मर्कूस 6:3 - Sunuwar Bible

³ शी मुइब ममाइ ङा? मरीयम आ तौ ममाइ ङा? याकूब, योसेस, यहूदा नु सिमोन आन लोक्‍ब ममाइ ङा? आ लोक्‍बपुकी गोपुकी नु मबाक्‍नीमी ङा?” दे आन थुं मनुशो लोव़ पमुमा बाक्‍त। यूहन्‍ना ६:४२

मर्कूस 6:3 ပူးပေါင်းရင်းမြစ်များ

यसैया 49:7

परमप्रभु यावेम, इस्राएली आन श्‍येत रे प्रोंइब, इस्राएली आन का ला बाक्‍शो परमप्रभु यावेमी काइ मदाक्‍शो नु रागी ङा मुरुम खेदा पचा पुंइसीशो नु हुकुम पाइब आन वाइल आन कली “पिपपुकी मेको कली तशा, राप्‍नीम। हुकुम पाइबम आ देंशो पाइब परमप्रभु यावे आ ङोंइती बाप्‍नीम। इ कली योव़ब इस्राएली आन का ला बाक्‍शो परमप्रभु आ ङोंइती बाप्‍नीम” देंत।

मत्ती 11:6

सु सुमी आं कली तशा थुं मखाइक्‍पाइक्‍नीम, मेकोपुकी ग्‍येरसमल, दे मतीन” दे लेश्‍शा सोइक्‍ताक्‍मी। मत्ती १३:५७; मत्ती २६:३१

मत्ती 12:46

येसुमी मेको लोव़ पना पन बाक्‍मेनु, आ ममा नु आ लोक्‍बपुकी ग्रुम्‍थ जाक्‍मा बाक्‍त। मत्ती १३:५६

मर्कूस 15:40

येसु बेक्‍मेनु, शुश मीश मुरपुकीमी ङोन रे कोव़शो बाक्‍मा बाक्‍त। मोदेंशो कोव़ब का माग्‍दाला ङा मरीयम बाक्‍माक्‍त। का याकूब नु योसेस आस ममा मरीयम बाक्‍माक्‍त। का सालोमे बाक्‍माक्‍त।

मर्कूस 3:18

मिनु अ‍न्‍द्रीयास, फिलीप, बारथोलोमाइ, मत्ती, थोमास, अल्‍फयस आ तौ याकूब, थदेयस, सिमोन कनानी

लूका 2:34

मिनु सिमियोनम मेको आस कली आसीक गेशा, मरीयम कली “एको आल इस्राएली आन दातेमी लां कोंइशा मुर आन कली फ्राब। का निक्‍शी खतम दुम्‍नीम, का निक्‍शी रिम्‍शो दुम्‍नीम। मिनु शुश मुरुमी एको कली मदाक्‍नीम। लूका २०:१७-१८; प्रेरित २८:२२; १कोरिन्‍थी १:२३

लूका 7:23

सु सुमी आं कली तशा, आन थुं मखाइक्‍पाइक्‍नीमी, दल्‍गीर मपाइनीमी, मेको ग्‍येरसमल, दे मतीसे” दे सोइक्‍तीम्‍सी बाक्‍त।

लूका 8:20

मिनु मुर कामी “इन ममा नु इन लोक्‍ब इन कली ग्रुम्‍थ जाक्‍शा, लाङगाम रिम्‍शा बाक्‍नीम” देंमाक्‍‍त।

यूहन्‍ना 14:22

मिनु यहूदामी, इस्‍कारीयोत ङा यहूदा चहिं ममाइ, येसु कली “प्रभु, गे आंइ कली तुइक्‍पांइसीनीनी। थमा मसुइक्‍ब आन कली चहिं मतुइक्‍पांइसीनीनी, दोपा रुम्‍सीबा ङा?” दे हिल्‍लो पाप्‍तु।

