नेहेम्‍याह 9:5 - Sunuwar Bible

⁵ मिनु लेवी येशुआ, कदमीएल, बानी, हशाब्‍नैयाह, शेरेब्‍याह, होदीयाह, शेबान्‍याह नु पेथायाहमी मुर आन कली “बोक्‍कीन, गेना हना यो बाक्‍ब परमप्रभु यावे, इन परमप्रभु कली ठेयब सेलीन। ‘इन नें ठेयब बाक्‍ब। नेल्‍ल आन ठेयब सेल्‍तीके आन क्‍येङा इन नें ठेयब सेल्‍चा पुंइसीशो बाक्‍ब’ देंचा माल्‍नीनी” देंतेक्‍म।

नेहेम्‍याह 9:5 ပူးပေါင်းရင်းမြစ်များ

१ राजा 8:14

मिनु पिपमी लेश्‍शा कोव़शा, इस्राएल ङा बुक्‍शो मुर नेल्‍ल आन कली आसीक गेमी बाक्‍त। मेना मेकोपुकी चहिं राप्‍शो बाक्‍मा बाक्‍त।

१ राजा 8:15

मिनु मेकोमी “परमप्रभु यावे, इस्राएली आन परमप्रभु ठेयब बाक्‍ल। मेकोमी आं आफ दाऊद नु कबल पा, मुल मेको खाप्‍तु।

१ राजा 8:22

मिनु सोलोमनम इस्राएल ङा बुक्‍शो मुर नेल्‍ल आन दातेम परमप्रभु यावे कली चढ़ेतीक आ ङोंइती राप्‍शा, आ गुइ सरीङ गे क्‍युक्‍गा बाक्‍त।

१ राजा 8:27

मेकोमी “मार, थमा पा परमप्रभु रागीम बाक्‍बा ङा? कोव़ङीन, इर ङा ठेयब सरीङम ला यो गे मरिक्‍नीनी हना, एको आं सेल्‍शो खिंम दोपा रिक्‍नीनी ङा? यसैया ६६:१; प्रेरित १७:२४

१ इतिहास 16:36

परमप्रभु यावे, इस्राएली आन परमप्रभु गेना हना यो ठेयब बाक्‍ब। गेना हना यो मोदेंशो बाक्‍ब” दे कुम्‍सो पवा बाक्‍त। मिनु नोले मुर नेल्‍लेमी “आमेन” देंशा, परमप्रभु यावे कली ठेयब सेल्‍मे बाक्‍त। भजन संग्रह ४१:१४

१ इतिहास 29:11

परमप्रभु यावे, नेल्‍ल क्‍येङा ठेयब दुम्‍तीके, सक्ति, छेङछेङ, ग्रातीके नु मान तचा पुंइसीतीके नेल्‍ल इन के बाक्‍नीम। मारदे हना रागी नु सरीङम बाक्‍शो मारेइ मारेइ इन के नम। परमप्रभु यावे, मेको राज्‍य इन के बाक्‍ब। गे नेल्‍ल क्‍येङा ठेयब बाक्‍नीनी। प्रकाश ४:११;५:१३

१ इतिहास 29:13

मुल आंइ परमप्रभु, गो इन कली ‘गे रिम्‍शो पाइब बाक्‍नीनी’ दे इन नें ठेयब सेल्‍नीकी।

१ इतिहास 29:20

मिनु नोले दाऊदमी मुर नेल्‍ल आन कली “परमप्रभु यावे, इन परमप्रभु कली ठेयब सेलीन” देंमाक्‍त। मिनु मुर नेल्‍लेमी परमप्रभु यावे, आन किकी पिप आन परमप्रभु कली ठेयब सेल्‍शा बाम्‍मा बाक्‍त। मिनु परमप्रभु यावे नु पिप आ ङोंइती बाप्‍शा, सेउ पामे बाक्‍त।

२ इतिहास 20:13

मिनु यहूदा ङा मुर नेल्‍ले, मेको आन मीशपुकी, आन आल ब्रेप्‍च नेल्‍ल परमप्रभु यावे आ ङोंइती राम्‍मा बाक्‍त।

