प्रकाश 20:2 - Sunuwar Bible

² मिनु मेकोमी ठेयब बुस्‍स कली ग्‍याइश्‍शा पाइक्‍ताक्‍व। मेको ठेयब बुस्‍स आ नें मार बाक्‍त देंशा हना, साइ ङोंइती ङा बुस्‍स, दियाबलस नु सैतान मेको आ नें बाक्‍त। मिनु मेको परमप्रभु यावे आ स्‍वर्ग ङा गेय पाइबमी मेको कली हजार का बर्स सम्‍म पाइक्‍ताक्‍व। दियाबलस आ देंशो “मुर आन कली खाल्‍ब” बाक्‍ब। प्रकाश १२:९

प्रकाश 20:2 ပူးပေါင်းရင်းမြစ်များ

उत्पत्ती 3:1

मिनु परमप्रभु यावे आ सेल्‍शो जन्‍तु आन दातेमी नेल्‍ल क्‍येङा निप्‍स पाइश्‍शो बुस्‍स दुम्‍माक्‍त। मिनु बुस्‍सुमी मीश मुर कली “परमप्रभुमी इस कली ‘एको रू ङा रवा आन फल मारेइ मब्‍वसे’ देंमे?” दे हिल्‍लो पवा बाक्‍त। प्रकाश १२:९; प्रकाश २०:२

उत्पत्ती 3:15

गे नु मेको मीश मुर जिशा, बाक्‍चा मलीसे। मेको आ युइ नु इ युइ जिशा बाक्‍नीमी। मीश मुर आ युइ कामी इ पिया दिम्‍शा प्रोल्‍ब। गे चहिं मेको आ गेंग्रेम कोक्‍नेवे” दे सराप पदा बाक्‍त। प्रकाश १२:४-५,१५-१७

अय्‍युब 1:7

मिनु परमप्रभु यावेमी सैतान कली “गे ते रे जाक्‍ङे?” दे हिल्‍लो पवा बाक्‍त। मिनु सैतानमी परमप्रभु यावे कली “रागी ङा एर ओंथ नेल्‍ल हिरशा जाक्‍ती” देंमाक्‍त।

यसैया 24:22

जेल्‍खानम खुम्‍सीशो मुर खोदेंशो पा बिक्‍तीकेमी खुम्‍सीचा पुंइसीनीम। मेको जेल्खानम चोक्‍चा पुंइसीशा, शुश नाक्‍त नोले सजाइ ताइनीम।

यसैया 27:1

मेको नाक्‍ती परमप्रभु यावेमी आ हिंचा ङा, ठेयब नु सक्ति पाइश्‍शो तरवारमी खेदा पना पन लेव्‍याथन माइश्‍शो बुस्‍स कली सजाइ गेब। ग्रेशा गाक्‍ब बुस्‍स लेव्‍याथन नु समुन्‍द्रम बाक्‍ब ठेयब जन्‍तु कली साइक्‍ब। भजन संग्रह ७४:१४

इजीकीएल 47:5

मिनु मेकोम लेंशा अर्को हजार का कुबीत पुक्‍तु। मिनु गो मेको खोला शोक्‍ने मचबु। मारदे हना ब्‍वाक्‍कु बारशो बाक्‍त। मेको दोम्‍ली ग्‍यारचा ङा दुम्‍शो बाक्‍त हना यो, शोक्‍ने मचाप्‍चा ङा बाक्‍त।

मत्ती 19:29

सुमी आं नें आ पर्बम आ खिं, आ लोक्‍ब, दिदी बहिनी, आम आफ, तमी तौ, आ नु बाक्‍शो नेल्‍ल प्रोंइबा, मेकोमी आ प्रोंइशो क्‍येङा शुश ताइब। मिनु गेना हना यो परमप्रभु यावे नु बाक्‍चा ताइब।

मत्ती 8:29

मिनु मार दुम्‍माक्‍त देंशा हना, मेको निक्‍शीमी “परमप्रभु यावे आ तौ, गे नु गोपुकी मार पमुइया ङा? आंइ कली श्‍येत गेची मजाक्‍थु, मुल कना श्‍येत गेथ जाक्‍नी?” दे ग्रीसा बाक्‍त। लूका ४:४१; २पत्रुस २:४; याकूब २:१९

