भजन संग्रह 106:41 - Sunuwar Bible

⁴¹ मिनु मेकोमी मेको आन कली रागी रागी ङा मुर आन गुइम गेमी बाक्‍त। मिनु मेको आन जोरी सत्रुम मेको आन कली सासन पामे बाक्‍त। न्‍यायाधीस २:१४

भजन संग्रह 106:41 ပူးပေါင်းရင်းမြစ်များ

न्‍यायाधीस 2:14

मिनु परमप्रभु यावेमी इस्राएली आन पर्बम गाइश्‍शा, मेको आन कली रोइक्‍ब आन गुइमी गेमी बाक्‍त। मिनु मेकोपुकीमी मेको आन मारेइ मारेइ रोइक्‍तमे बाक्‍त। मिनु मेकोमी मेको आन कली आन नेक्‍था बाक्‍ब जोरी सत्रु आन हुकुममी बाक्‍चा गेमे बाक्‍त।। मोपा इस्राएलीपुकीमी आन जोरी सत्रु आन कली ग्राने मचाप्‍बमे बाक्‍त।

न्‍यायाधीस 3:12

मिनु इस्राएलीपुकीमी लेंशा परमप्रभु यावे आ ङोंइती मार मरिम्‍शो बाक्‍मे, मेको पामे बाक्‍त। मिनु मेको आन मरिम्‍शो पशो आ पर्बम परमप्रभु यावेमी मोआब ङा पिप एग्‍लोन कली इस्राएली क्‍येङा बोल्‍यो सेला बाक्‍त।

न्‍यायाधीस 3:8

मिनु परमप्रभु यावेमी इस्राएली आन कली तशा गाइक्‍ता बाक्‍त। मिनु मेसोपोटामीया ङा अराम-नहाराइम ङा पिप कुशन-रिशातैम आ गुइमी लेयङा बाक्‍त। मेकोम इस्राएली आन कली ८ बर्स सम्‍म सासन पवा बाक्‍त।

ब्‍यवस्‍था 32:30

मेको आन सेरथे फुल्‍लुम मेको आन कली लेयने थुम्‍शो बाक्‍ब। परमप्रभु यावेमी मेको आन कली प्रोंइने थुम्‍शो बाक्‍ब। मोपतीके मुर कामी हजार का आन कली खेदा पाप्‍तु। मुर निक्‍शीमी १० हजार आन कली खेदा पने चाप्‍नीसी। लेवी २६:३६-३७; यसैया ३०:१७

ब्‍यवस्‍था 28:48

मोपतीके परमप्रभु यावेमी इन कली जोरी सत्रु सोइक्‍ब। गेपुकी शोव़लु बेक्‍शा नु तूतू दाक्‍ना दाक्‍न, फेक्‍चा मतथु नु मारेइ मगाप्‍शो दुम्‍शा, मेको आन गेय पचा माल्‍नीनी। मिनु मेकोमी इन कली मक्‍याम्‍दमे सम्‍म फलम के हलो इन तारी वोइक्‍नीम। येरमीया २८:१३-१४

ब्‍यवस्‍था 28:33

इन मतुइश्‍शो मुरपुकीमी इन रू ङा ख्रुम्‍शो जाइनीम। मिनु गेपुकी गेना हना यो श्‍येत जचा नु दिप्‍चा पुंइसीनीनी। न्‍यायाधीस ६:३

ब्‍यवस्‍था 28:29

मिनु मिक्‍च मताइबमी एर ओंथ सुल्‍ना सुल्‍न गाक्‍शो खोदेंशो पा गेपुकी नाक्‍तीन सुल्‍शा गाक्‍नीनी। मिनु गेपुकीमी मार पाइतीनी हना यो, रिम्‍शो मदुम्‍नीनी। मिनु गेपुकी नाक्‍त किंत किंत तुप्‍चा नु रोइक्‍चा पुंइसीशा बाक्‍नीनी। सुइमी इन कली वारच मपाइब। यसैया ५९:१०

ब्‍यवस्‍था 28:25

मिनु परमप्रभु यावेमी इन कली इन जोरी सत्रु आन ङोंइती ब्रुपाइक्‍ब। गेपुकी मेकोपुकी नु लडाइ पथ लां कामी लाइनीनी, मिनु ब्रुशा शाउ शिउ ब्रशा ७ ओटा लां रे प्रोक्‍चा माल्‍नीनी। मिनु राज्‍य राज्‍य ङा मुर नेल्‍ल आन ङोंइती ग्रांग्रा दिशो दुम्‍नीनी।

न्‍यायाधीस 3:14

इस्राएलीपुकी १८ बर्स सम्‍म मोआब ङा पिप एग्‍लोन आ सासनमी बाक्‍मा बाक्‍त।

न्‍यायाधीस 15:11

मिनु यहूदा ङा हजार सां मुर एताम ङा रोंगु ङा पुक्‍खीमी यिमा बाक्‍त। मिनु मेकोपुकीमी सिम्‍सोन कली “पलिस्‍तीपुकी आंइ सासन पाइब बाक्‍नीम, दे गे तुइक्‍नीनी। गे मारदे आंइ कली मोदेंशो पा मरिम्‍शो पनी?” देंमा बाक्‍त। मिनु सिम्‍सोनमी “मेकोपुकीमी आं कली दोदेंशो पामे, गो यो में मोदेंशो ला पाता” देंमाक्‍त।

२ सामुएल 24:14

मिनु दाऊदम गाद कली “गो शुश श्‍येत जशो बाक्‍नुङ। आंइ कली परमप्रभु यावे आ गुइम दुम्‍चान रिम्‍शो बाक्‍ब। मारदे हना आ शिशी ठेयब बाक्‍ब। गो मुर आन गुइम मदुम्‍ङल” देंमाक्‍त।

इजीकीएल 16:27

मोपतीके गो इ कली सजाइ गेतन। गो इ कली शुश जचा थोव़क मगेथु, इ जोरी सत्रु आन गुइम गेतन। गो इ कली पलिस्‍ती आन दाक्‍शो सिखार दुम्‍पाइक्‍चा कली गेतामी। पलिस्‍ती आन तमीपुकी इ मरिम्‍शो पशो तशा मुने पाम्‍तेक्‍म।