हितोपदेस 16:2 - Sunuwar Bible

² आंमा पशो गेय आंमा कली ठीक मिम्‍सीब। तन्‍न परमप्रभु यावेमी मुर आन थुं नाक्‍ब।

हितोपदेस 16:2 ပူးပေါင်းရင်းမြစ်များ

भजन संग्रह 36:2

मेकोपुकी ठेयब लेश्‍शा “आंइ मरिम्‍शो पशो गेनायो मतुंइसीब, गो दोस मताइनय” दे मिम्‍नीम। रोमी ३:१८

हितोपदेस 12:15

मूर्खपुकी आंम लां नेल्‍ले “ठीक बाक्‍ब” दे मिम्‍नीम। तन्‍न जोक्‍ब तुइक्‍बमी अर्ती नेंनीम।

हितोपदेस 16:25

मुरुमी का निक्‍शी लां रिम्‍शो बाक्‍ब, दे मिम्‍‍नीम। तन्‍न नोले मेको लां बेक्‍‍तीक लां बाक्‍ब।

हितोपदेस 17:3

सुन चांदी यपाइश्‍शा नाक्‍चा कली ग्‍योंब नु मी माल्‍ब। तन्‍न परमप्रभु यावेमी मुर आन थुं नाक्‍ब भजन संग्रह ६६:१०

हितोपदेस 21:2

मुरुमी आंम कली गेना हना यो “ठीक पाता” दे मिम्‍नीम। तन्‍न परमप्रभु यावेमी मुर आन थुं नाक्‍ब।

हितोपदेस 24:12

मिनु गे “गो मेको मतुइक्‍तु” देंते हना, थुं नाक्‍‍बम इ मरिम्‍शो पशो तुइक्‍ब। इ कली कोव़बमी नेल्‍ल तुइक्‍ब। मेकोमी मुर आ मरिम्‍शो पशो ङा क्‍येक्‍क लेप्‍ब।

हितोपदेस 30:12

का निक्‍शी मुरुमी आंम कली “गो गेना हना यो रिम्‍शो पाइब मुर नङ” देंनीम। तन्‍न मेको आन मरिम्‍शो पशो मक्‍याम्‍सीशो बाक्‍ब। हितोपदेस २०:९

हितोपदेस 5:21

मारदे हना परमप्रभु यावेमी मुर आ पशो नेल्‍ल ताइब। मेकोमी मुर आन लां नाक्‍ब।

यसैया 26:7

ठीक निसाफ पाइब आ लां ग्‍येत्‍थ बाक्‍ब। गे ठीक पाइब आ लां थेल्‍तीनी।

येरमीया 17:10

गो, परमप्रभु यावेमी मुर आन कली नाक्‍नुङ। आन थुंम मार बाक्‍मे, मेको कोव़नुङ। आन गाक्‍शो लां नु आन पशो कोव़शा, इनाम गेनुङमी।

दानीएल 5:27

टेकेल आ अर्थ ‘गे नाक्‍तीकेम नाक्‍चा पुंइसीशा, सोपी दुम्‍तीनी’ देंशो बाक्‍ब।

गन्‍ती 22:32

मिनु मेको परमप्रभु यावे आ स्‍वर्ग ङा गेय पाइबमी मेको कली “मारदे इ गधा कली खेयप सां तुबी? कोव़ङो, गो इ लां तेक्‍चा कली जाक्‍शो बाक्‍नुङ। मारदे हना गे आं ङोंइती इ द‍ला दाक्‍स पाप्‍तीवी।

लूका 16:15

मिनु येसुमी “मुर आन कली ‘गो ठीक नकी’ देंखु पा कोंइनीनी। मिनु मुरपुकीमी इन कली ठेयब सेल्‍नीम। परमप्रभु यावेमी चहिं इन मिम्‍शो नेल्‍ल तुइक्‍ब। मुर आन दातेमी हिक्‍सीशो नेल्‍ले परमप्रभु यावे आ ङोंइती थम आइक्‍च दुम्‍नीम। लूका १८:९-१४

प्रकाश 2:18

मिनु परमप्रभु यावे आ तौमी आं कली थिआटीरा सहर ङा थमा सुइक्‍ब आन शेंब कली ब्रेक्‍पाइक्‍ती। एको आ मिक्‍च हुरुर पा ब्रशो मी खोदेंशो तांइसीशो नु आ खोइली याप्‍पाइश्‍शो टल्‍केशो कांसा खोदेंशो तांइसीशो आ लोव़ बाक्‍ब। प्रेरित १६:१४; प्रकाश १:१४-१५

प्रकाश 2:23

आ आल आन कली मुर साइक्‍ब रोइम साइक्‍नुङमी। मेको आन श्‍येत जशा, बेक्‍शो तशा ‘गोम पाप्‍तु’ दे थमा सुइक्‍ब नेल्‍लेमी तुइक्‍नीमी। मिनु थमा सुइक्‍ब आन ग्रुम्‍तीके ङा मुर नेल्‍लेमी ‘येसु ख्रीस्‍तमी मुर आन थुं नु आन पशो तुइक्‍ब। मिनु नोले दोपा पामे, मोपा गेब’ दे तुइक्‍नीम। भजन संग्रह ७:१०; येरमीया १७:१०

न्‍यायाधीस 17:6

मेना इस्राएल रागीमी पिप मबाक्‍मा बाक्‍त। मोपतीके सुम मार पचा दाक्‍मा, मेको पाइक्‍बाक्‍मा बाक्‍त। न्‍यायाधीस १८:१; न्‍यायाधीस १९:१; न्‍यायाधीस २१:२५

न्‍यायाधीस 7:6

मिनु कुचुम खोदेंशो पा ब्‍वाक्‍कु तुक्‍शा तूबपुकी सहे सां दुम्‍मा बाक्‍त। मिनु अरु नेल्‍लेमी पोक्‍च थेक्‍शा आन गुइमी तूङमे बाक्‍त।

१ सामुएल 16:7

तन्‍न परमप्रभु यावेम मेको कली “मेको दारशो नु लाइश्‍शो बाक्‍त हना यो, मेको कली ममिम्‍तो। गो मेको कली पिप मसेल्‍नुङ। गो, परमप्रभु यावेम मुरुम खोदेंशो पा मकोव़नुङ। मुरुम रां दारशो कोव़शा मिम्‍नीम। गो मुर आ थुं कोव़नुङ” देंमाक्‍त। येरमीया १७:१०; प्रकाश २:२३; प्रेरित १०:३४

१ सामुएल 2:3

ठेयब लेश्‍शो लोव़ नु मरिम्‍शो लोव़ पचा प्रोनीन। मारदे हना परमप्रभु यावे नेल्‍ल जोक्‍ब तुइक्‍ब बाक्‍ब। मेकोमी मुर आन पतीके नु लोव़ नेल्‍ले नाक्‍ब।