भजन संग्रह 51:14 - Sunuwar Bible

¹⁴ परमप्रभु, गे आं कली पाप रे प्रोंइब परमप्रभु बाक्‍नीनी। आं हुश ख्राक्‍श पोक्‍शो पाप रे प्रोंइयीनी। मिनु गो इन प्रोंइतीके आ पर्बम कुम्‍सो पाइनुङ।

भजन संग्रह 51:14 ပူးပေါင်းရင်းမြစ်များ

उत्पत्ती 42:22

मिनु रूबेनमी “मेको आल कली मारेइ पाप मपने, दे गो इन कली मदेंङा ङा? तन्‍न गे आं लोव़ मनेंनी। मेको कली श्‍येत गेशो हुश आ क्‍येक्‍क लेत्‍चा पुंइसाक्‍य” दे आ लोक्‍ब आन कली देंमाक्‍त। उत्‍पत्ती ३७:२१-२२

उत्पत्ती 9:6

सु सुमी मुर साइश्‍शा हुश जारबा, मेको यो मोपान साइश्‍शा, हुश जारचा पुंइसीब। मारदे हना गो मुर कली आं खोदेंशो पा सेल्‍ता। प्रस्‍थान २१:१२; लेवी २४:१७; गन्‍ती ३५:३३; मत्ती २६:५२; रोमी १३:४; प्रकाश १३:१०

२ सामुएल 12:9

गे मारदे आं लोव़ मटिवी? मारदे आं ङोंइती मरिम्‍शो पवी? गे हित्ती उरीयाह कली तरवारम क्‍योरतीवी। मिनु मेको आ मीश लाइश्‍शा, आ वोंइश कली अम्‍मोनी आन गुइम साइक्‍पाइक्‍तीवी। २सामुएल ११:-; १राजा १५:५

२ सामुएल 21:1

पिप दाऊद आ पालाम बर्स सां सम्‍म अन्‍काल दुम्‍स ङा दुम्‍स पवा बाक्‍त। मिनु दाऊदमी परमप्रभु यावे कली हिल्‍लो पवा बाक्‍त। मिनु परमप्रभु यावेमी “सावल नु आ खिं ङा मुर आन तार हुश आ दोस बाक्‍शो बाक्‍ब। मारदे हना मेकोम गिबोनी आन कली साइक्‍तु” देंमाक्‍त।

२ सामुएल 3:28

मिनु नोले दाऊदम मेको लोव़ नेंशा “गो नु आं राज्‍य परमप्रभु यावे आ ङोंइती गेनायो नेर आ तौ आब्‍नेर साइश्‍शो आ पर्बम दोस मताइब दुम्‍नीकी।

एज्रा 9:13

गोपुकीमी आंइ मरिम्‍शो पतीके नु आंइ ठेयब दोस आ पर्बम श्‍येत जशो बाक्‍तक। मो हना यो आंइ परमप्रभुमी आंइ तचा माल्‍शो क्‍येङा इच्‍का ला सजाइ गेतीनी। मिनु आंइ कली ब्रोंइचा गेतीनी।

नेहेम्‍याह 9:33

आंइ कली दुम्‍तीके, गे ठीक पशो बाक्‍नीनी। मारदे हना गे आंइ कली रिम्‍शो पाइतीनी। गोपुकीमी चहिं इन कली थम मरिम्‍शो पाइतक। दानीएल ९:५,७

भजन संग्रह 25:5

इन थमा पतीकेम आं कली गाक्‍चा, शेंदीनी। मारदे हना गे आं कली श्‍येत रे प्रोंइब परमप्रभु बाक्‍नीनी। गो नाक्‍त रे इन लां कोव़शा, बाक्‍नुङ।

भजन संग्रह 26:9

आं कली मरिम्‍शो पाइब नु हुश ख्राक्‍श पोक्‍ब नु मसाइय्‍यीनी।

भजन संग्रह 35:28

मिनु गो नाक्‍त रे इन ठीक पतीके नु इन ठेयब दुम्‍तीके आ पर्बम लोव़ पाइनुङ।

भजन संग्रह 38:22

परमप्रभु, आं कली वारच पाइश्‍शा, श्‍येत रे प्रोंइचा कली रीब पा जाक्‍कीन।

भजन संग्रह 55:23

तन्‍न परमप्रभु, गे मरिम्‍शो पाइब आन कली खतम दुम्‍तीकेमी ताइक्‍नीनी। हुश ख्राक्‍श पोक्‍ब नु जोल पाइब आन ब्रोंइतीक नाक्‍त उइक्‍थ यो मब्रोंइनीम। तन्‍न गो इन कली थमा सुइश्‍शा बाक्‍नुङ। भजन संग्रह १०२:२५