२ इतिहास 20:19

मिनु लेवी, कोहाथ नु कोराह आन मुर बोक्‍शा परमप्रभु यावे, इस्राएली आन परमप्रभु कली ठेयब सेंदा पा ठेयब सेल्‍तीक कुम्‍सो पामे बाक्‍त।

एज्रा 3:11

मिनु मेकोपुकीमी पालो पालो पा कुम्‍सो पाम्‍तेक्‍म। परमप्रभु यावे कली ठेयब सेल्‍ना सेल्‍न “गे रिम्‍शो पाइब बाक्‍नीनी” दे मान पा कुम्‍सो पाम्‍तेक्‍म। मेकोपुकीमी “परमप्रभु यावे रिम्‍शो पाइब बाक्‍ब, नु आ गेना हना यो दाक्‍तीक इस्राएली नु ली‍ब” दे कुम्‍सो पाम्‍तेक्‍म। परमप्रभु यावे आ खिं ङा जग वोइश्‍शो बाक्‍तीके मुर नेल्‍लेमी ठेयब सेंदा पा परमप्रभु यावे कली ठेयब सेल्‍तेक्‍म। २इतिहास ५:१३; भजन संग्रह ११८:१

नेहेम्‍याह 9:4

येशुआ, बानी, कदमीएल, शेबान्‍याह, बुन्‍नी, शेरेब्‍याह, बानी नु केनानी लेवी आन शी के सेल्‍शो राप्‍तीके ङा क्रेसीमी बाक्‍‍शा, ठेयब सेंदामी परमप्रभु यावे, आन परमप्रभु कली लोव़ पाम्‍तेक्‍म।

नेहेम्‍याह 9:6

मिनु एज्रामी “गे का ला परमप्रभु यावे बाक्‍नीनी। गे सरीङ सेल्‍तीनी। स्‍वर्ग नु मेकेर बाक्‍ब नेल्‍ल सेल्‍तीनी। गे रागी नु मेकेर ङा मारेइ मारेइ, समुन्‍द्र नु मेकेर ङा मारेइ मारेइ आन कली सेल्‍तीनी। मिनु मेको नेल्‍ल कली ब्रोंइचा गेतीनी। मिनु स्‍वर्ग ङा गेय पाइबपुकीमी इन कली ठेयब सेल्‍नीम।

अय्‍युब 1:21

“गो आं ममा आ कोव़ज रे शिश्रा यिती। शिश्रा लेश्‍शा लाइनुङ। गो ते रे श्‍येत्‍थी जाक्‍ङा, मेकेन श्‍येत्‍थी लेश्‍शा, लाइनुङ। मेको नेल्‍ल परमप्रभु यावेमी गेती। मिनु मेकोमी नेल्‍ल लेश्‍शा लाइक्‍तु। परमप्रभु यावे आ नें ठेयब बाक्‍ल” देंमाक्‍त। उपदेसक ५:१४; १तिमोथी ६:७; याकूब ५:११

भजन संग्रह 106:2

सुमी परमप्रभु यावे आ सक्ति पाइश्‍शो गेय आ पर्बम देंने चाप्‍बा ङा? सुमी मेको कली ठेयब सेल्‍तीक नेल्‍ल देंने चाप्‍बा ङा? यूहन्‍ना २१:२५; हिब्रू ११:३२

भजन संग्रह 134:1

नाक्‍दो परमप्रभु यावे आ खिंम बाक्‍शा, परमप्रभु यावे आ गेय पाइब नेल्‍लेमी परमप्रभु यावे कली ठेयब सेलीन।

भजन संग्रह 145:2

गो इन कली नाक्‍त किंत किंत ठेयब सेल्‍नुङ। गो इन नें गेना हना यो ठेयब सेल्‍नुङ।

भजन संग्रह 145:5

आं पिप, गो इन शुश दारस ङा मान ततीके नु इन छक लाक्‍चा ङा गेय आ पर्बम मिम्‍ना मिम्‍न बाक्‍नुङ। भजन संग्रह १९:२-७

