गन्‍ती 6:20 - Sunuwar Bible

²⁰ मिनु चढ़ेबमी मेको कली क्‍युक्‍शा परमप्रभु यावे आ ङोंइती क्‍युक्‍शा चढ़ेतीक चढ़ेचा माल्‍ब। मिनु क्‍युक्‍शा चढ़ेशो, कुथ्रु नु फिला चढ़ेब आ भाग दुम्‍ब। मेको नोले मेको नाजिरीमी अङगुर शांबु तूतु हना दुम्‍ब। प्रस्‍थान २९:२३,२४,२७

गन्‍ती 6:20 ပူးပေါင်းရင်းမြစ်များ

उपदेसक 9:7

आंम इ लां गाक्‍को, इ जतीक थोव़क ग्‍येरशा जावो। ग्‍येरशा इ अङगुर शांबु तूङो। मारदे हना परमप्रभुमी इ पशो गेय दाक्‍ब। उपदेसक २:२४

यसैया 25:6

मिनु मुर नेल्‍ल आन परमप्रभु यावेमी सियोन डांडामी रागी नेल्‍ल ङा मुर आन कली थम ठेयब भोज का सेल्‍ब। ब्रोव़शो नु चोक्‍शो अङगुर शांबु नु ब्रोव़शो जचा थोव़क के भोज गेब। मत्ती २२:२-४

यसैया 35:10

परमप्रभु यावेमी श्‍येत रे प्रोंइशो मुर ला लेश्‍शा जाक्‍नीम। मिनु सियोनमी कुम्‍सो पना पन ओव़नीम। मेकोपुकी गेना हना यो ग्‍येरसीशा बाक्‍नीम। ग्‍येरसीना सीन बाक्‍नीम। आन श्‍येत जशा, हुक‍यी पतीके लेश्‍शा मजाक्‍ब। यसैया ५१:११; प्रकाश २१:४

लेवी 10:15

मिनु हिम्‍शो फिला, क्‍युक्‍शो कुथ्रु नु मीम चोशा चढ़ेशो मार मार आन बोंसो परमप्रभु यावे आ ङोंइती हिम्‍शा चढ़ेचा कली चाक्‍चा माल्‍नीनी। मिनु परमप्रभु यावेमी अरेशो खोदेंशो पा गेना हना यो, गे नु इ तमी तौ इन भाग दुम्‍ब” देंत। लेवी ९:२०-२१

लेवी 23:11

मेकोमी अन्‍न मुठा परमप्रभु यावे आ ङोंइती क्‍युक्‍शा हिम्‍चा माल्‍ब। मो पाइतीनी हना परमप्रभु यावेमी इन कली ब्राइब। नाइक्‍तीक नाक्‍ती आ दीसा चढ़ेबमी मेको क्‍युक्‍शा हिम्‍चा माल्‍ब।

लेवी 7:30

मेकोमी परमप्रभु यावे कली मीम चोशा चढ़ेचा कली बोंसो नु कुथ्रु चाक्‍चा माल्‍ब। मिनु मेको कुथ्रु परमप्रभु यावे कली क्‍युक्‍शा चढ़ेतीक चढ़ेचा माल्‍ब। प्रस्‍थान २९:२४

लेवी 7:31

मिनु चढ़ेबमी मेको बोंसो कली मीम चोचा माल्‍ब। तन्‍न मेको कुथ्रु हारून नु आ तौ आन के दुम्‍ब।

लेवी 7:32

मिनु इन दुशा बाक्‍चा आ पर्बम चढ़ेतीके रे आ ग्‍युरा फिला चढ़ेब कली क्‍युक्‍शा चढ़ेचा कली गेचा माल्‍नीनी। लेवी ९:२१

लेवी 7:34

मारदे हना गो इस्राएली आन “गे रिम्‍शो पाइब बाक्‍नीनी” दे ठेयब सेल्‍शा चढ़ेशो कुथ्रु नु ग्‍युरा फिला गेपुकी रे ताक्‍शा चढ़ेब हारून नु मेको आ तौ आन कली गेना हना यो कली गेतामी’ दे माइक्‍मी।