भजन संग्रह 68:20

आंइ परमप्रभु श्‍येत रे प्रोंइब बाक्‍ब। मिनु परमप्रभु यावेमी बेक्‍चा रे प्रोंइ‍ब।

भजन संग्रह 88:1

परमप्रभु यावे, आं परमप्रभु, गे आं कली श्‍येत रे प्रोंइब बाक्‍नीनी। नाक्‍दो नाक्‍त गो इन ङोंइती पुंइशो बाक्‍नुङ।

यसैया 12:2

थमा पा, परमप्रभु आं कली पाप रे प्रोंइब बाक्‍ब। गो मेको कली थमा सुइश्‍शा महिंनुङ। मारदे हना परमप्रभु यावे आं कली सक्ति नु बोल गेब बाक्‍ब। मेको आं कली श्‍येत रे प्रोंइब बाक्‍ब” दे कुम्‍सो पाइनीनी। प्रस्‍थान १५:२

यसैया 45:17

तन्‍न परमप्रभु यावेमी इस्राएल कली श्‍येत रे प्रोंइब। मेको गेना हना यो लीब श्‍येत रे प्रोंइतीकेमी बाक्‍ब। गे गेना हना यो मुने मदोक्‍थु, इन कुल मकिक्‍पाइक्‍नीनी।

इजीकीएल 33:8

मिनु गो आं अरेशो मटीब मुर आन कली ‘ए आं अरेशो मटीब मुरपुकी गे थमा पा बेक्‍नीनी’ देंनुङ, मिनु गे मेको आं अरेशो लोव़ मटीब मुर आन कली ‘इन मरिम्‍शो पशो प्रोनीन’ दे महिंपाइक्‍तीवी हना, मेको मरिम्‍शो पाइब मुर आन मरिम्‍शो पशो आ पर्बम बेक्‍नीम। तन्‍न गो मेको आन हुश आ क्‍येक्‍क इ रे पा ताक्‍नुङ।

दानीएल 9:16

परमप्रभु, इन ठीक पतीकेमी इन सहर यरूसलेम नु इन योव़शो डांडा आ पर्बम मगाइक्‍तीन, मचुरीन। आंइ पशो पाप नु आंइ किकी पिप आन मरिम्‍शो पशो आ पर्बम यरूसलेम नु इन योव़शो मुर आन नेक्‍था बाक्‍ब मुर रे पा शुक्‍शी पाइक्‍चा पुंइसीब दुम्‍तेक्‍म।

दानीएल 9:7

परमप्रभु, गे ठीक पाइब बाक्‍नीनी। गो चहिं मुने दोक्‍शो बाक्‍नीकी। मुलाक्‍ती यहूदा ङा मुर, यरूसलेममी बाक्‍ब, इस्राएली नेल्‍ल आन नेक्‍था नु ङोन रागीम खेरचा पुंइसीशो मुर नेल्‍ल इन कली प्रोंइशो आ पर्बम दोस ताइब दुम्‍तेक्‍म।

होसे 4:2

एकेर कसम जचा, जोल पचा, मुर साइक्‍चा, खुइ पचा नु तेल्‍लेम पचा ङा लाक्‍शा, अर्को मारेइ मबाक्‍ब। नेल्‍लेमी मरिम्‍शो ला पाइनीम। मेकोपुकीम मुर साइश्‍शा, हुश ख्राक्‍श पोक्‍नीम।

हबकुक 3:18

गो परमप्रभु यावे कली तुइश्‍शा ग्‍येरसी‍नुङ। मिनु आं कली श्‍येत रे प्रोंइब परमप्रभु कली ठेयब सेल्‍शा ग्‍येरसीनुङ। यसैया ६१:१०

प्रेरित 18:6

मिनु यहूदीपुकीमी आ शेंशो थमा मसुइक्‍थु शुक्‍शी पामेनु, पावलमी आ फेक्‍शो वा ङा फुरकु थुर थुर पा मेको आन कली “गे बेक्‍शा जाम्‍शा लाइतीनी हना, आं कली मारेइ देंचा मताइनीनी। मुल ङा मेरे यहूदी इन कली शेंचा प्रोंइशा, अर्को रागी ङा मुर आन कली शेंथ गाक्‍नुङ” दे मेको आन कली प्रोंइशा गाक्‍माक्‍त। प्रेरित १३:५१; नेहेम्‍याह ५:१५; प्रेरित २०:२६

प्रेरित 20:26

बेक्‍शा जाम्‍शा लाइतीनी हना यो, आं के मारेइ दोस मदुम्‍ब, इन कली थमा पा देंनुङ। इजीकीएल ३:१७-१९; प्रेरित १८:६

रोमी 10:3

परमप्रभु यावे आ ङोंइती दोपा ठीक दुम्‍चा, मेको मरुबेम। मिनु आंमा गेय पतीकेमी ठीक दुम्‍चा माल्‍तेक्‍म। मोपा परमप्रभु यावे कली थमा सुइक्‍तीके रे ठीक दुम्‍तीक मपामे। रोमी १:१७