प्रकाश 22:20 - Sunuwar Bible

²⁰ मिनु एको लोव़ पाइबमी “आमेन, गो फ्रा लेश्‍शा यीनुङ” देंत। मिनु थमा सुइक्‍बपुकीमी “आमेन, प्रभु येसु जाक्‍कीन” देंतेक्‍म। १कोरिन्‍थी १६:२२

प्रकाश 22:20 ပူးပေါင်းရင်းမြစ်များ

ठेयब कुम्सो 8:14

आं दाक्‍शो मुर गे रीब पा मस्‍ला बाक्‍शो डांडा ङा किश्‍श खोदेंशो नु ठिटा रोकोश खोदेंशो दुमो।

यसैया 25:9

मिनु मेको नाक्‍ती मुरपुकीमी “कोव़ङीन, मेको आंइ परमप्रभु बाक्‍ब। गो मेको आ लां कोव़तक। मिनु मेकोम आंइ कली श्‍येत रे प्रोंइतु। मेको आंइ रिम्‍शा बाक्‍शो परमप्रभु यावे बाक्‍ब। गोपुकी आ प्रोंइशो तशा ग्‍येरसाक्‍क। भजन संग्रह ४८:१५

यूहन्‍ना 21:25

येसुमी मेको किताबमी ब्रेक्‍शो पशो गेय ला ममाइ, तन्‍न अरु शुश गेय यो पाइबाक्‍त। आ पशो गेय नेल्‍ल ब्रेक्‍ताक्‍व हना, मेको किताबपुकी वोइक्‍चा कली रागीमी यो मरिक्‍ब, दे मिम्‍नुङ। यूहन्‍ना २०:३०; भजन संग्रह १०६:२

१ कोरिन्‍थी 16:22

प्रभु कली मदाक्‍बपुकी सराप रमल। इं प्रभु जाक्‍कीन। प्रकाश २२:२०

२ तिमोथी 4:8

मुल रे ठीक पतीके ङा सिरपेच गुप्‍चा दे आं कली वोइश्‍शो बाक्‍त। प्रभु ठीक निसाफ पाइब बाक्‍ब। मेकोमी आं कली आ नाक्‍तीम सिरपेच गेब। आं कली ला ममाइ, सु सुमी आ जाक्‍शो दाक्‍नीमी, मेको आन कली यो गेब। २तिमोथी २:५; १पत्रुस ५:४; याकूब १:१२; प्रकाश २:१०; मत्ती २५:२१

हिब्रू 10:37

मार ब्रेक्‍शो बाक्‍ब देंशा हना, लोव़ कामी “ ‘गो जाक्‍नुङ’ देंबमी मजाक्‍थु मप्रोंइब, देश पा यो मबाक्‍ब।

हिब्रू 9:28

मोपा ख्रीस्‍त शुश मुर आन पाप क्‍याम्‍चा कली खेयप का आ हुश चढ़ेप्‍तु। मिनु लेंशा जाक्‍ब। पाप क्‍याम्‍थ चहिं मजाक्‍ब। तन्‍न मेको कली थमा सुइश्‍शा रिम्‍शा बाक्‍ब आन कली श्‍येत रे प्रोंइचा कली जाक्‍ब। हिब्रू १०:११,१२,१४

प्रकाश 1:18

ब्रोंइशा बाक्‍ब नङ। गो बेक्‍शा यो, लेंशा मबेक्‍चा ङा पा ब्रोंइती। मिनु नरक नु बेक्‍शा लशो मुर आन बाक्‍तीक ङा रोक्‍तीक सांचो गो नु बाक्‍ब।

प्रकाश 1:2

मिनु गो, यूहन्‍नामी, परमप्रभु यावे आ लोव़ नेंता, येसु ख्रीस्‍त आ पशो ताता। मिनु मेको नेल्‍ल आन सांकछी दुम्‍ती।

प्रकाश 2:16

मोपतीके इन थुं गो आं गे लेत्‍तीन। मलेत्‍ताक्‍नी हना, गो इन ग्रुम्‍तीकेमी रीब पा जाक्‍नुङ। मिनु आं शोव़ ङा तरवारमी मेको नु लडाइ पाइनुङ।

प्रकाश 22:10

मिनु मेकोमी आं कली “एको किताबमी ब्रेक्‍शो लोव़ दुम्‍चाप्‍तु। मोपतीके ख्रुइश्‍शा मवोतो, पढेशा नेंपाइक्‍मी। प्रकाश १०:४; प्रकाश १:३

प्रकाश 22:12

मिनु नोले येसुमी “नेनो, गो फ्रा लेश्‍शा जाक्‍नुङ। मिनु जाक्‍शा, मुर नेल्‍ल आन कली आन पशो खोदेंशो पा गेनुङ। मेको आन गेय दोपा पामे, मोपा गेनुङ।

प्रकाश 22:18

सु सुमी एको किताबम ब्रेक्‍शो परमप्रभु यावेम तुइक्‍पाइश्‍शो लोव़ नेंनीमी, मेको आन कली गो लोव़ का पाइनुङ, मार लोव़ पाइनुङ देंशा हना, सु सुमी एको लोव़मी अर्को लोव़ तेम्‍नीमी, मेको सजाइ ताइनीमी। मार सजाइ ताइनीमी देंशा हना, परमप्रभु यावेमी एको किताबमी ब्रेक्‍शो श्‍येत मोदेंशो मुर आन कली गेब। ब्‍यवस्‍था ४:२

प्रकाश 22:7

मिनु नेनीन, गो फ्रा लेश्‍शा जाक्‍नुङ” दे माइक्‍ती। सु सुमी एको किताबमी ब्रेक्‍शो लोव़ नेंशा पाइनीमी, मेको ग्‍येरसीशो मुर बाक्‍नीम।