भजन संग्रह 146:2

गो ब्रोंइङा सम्‍म परमप्रभु यावे कली ठेयब सेल्‍नुङ। गो मबेक्‍ङा सम्‍म आं परमप्रभु कली कुम्‍सो पा ठेयब सेल्‍नुङ।

भजन संग्रह 16:2

गो परमप्रभु यावे कली ‘गे आं परमप्रभु बाक्‍नीनी। गो इन क्‍येङा अर्को मारेइ रिम्‍शो मतुइक्‍नुङ’ देंती। भजन संग्रह ७३:२५

भजन संग्रह 66:2

गे परमप्रभु कली “इन नें ठेयब बाक्‍ब” दे कुम्‍सो पने। मेको कली रिम्‍शो कुम्‍सो पने।

भजन संग्रह 99:3

मेको नेल्‍लेमी इन ठेयब नु हिंचा ङा नें कली ठेयब सेल्‍मेक्‍ल। परमप्रभु यावे का ला बाक्‍ब।

प्रस्‍थान 15:11

परमप्रभु यावे, देवी देवता आन दातेमी इन खोदेंशो ठेयब सुइ मबाक्‍नीम। इन खोदेंशो सक्ति पाइश्‍शो, ठेयब मान ताइब सुइ मबाक्‍नीम। इन ठेयब गेय हिंचा ङा बाक्‍ब। गे छक लाक्‍चा ङा गेय पाइब बाक्‍नीनी। प्रस्‍थान ८:६; प्रस्‍थान १८:११; भजन संग्रह ८६:८

प्रस्‍थान 15:6

परमप्रभु यावे, इन सक्ति ठेयब बाक्‍ब। इन सक्तिमी इन जोरी सत्रु आन कली थुम्‍पाइक्‍तीनी।

दानीएल 2:20

“परमप्रभु, इन नें गेना हना यो ठेयब बाक्‍ब। मारदे हना सक्ति नु जोक्‍ब तुइक्‍ब थुं इन केन बाक्‍ब।

मत्ती 11:25

काबु येसुमी “आं आफ, सरीङ नु रागी ङा परमप्रभु, गे नेल्‍ल क्‍येङा ठेयब ननी। गे शुश रिम्‍शो पाइतीनी। जोक्‍ब तुइक्‍ब नङ, दे मिम्‍ब आन कली इन लोव़ मरुप्‍तीक थुं गेतीनी। मजोक्‍ब मतुइक्‍ब आन कली रुप्‍तीक थुं गेतीनी। यसैया २९:१४; लूका १०:२१-२२; यूहन्‍ना १७:२५; १कोरिन्‍थी १:२८-२९

२ कोरिन्‍थी 4:6

परमप्रभु यावेमी “छिङछिङ जाम्‍शा, छेङछेङ दुम्‍ल” देंमाक्‍त। मेकोमी आंइ थुंमी छेङछेङ ब्रपाइश्‍शो बाक्‍त। गो परमप्रभु यावे आ छेङछेङ ख्रीस्‍त रे पा रुप्‍नीकी। उत्‍पत्ती १:३; २कोरिन्‍थी ३:१८

ब्‍यवस्‍था 28:58

मिनु गेपुकीमी एको किताबमी ब्रेक्‍शो अरेशो लोव़ नेल्‍ले टिशा मपाइतीनी हना, मेको ठेयब नु हिंचा ङा परमप्रभु यावे, इन परमप्रभु आ नें कली मान पा महिंतीनी हना,

१ पत्रुस 1:3

इं प्रभु येसु ख्रीस्‍त आ आफ नेल्‍ल आसीक पाइश्‍शो बाक्‍ब, दे गो मान पय। मेको आ शुश शिशी पतीके नु येसु ख्रीस्‍त बेक्‍शो रे सेंसीशोमी इं कली ब्रोंइशा बाक्‍तीक आस गेशा, नक जरमेशो मुर सेल्‍तु। कलस्‍सी १:५

न्‍यायाधीस 13:18

मिनु परमप्रभु यावे आ स्‍वर्ग ङा गेय पाइबमी मेको कली “गे मारदे आं नें हिल्‍लो पाइनेवे? मेको मतुइक्‍चा ङा बाक्‍ब” देंमाक्‍त।