यूहन्‍ना 6:42

मिनु मेकोपुकीमी “मार, एको योसेफ आ तौ येसु ममाइ? मेको आ आम आफ कली गो तुइक्‍नीकी” देंतेक्‍म। मिनु मेकोमी “ ‘गो स्‍वर्ग रे जाक्‍शो नङ’ दे दोपा देंने चाप्‍बा ङा?” दे गन गन पाम्‍तेक्‍म। लूका ४:२२

प्रेरित 1:13

मिनु यरूसलेम सहरम जाक्‍शा ङा मीन, खिं का ङा तला तारी ओव़शा बाक्‍मा बाक्‍त। मोपा बाक्‍बपुकी सु सु बाक्‍मा बाक्‍त देंशा हना, पत्रुस, यूहन्‍ना, याकूब, अन्‍द्रीयास, फिलीप, थोमास, बारथोलोमाइ, मत्ती, अल्‍फयस आ तौ याकूब, सिमोन, मेको कली कनानी यो देंसीब नु याकूब आ तौ यहूदा बाक्‍मा बाक्‍त। लूका ६:१३-१६

प्रेरित 12:17

मिनु पत्रुस ओव़शा आ गुइ हिक्‍शा, आ शोव़ थीप थीप पा सिक्‍सी पा नेनीन देंशा, दोपा प्रभुमी जेल्‍खान रे प्रोंइशा सोइक्‍ता, मेको नेल्‍ल तुइक्‍पाइक्‍मी बाक्‍त। मिनु “याकूब नु इं थमा सुइक्‍ब लोक्‍ब नेल्‍ल आन कली एको लोव़ नेंपतीन, है” देंशा, मेकेर रे गाक्‍माक्‍त।

१ कोरिन्‍थी 1:23

मेको आन दाक्‍शो, आन माल्‍शा गाक्‍शो नेल्‍ल तुइश्‍शा यो गोमी चहिं “ख्रीस्‍त पाप क्‍याम्‍चा कली साइक्‍चा पुंइसाक्‍व” दे आन कली नेंपाइक्‍नीकी। मोदेंशो नेंपाइक्‍कानु, ख्रीस्‍त लांमी वोइश्‍शो फुल्‍लु खोदेंशो दुम्‍शा, यहूदी आन कली दाइल पाइक्‍ब। मिनु राम्‍सीनीम। अर्को रागी ङा मुरपुकीमी “मूर्ख लोव़ बाक्‍माक्‍त” दे काइ नेंचा मदाक्‍नीम। प्रेरित १७:३२; गलाती ५:११; १कोरिन्‍थी २:१४

१ कोरिन्‍थी 9:4

मिनु आंइ कली माल्‍शो जचा तूचा थोव़क “गेन” दे पुंइने मचाप्‍नीनी ङा? लूका १०:८

गलाती 1:19

मेना ख्रीस्‍त आ सोइश्‍शो सुइ आन कली मग्रुमुमी। प्रभु आ लोक्‍ब याकूब चहिं ग्रुम्‍ता। मत्ती १३:५५

१ पत्रुस 2:4

येसु ख्रीस्‍त ब्रोंइचा गेब फुल्‍लु बाक्‍ब। मेको आ नेक्‍था लने। मुरपुकीमी मेको कली ममाल्‍शो फुल्‍लु खोदेंशो पा ताइक्‍ताक्‍म। तन्‍न परमप्रभु यावेमी “मेको कली योव़शो नु नेल्‍ल क्‍येङा दाक्‍शो बाक्‍ब” दे मिम्‍ब। भजन संग्रह ११८:२२; यसैया ८:१४-१५; मत्ती २१:४२

यहूदा 1:1

गो याकूब आ लोक्‍ब यहूदा नङ। गो येसु ख्रीस्‍त आ वाइल दुम्‍ती। परमप्रभु यावे, इं आफ आ दाक्‍शो नु येसु ख्रीस्‍त कली योव़शा वोइश्‍शो मुर, इन कली ब्रेक्‍ताक्‍ङ। मत्ती १३:५५