लेवी 9:21

मिनु मोसाम अरेशो खोदेंशो पा हारूनमी कुथ्रु नु ग्‍युरा फिला चहिं परमप्रभु यावे आ ङोंइती क्‍युक्‍शा हिम्‍शा चढ़ेतीके चढ़ेप्‍तु। लेवी ७:३०-३४;

जकरिया 10:7

मिनु एफ्राइम आ खिं ङा मुर लडाइ पाइब खोदेंशो पा बोल्‍यो दुम्‍नीम। अङगुर शांबु तूशो खोदेंशो पा ग्‍येरसीनीम। आन आलपुकीम मेको तशा शुश ग्‍येरसीनीम। मेकोपुकीमी ‘गो परमप्रभु यावे आ मुर नय’ दे शुश ग्‍येरसीनीम।

जकरिया 9:15

मुर नेल्‍ल आन परमप्रभु यावेमी मेको आन कली राइश्‍शा प्रोंइब। मेकोमी आन जोरी सत्रु आन कली खतम पोक्‍ब। मेकोपुकीमी आन हुश अङगुर शांबु खोदेंशो पा तूनी‍म। मेकोपुकी चढ़ेतीक ङा हुश कुर पतीक बोस खोदेंशो पा ब्रीशो बाक्‍नीम। चढ़ेतीक आ एर ओंथ कुना कुना मेर फ्रशो हुश खोदेंशो बाक्‍नीम।

जकरिया 9:17

मेको आ दाक्‍तीके नु आ शिशी पतीके थम ठेयब बाक्‍ब। वोंइश आल ग्रेल्‍शो अन्‍न खोदेंशो पा शुश दुम्‍नीम। मीश आल नक अङगुर शांबु खोदेंशो पा दारशो दुम्‍नीम।

गन्‍ती 18:18

तन्‍न आन श्‍ये इ केन बाक्‍ब। मेको क्‍युक्‍शा चढ़ेशो कुथ्रु नु ग्‍युरा फिला खोदेंशो पा इ केन बाक्‍ब।

गन्‍ती 5:25

मिनु चढ़ेबमी मेको रुश पतीक आ पर्बम चढ़ेशो अन्‍न मेको मीश मुर आ गुइ रे लाइश्‍शा, परमप्रभु यावे आ ङोंइती क्‍युक्‍शा, चढ़ेतीकेम चाक्‍चा माल्‍ब।

गन्‍ती 6:21

मिनु कसम जशो नाजिरी कली अरेशो लोव़ मार बाक्‍ब देंशा हना, आ परमप्रभु यावे कली चढ़ेशो नाजिरी आ कसम जशो खोदेंशो बाक्‍चा माल्‍ब। आ चाप्‍शो तेम्‍ने चाप्‍ब। आ कसम जशो गारचा माल्‍ब। मिनु आ जिम्‍मा ङा अरेशो लोव़ नेल्‍ल गारचा माल्‍ब’ देनो” देंत।

मत्ती 26:29

मुल ङा मेरे एको अङगुर रस मतूनुङ, नोले नेल्‍ल नक दुम्‍शा, आं आफ आ राज्‍यमी गेपुकी नु काथा बाक्‍शा ला तूनुङ, दे इन कली देंनुङ” दे माइक्‍तीमी। भजन संग्रह ११३:-११८:-

मर्कूस 14:25

नोफा दाइश्‍शा नेनीन, मुल ङा मेरे एको अङगुर रे सेल्‍शो तूतीके मतूनुङ। नोले नेल्‍ल नक दुम्‍शा, परमप्रभु यावे आ राज्‍यमी बाक्‍शा तूनुङ” दे माइक्‍मी बाक्‍त।

यूहन्‍ना 19:30

मिनु येसुमी युप्‍शा “मुल थुम्‍ता” देंत। मिनु आ पिया खुक्‍शा बेक्‍त।