मर्कूस 4:15

लांमी शोक्‍शो दोदेंशो बाक्‍नीम देंशा हना, लोव़ नेन्‍मेनु, सैतानमी आन थुंमी रुप्‍शो लोव़ योल्‍ब।

मर्कूस 5:7

मिनु ठेयब सेंदामी ग्रीशा “परमप्रभु यावे, नेल्‍ल क्‍येङा ठेयब आ तौ, गो निक्‍शी मार पमुसा ङा? परमप्रभु आ नें थिशा, श्‍येत मगेयीनी दे पुंइनन्‍नी” देंमाक्‍त। मर्कूस १:२४

यूहन्‍ना 12:31

मुल रागी नेल्‍ल ङा मुर आन कली निसाफ पची नाक्‍त जाक्‍त। मुल रागी कली हुकुम पाइब कली तिल्‍नीम। यूहन्‍ना १४:३०; यूहन्‍ना १६:११; लूका १०:१८

यूहन्‍ना 16:11

मिनु निसाफ पचा आ पर्बम मार शेंब देंशा हना, परमप्रभु यावेमी रागी ङा मुर आन कली हुकुम पाइब सैतान कली निसाफ पने थुम्‍तु, दे शेंब। यूहन्‍ना १२:३१

रोमी 16:20

थुं नाइक्‍चा गेब परमप्रभु यावेमी रीब पा सैतान कली इन खोइल आगाम वोइक्‍ब। इं प्रभु येसु ख्रीस्‍तमी इन कली शिशी पवल।

हिब्रू 2:14

तमी तौ हुश नु रुश के जोल्‍शो नम। मोपतीके येसु ख्रीस्‍त मेकोपुकी नु खाल का ङा पा हुश नु रुश के दुम्‍त। बेक्‍पाइक्‍ब सक्ति पाइश्‍शो कली खतम पोक्‍चा कली आंमन बेक्‍त। २तिमोथी १:१०; १यूहन्‍ना ३:८

१ पत्रुस 5:8

गेय पचा ङोंइती मिम्‍तीन। होस पा बाक्‍कीन। मारदे हना इन कली मदाक्‍ब सैतानमी शोव़लु बेक्‍शो गुप्‍स खोदेंशो पा “सु कली ब्‍वाइनुङा” दे माल्‍ना माल्‍न गाक्‍ब। १थिस्‍सलोनिकी ५:६; लूका २२:३१; २कोरिन्‍थी २:११

२ पत्रुस 2:4

का निक्‍शी परमप्रभु यावे आ स्‍वर्ग ङा गेय पाइबपुकी यो पाप पतीके शिशी मतामे। परमप्रभु यावेमी मेको आन कली नरकमी ताइश्‍शा, नेल्‍ल क्‍येङा मरिम्‍शो बाक्‍तीकेमी सोइक्‍ताक्‍मी। मिनु निसाफ पची नाक्‍त सम्‍म छिङछिङमी चोक्‍शा वोइक्‍तीमी।

यहूदा 1:6

परमप्रभु यावे आ स्‍वर्ग ङा गेय पाइब का निक्‍शीमी परमप्रभु यावे कली मटिथु आन बाक्‍तीके प्रोंइतेक्‍म। परमप्रभु यावेमी मेको आन कली ठेयब निसाफ पची नाक्‍त सम्‍म गेना हना यो मप्रोंइचा ङा पा साङलोमी पाइश्‍शा, नेल्‍ल क्‍येङा मरिम्‍शो बाक्‍तीक छिङछिङमी वोइश्‍शो बाक्‍ब। उत्‍पत्ती ६:२-४

प्रकाश 12:13

मिनु मेको ठेयब बुस्‍सुम आंम कली रागीमी तोक्‍शो तशा, मेको वोंइश आल थीब मीश मुर कली “साइक्‍नुङ” दे खेदा पाप्‍तु।

प्रकाश 12:15

मिनु मेको ठेयब बुस्‍सुमी “मेको मीश मुर कली योल्‍दल” दे आ शोव़ रे खोला खोदेंशो पा शुश ब्‍वाक्‍कु ग्रुंइताक्‍व।

