोव़ का चहिं मार लीत देंशा हना, गेपुकी नु गो मारेइ मताक्‍गु। आं मताक्‍शोमी माफ गेयीनी। २कोरिन्‍थी ११:७-९

२ कोरिन्‍थी 12:7

गो शुश कोंइतीके तशा, मेको आ पर्बम ठेयब लेश्‍शा, नें मबोरपदुल, दे सैतान आ चू आं रांम गेती। मेको आं कली श्‍येत गेचा कली नु आं ठेयब लेत्‍तीक तेक्‍चा कली बाक्‍ब।

गलाती 6:3

सुइ ठेयब मसुंइ‍सेक्‍ल। मजोक्‍थु यो जोक्‍ब तुइक्‍ब नङ, दे ठेयब लेप्‍बमी आंम कली जोल पांइसीब।

एफिसी 3:2

परमप्रभु यावेमी “अर्को मुर आन कली आं शिशी आ पर्बम शेंदो” दे आं कली गेय पाइब सेल्‍ती। गेपुकीम एको लोव़ नेंशो बाक्‍नी माइ, दे मिम्‍नुङ। गलाती २:७

एफिसी 3:4

मिनु गेपुकीमी मेको पढेनीनु, ख्रीस्‍त आ पर्बम ख्रुइश्‍शो लोव़ ङा गेय दोपा पवा, दे आं तुइश्‍शो लोव़ रुप्‍ने चाप्‍नीनी।

एफिसी 4:16

मोपा येसु ख्रीस्‍त पिया दुम्‍तीके रां नेल्‍ल का खोदेंशो पा गारपाइक्‍ब। थमा सुइक्‍बपुकीमी ठीक गेय पाम्‍तेक्‍म हना, मेको रां बारना बारन लशा, थमा सुइक्‍बपुकी दाक्‍मुइनीम। कलस्‍सी २:१९

फिलिप्‍पी 2:13

मारदे हना परमप्रभु यावेमी इन थुंमी गेय पाइब। मार गेय पाइब देंशा हना, आ दाक्‍शो पचा, दे इन कली दाक्‍ब थुं गेशा, गेय पपाइक्‍ब। फिलिप्‍पी १:६

कलस्‍सी 1:29

मोपतीके गो बोल पा शुश गेय पाइनुङ। येसु ख्रीस्‍तमी आं कली मोदेंशो पा आ सक्तिमी गेय पपाइक्‍ब।

कलस्‍सी 2:13

ङोंइती गेपुकी मरिम्‍शो पाइब दुम्‍शा, ख्रोइक्‍तीक चिनु इन रांमी मख्रोइक्‍थु, बेक्‍शो मुर खोदेंशो बाक्‍तीनी। परमप्रभु यावेमी इं मरिम्‍शो पतीके नेल्‍ल क्‍याम्‍शा, इं कली येसु ख्रीस्‍त नु ब्रोंइपाइक्‍तु। एफिसी २:१,५

१ तिमोथी 1:14

इं प्रभुमी आ दाक्‍शो थमा सुइक्‍तीके नु दाक्‍तीके थुं ब्रीशा, क्‍युप्‍चा ङा पा गेती। मेको निम्‍फा ख्रीस्‍त येसु नु बाक्‍नीस।

१ तिमोथी 2:15

मो हना यो मीश मुरपुकी रागीम आल जरमेसे ङा मेरे ब्रोंइचा ताइनीम। तन्‍न मेकोपुकी थमा सुइक्‍ब दुम्‍शा, दाक्‍मुशा, परमप्रभु यावे आ मुर दुम्‍शा नु ठेयब मलेत्‍थु बाक्‍चा माल्‍नीम। १तिमोथी ५:१४; तीतस २:४-५

१ तिमोथी 2:9

मीश मुरपुकी यो ठीक पा फेक्‍शा, गेय पचा ङोंइती मिम्‍शा, रिम्‍शो बाक्‍चा माल्‍नीम। मोपा चांमी मार मार वोइश्‍शा लामा प्रोव़शा, सुन मोती नु शुश क्‍येट लाइब वामी मग्‍योम्‍समल। १पत्रुस ३:३-५

तीतस 2:12

मोदेंशो शिशीमी इं कली परमप्रभु यावे कली मगारचा ङा गेय नु रागी रागी ङा मुर आन पतीके आ पर्बम मोदेंशो मपचा, दे शेंब। मिनु मुल गेय पचा क्‍येङा ङोंइती मिम्‍चा, ठीक गेय पचा नु रागीम बाक्‍शा, परमप्रभु यावे कली मान पा हिंचा, दे शेंब।

