गन्‍ती 18:15 - Sunuwar Bible

¹⁵ मिनु परमप्रभु यावे कली चढ़ेशो, मुर आन ङोंइती जरमेशो, बी ब्‍यफ क्‍यारश भेडा आन ङोंइती जरमेशो नेल्‍ल इ केन बाक्‍नीम। मो दुम्‍त हना यो, गे मुर आ ङोंइती जरमेशो कली प्रोंइचा माल्‍नेवे। ग्रांग्रा दिशो बस्‍तु भाव आन ङोंइती जरमेशो यो प्रोंइचा माल्‍नेवे। प्रस्‍थान १३:२; प्रस्‍थान ३४:१९-२०

गन्‍ती 18:15 ပူးပေါင်းရင်းမြစ်များ

२ राजा 12:5

चढ़ेबपुकीमी मेको क्‍येट मुर रे ताक्‍चा माल्‍नीम। मिनु परमप्रभु यावे आ खिं ङा बिग्रेशो मार मार बाक्‍मा, मेको सेल्‍पाइक्‍चा माल्‍नीम” देंमाक्‍त।

नेहेम्‍याह 10:37

मिनु आंइ नि‍शो फस ङा नेल्‍ल क्‍येङा ङोंइती ङा भाग, अन्‍न चढ़ेतीके, मार मार रवा आन फल, अङगुर शांबु नु तेल चढ़ेब आन कली गेचा, दे परमप्रभु आ खिं ङा वोइक्‍तीक कोठाम चाक्‍नीकी। मोदेंशो पा लेवी नेल्‍लेम रागी ङा १० भाग ङा भाग का ताइनीम। मेको लेवीपुकीमी आंइ गेय पतीक सहर जाक्‍शा, १० भाग ङा भाग का पोक्‍चा माल्‍नीम। गन्‍ती १५:२०-२१; गन्‍ती १८:२१

प्रस्‍थान 13:15

‘फाराओम इं कली काइ लचा मगेतीके, परमप्रभु यावेमी इजीप्‍त रागी ङा मुर आन ङोंइती जरमेशो तौ नु बस्‍तु भाव आन दाते ङा ङोंइती जरमेशो नेल्‍ल साइक्‍तु। मोपतीके ङोंइती जरमेशो बोहोर बोका परमप्रभु यावे कली चढ़ेनीकी। तन्‍न ङोंइती जरमेशो तौ आ पा ङा क्‍येट गेशा प्रोंइनीकी।

प्रस्‍थान 13:2

“इस्राएलीपुकी, इन ङोंइती जरमेशो तौ नु इन बी ब्‍यफ, क्‍यारश भेडा आन ङोंइती जरमेशो बोहोर बोका योव़शा गेयीनी। मारदे हना मेको आं के बाक्‍नीम, दे मुर आन कली देंचा माल्‍ब” देंत। प्रस्‍थान १३:१२,१३; प्रस्‍थान २२:२८

प्रस्‍थान 22:29

गे इन रू ङा ङोंइती मीशो मारेइ मारेइ नु अङगुर रस चढ़ेचा मरिम्‍दीन। मिनु इन ङोंइती जरमेशो तौपुकी आं कली गेचा माल्‍नीनी। प्रस्‍थान २३:१९; ब्‍यवस्‍था १८:४; हितोपदेस ३:९-१०; प्रेरित १३:२,१३

प्रस्‍थान 34:20

ङोंइती जरमेशो गधा आ बोहोर आ पा ङा पाठा का गेशा प्रोंइचा माल्‍नीनी। मो मपाइनीनी हना, आ शुर जिक्‍शा, साइक्‍चा माल्‍नीनी। इन ङोंइती जरमेशो तौ आ पा ङा क्‍येट गेशा प्रोंइचा माल्‍नीनी। आं ङोंइती सुइ श्‍येत्‍थ गुइ मजाक्‍कीन। प्रस्‍थान १३:१२-१६

गन्‍ती 18:16

मेको आन कली प्रोंइतीक क्‍येट महिना का गाप्‍शो कली चांदी के ५ शेकेल ताक्‍चा माल्‍नेवे। मेको ताम्‍बु ङा शेकेल बाक्‍चा माल्‍नीम। मेको ताम्‍बु ङा शेकेल का २० गेराह ङा बाक्‍ब। गेराह का ०.६ ग्राम बाक्‍ब। ताम्‍बु ङा शेकेल का १२ ग्राम ङा क्‍येट बाक्‍ब। लेवी २७:६,२७

गन्‍ती 3:13

ङोंइती जरमेशो नेल्‍ल आं के बाक्‍नीम। इजीप्‍तमी ङोंइती जरमेशो नेल्‍ल सदुमी नाक्‍ती, गो इस्राएली आन ङोंइती जरमेशो आं कली वोंइसाक्‍यी। मिनु गो मुर नु बी ब्‍यफ, क्‍यारश भेडा नेल्‍ल आं कली वोंइसाक्‍यी। मेको आं के बाक्‍नीम। गो परमप्रभु यावे नङ” देंत।

गन्‍ती 3:46

मिनु लेवी आन क्‍येङा शुश दुम्‍शो इस्राएली आन ङोंइती जरमेशो तौ सहे निक्‍शी ७३ जना बाक्‍तेक्‍म। मेको आन कली प्रोंइचा माल्‍बाक्‍त।

ब्‍यवस्‍था 15:19

इन बी ब्‍यफ आ ङोंइती जरमेशो बाछा नु इन क्‍यारश भेडा आ ङोंइती जरमेशो पाठा परमप्रभु यावे, इन परमप्रभु कली गेचा माल्‍नीनी। इन ङोंइती जरमेशो ब्‍यफ लाइश्‍शा गेय मपचा। ङोंइती जरमेशो सांड आन कली ऊन मप्रेक्‍चा। प्रस्‍थान १३:२,१३-१६