प्रकाश 12:17

मिनु मेको ठेयब बुस्‍सुमी मीश मुर प्रोक्‍शो तशा, गाइश्‍शा, मेको मीश मुर आ चच युइ नु राम्‍शी पथ लत। आ चच युइ चहिं सु नम देंशा हना, परमप्रभु यावे आ शेंशो लोव़ टीब नु येसु कली थमा सुइश्‍शा, आ लोव़ पाइब नम।

प्रकाश 12:3

मिनु गो सरीङमी अर्को चिन्‍ड का ताता। मेको चिन्‍ड दोदेंब बाक्‍त देंशा हना, ठेयब लल बुस्‍स का बाक्‍त। मेको बुस्‍स के ७ ओटा पिया नु १० ओटा ग्रोव़ बाक्‍तेक्‍म। आ ७ ओटा पियामी ७ ओटा मुकुट गुप्‍शो बाक्‍त।

प्रकाश 12:4

मेको आ मीलुमी सरीङ ङा सोरुल भाग सां ङा भाग का कीशा, रागीमी तोक्‍तीमी। मिनु मेको ठेयब बुस्‍स मेको आल थिचशो मीश मुर आ ङोंइती राप्‍शा, आ आल ब्‍वचा कली रिम्‍शा बाक्‍त। दानीएल ८:१०

प्रकाश 12:9

मिनु मेको ठेयब बुस्‍स आ नें मार बाक्‍त देंशा हना, माइत बुस्‍स, दियाबलस, सैतान बाक्‍त। मिनु मेको रागी रागी नेल्‍ल ङा मुर आन कली पाप पपाइक्‍चा कली रागीमी तोक्‍चा पुंइसीशो बाक्‍त। मिनु मेको आ गेय पाइबपुकी यो रागीमी तोक्‍चा पुंइसीशो बाक्‍तेक्‍म। प्रकाश २०:२; उत्‍पत्ती ३:१; लूका १०:१८

प्रकाश 13:2

मिनु आं तशो जन्‍तु जोइ खोदेंशो बाक्‍त। आ खोइल चहिं वां के खोदेंशो बाक्‍त। आ शोव़ गुप्‍स आ शोव़ खोदेंशो बाक्‍त। मिनु मेको ठेयब बुस्‍सुमी आ सक्ति आ नित्‍तीके नु आ ठेयब अधिकार मेको जन्‍तु कली गेप्‍तु।

प्रकाश 13:4

ठेयब बुस्‍सुमी मेको जन्‍तु कली आ अधिकार गेतीके मुर नेल्‍लेमी ठेयब बुस्‍स कली खुम्‍की पा सेउ पाम्‍तेक्‍म। मिनु मेको जन्‍तु कली यो खुम्‍की पा “एको जन्‍तु खोदेंशो ठेयब सु बाक्‍मे? सु एको नु जिशा ग्राने चाप्‍बा?” दे सेउ पाम्‍तेक्‍म।

प्रकाश 20:10

मिनु मुर आन कली मरिम्‍शो लां शेंब दियाबलस गन्‍धक रे हुरुर पा ब्रशो मी ब्रतीकेमी हुम्‍चा पुंइसाक्‍व। मेकेर ठेयब जन्‍तु नु जोल पा परमप्रभु यावे आ लोव़ पखु पाइब यो बाक्‍ताक्‍स। मिनु मेकेर बाक्‍बपुकी नाक्‍दो नाक्‍ती गेना हना यो श्‍येत गेचा पुंइसीनीम। प्रकाश १९:२०

प्रकाश 20:7

मिनु मेको हजार का बर्स नोले सैतान पुं मपाइश्‍शो ढोडोङगा रे प्रोंइचा पुंइसाक्‍व।

प्रकाश 9:11

मेको आन के पिप का बाक्‍त। मेको पिप सु बाक्‍त देंशा हना, दुइश्‍शो, पुं मपाइश्‍शो ढोडोङगा ङा गेय पाइब बाक्‍त। मेको पिप आ नें हिब्रू लोव़मी अब्‍बादोन नु ग्रीक लोव़मी अपोल्‍लीयोन देंनीम। मेको निम्‍फा आस अर्थ चहिं खतम पाइब बाक्‍ब।