तीतस 2:2

गे खाल्‍पा आन कली मार शेंचा माल्‍नेवे देंशा हना, रिम्‍शो मिम्‍ने चाप्‍ब, मान पाइक्‍चा शिरशो मुर, गेय पचा क्‍येङा ङोंइती मिम्‍ब, आन थमा सुइक्‍चा, आन दाक्‍चा नु आन फाल्‍चा ङा सक्ति ठीक दुम्‍शा बाक्‍चा माल्‍नीम, दे शेंचा माल्‍नेवे। १तिमोथी ५:१

तीतस 2:4

मोदेंशो पा खाल्‍पीपुकीमी आन क्‍येङा आल मीश मुर आन कली आन वोंइश नु आन आल आन कली दाक्‍चा माल्‍ब, दे शेंचा माल्‍नीम।

तीतस 2:6

मोदेंशो पा गे इ क्‍येङा आल वोंइश मुर आन कली “गेय पचा क्‍येङा ङोंइती मिम्‍चा माल्‍ब” दे शेंचा माल्‍नेवे।

याकूब 4:6

तन्‍न परमप्रभु यावेमी मेको क्‍येङा शुश शिशी पाइब। मिनु “गो ठेयब लेश्‍शो मुर आन कली शिशी मपाइनुङ। ब्रेम्‍शो, ठेयब मलेश्‍शो मुर आन कली ला शिशी पाइनुङ” दे ब्रेक्‍पाइश्‍शो बाक्‍ब। अय्‍युब २२:२९; हितोपदेस ३:३४; मत्ती २३:१२; १पत्रुस ५:५

१ पत्रुस 1:13

मोपतीके इन थुं फ्रेंदीन। गेय पचा ङोंइती मिम्‍तीन। येसु ख्रीस्‍त जाक्‍मेनु, इन कली शिशी पाइब, दे आस पा बाक्‍कीन। लूका १२:३५-३६

१ पत्रुस 4:11

सुमी लोव़ पाइबा, मेकोमी परमप्रभु यावे आ ख्रुइश्‍शो लोव़ पवल। सुमी गेय पाइबा, मेकोमी परमप्रभु यावे आ गेशो सक्तिमी पवल। मोपा नेल्‍लेमी येसु ख्रीस्‍त आ नेंमी परमप्रभु यावे कली ठेयब सेल्‍मेक्‍ल। मेको छेङछेङमी बाक्‍शा, गेना हना यो सक्ति पाइश्‍शो बाक्‍ब। आमेन। रोमी १२:७

१ पत्रुस 4:7

रागी नु रागीमी बाक्‍शो मारेइ मारेइ नुप्‍चा चिक्‍शो बाक्‍तेक्‍म। मोपतीके इन गेय पचा ङोंइती मिम्‍शा नु आंम रां कली अरेशा प्रार्थना पने। १कोरिन्‍थी १०:११; १यूहन्‍ना २:१८

१ पत्रुस 5:5

मिनु गे ठिटापुकी, शेंब खाल्‍पा आन देंशो लोव़ टिने। गे नेल्‍ल ब्रेम्‍शो थुं पाइश्‍शो दुम्‍शा, गेय पमुने। मारदे हना परमप्रभु यावेमी ठेयब लेश्‍शो मुर आन कली मकोव़ब, ब्रेम्‍शो थुं पाइश्‍शो मुर आन कली ला शिशी पाइब। एफिसी ५:२१; अय्‍युब २२:२९; हितोपदेस ३:३४; मत्ती २३:१२; याकूब ४:६

१ पत्रुस 5:8

गेय पचा ङोंइती मिम्‍तीन। होस पा बाक्‍कीन। मारदे हना इन कली मदाक्‍ब सैतानमी शोव़लु बेक्‍शो गुप्‍स खोदेंशो पा “सु कली ब्‍वाइनुङा” दे माल्‍ना माल्‍न गाक्‍ब। १थिस्‍सलोनिकी ५:६; लूका २२:३१; २कोरिन्‍थी २:११

३ यूहन्‍ना 1:9

गो इन ग्रुम्‍तीके ङा थमा सुइक्‍ब आन कली ब्रेक्‍ताक्‍ङमी। तन्‍न डियोत्रीफसमी आंम कली ठेयब सेल्‍शा, गोपुकी आंइ कली मदाक्‍ब।