भजन संग्रह 43:2 - Sunuwar Bible

² परमप्रभु, गे आं कली प्रोंइब बोल्‍यो दरवार बाक्‍नीनी। गे आं कली मारदे प्रोंइयीनी? गो मारदे आं जोरी सत्रुम खेदा पचा पुंइसीशा, रोंका पचा माल्‍ङा?

भजन संग्रह 43:2 ပူးပေါင်းရင်းမြစ်များ

१ इतिहास 28:9

आं तौ सोलोमन, इ आफ आ परमप्रभु कली तुइश्‍शा मालो। इ थुं नेल्‍लेमी ग्‍येरशा मेको आ नोले खोतो। मारदे हना परमप्रभु यावेमी इ थुं कोव़ना कोव़न, इन मिम्‍शो नु पशो नेल्‍ल तुइक्‍ब। गे मेको कली माल्‍तीवी हना, गे थित्‍नेवे। तन्‍न गे मेको कली प्रोंइतीवी हना, इ कली गेना हना यो कली प्रोंइब। येरमीया २९:१३-१४; १राजा ११:३१,३३

भजन संग्रह 140:7

परमप्रभु यावे, आं परमप्रभु, गे इन सक्तिमी आं कली प्रोंइनीनी। लडाइ दुम्‍मेनु, गे आं कली प्रोंइनीनी।

भजन संग्रह 28:7

परमप्रभु यावे आं सक्ति नु आं तेक्‍तीके बाक्‍ब। गो मेको कली थमा सुइक्‍ता। मोपा आं कली वारच पाइक्‍ती। मोपतीके गो थाम्‍पा ग्‍येरसीशो बाक्‍नुङ। गो आं कुम्‍सोमी मेको कली ठेयब सेल्‍नुङ।

भजन संग्रह 31:4

मेकोपुकीमी आं कली मतचा ङा पा ब्‍वारद दाइक्‍ताक्‍म। आं कली प्रोंइयीनी। मारदे हना गे आं सक्ति बाक्‍नीनी।

भजन संग्रह 42:10

आं कली दिप्‍बपुकीमी आं रुश जिक्‍शो खोदेंशो पा शुक्‍शी पाइनीम। मिनु मेकोपुकीमी गेना हना यो “इ परमप्रभु ते बाक्‍मे” दे शुक्‍शी पा, हिल्‍लो पस ङा पस बाक्‍नीम।

भजन संग्रह 42:9

गो परमप्रभु, आं सेरथे फुल्‍लु कली “गे मारदे आं कली प्रेंदीनी? गो मारदे आं जोरी सत्रु रे पा खेदा पचा पुंइसीशा, थुं ग्‍येत्‍थ लुक्‍च दुम्‍शा, गाक्‍चा माल्‍ङा?” देंती। ब्‍यवस्‍था ३२:४

भजन संग्रह 44:9

तन्‍न गे आंइ कली प्रोंइशा, श्‍येत जपाइक्‍तीनी। मिनु गे आंइ लडाइ पाइब नु मलनी।

भजन संग्रह 71:9

गो खूशो दुम्‍ङानु, आं कली मप्रोंइयीनी। आं सक्ति जाम्‍मेनु यो आं कली मप्रोंइयीनी।

भजन संग्रह 77:7

मार, परमप्रभुमी गेनायो आं कली मब्राइबा? मिनु मेकोमी गेनायो शिशी मपाइबा?

भजन संग्रह 88:15

गो ठिटा रेन श्‍येत जशा, बेक्‍चा चिक्‍शो बाक्‍नुङ। इन हिंच कोंइशोमी गो श्‍येत जशो बाक्‍नुङ। मिनु आं थुं लुक्‍च लशो बाक्‍ब।

भजन संग्रह 94:14

मारदे हना परमप्रभु यावेमी आ मुर आन कली मप्रोंइब। मिनु आ योव़शो रागी यो मप्रोंइब। यसैया ३७:३३-३५

प्रस्‍थान 15:2

यावे आं सक्ति बाक्‍ब। आं कली कुम्‍सो पपाइक्‍ब। मारदे हना आं कली आ जोरी सत्रु रे प्रोंइती। मेको आं परमप्रभु बाक्‍ब। मिनु गो मेको कली ठेयब सेल्‍नुङ। परमप्रभु आं आफ आ परमप्रभु बाक्‍ब। मिनु गो मेको कली मान पाइनुङ। भजन संग्रह ११८:१४; यसैया १२:२

यसैया 40:31

तन्‍न परमप्रभु यावे आ लां कोव़बपुकी नक सक्ति ताइनीम। ककाकुली खोदेंशो पा आन फ्रां प्राक्‍शा बेरशा ग्‍येत्‍थ लाइनीम। मेकोपुकी दोरशा, मदाइनीम। गाक्‍शा यो मथाइनीम” देंत। भजन संग्रह १०३:५

यसैया 45:24

‘परमप्रभु यावे ला ठीक पतीके नु सक्ति गेब बाक्‍ब’ दे कसम जाइनीम। परमप्रभु यावे कली मटीब नेल्‍ल आं बाक्‍तीकेम जाक्‍शा मुने दोक्‍चा माल्‍नीम। येरमीया २३:६

जकरिया 10:12

गो मेको आन कली परमप्रभु यावे कली थमा सुइक्‍तीकेम बोल्‍यो सेल्‍नुङ। मिनु मेकोपुकी मेको आं नेंम गाक्‍नीम” दे परमप्रभु यावेमी देंत।

एफिसी 6:10

मिनु आं नोले ङा लोव़, प्रभु कली तुइश्‍शा सक्ति पाइश्‍शो मुर दुमीन। मोपा प्रभु आ सक्तिमी बोल्‍यो दुम्‍शा बाक्‍कीन। एफिसी ३:१६; १कोरिन्‍थी १६:१३; २तिमोथी २:१; १यूहन्‍ना २:१४

फिलिप्‍पी 4:13

आं कली सक्ति गेब आ नेंमी गो नेल्‍ल पने चाप्‍नुङ। २कोरिन्‍थी १२:१०