मत्ती 5:5 - Sunuwar Bible

⁵ ब्रेम्‍शोपुकी आसीक राइनीम। मारदे हना रागी आन केन दुम्‍ब। मत्ती ११:२९; भजन संग्रह ३७:११

मत्ती 5:5 ပူးပေါင်းရင်းမြစ်များ

भजन संग्रह 147:6

परमप्रभु यावेम श्‍येत जाइब आन कली कोव़ब। तन्‍न आ अरेशो मटीब आन कली खपीम ताइक्‍ब।

भजन संग्रह 149:4

मारदे हना परमप्रभु यावे आ मुर आन पर्बम ग्‍येरसीशो बाक्‍ब। आइक्‍च मुर आन कली ग्रातीकेमी ग्‍योम्‍ब।

भजन संग्रह 22:26

प्रुङग मुरपुकी जशा रूनीम। मिनु परमप्रभु यावे कली माल्‍बपुकीमी “परमप्रभु यावे ठेयब बाक्‍ब” देंनीम। गेपुकी गेना हना यो ब्रोंइशा बाक्‍चा ताइनीनी। भजन संग्रह ६९:३३

भजन संग्रह 25:13

मिनु मेको आन माल्‍शो नेल्‍ल तशा, आन थुं नाइक्‍नीम। मेको आन आलपुकीम मेको रागी ताइनीम। भजन संग्रह ३७:९

भजन संग्रह 25:9

ब्रेम्‍शो आन कली ठीक लां कोंइशा, आ लां शेंब।

भजन संग्रह 37:11

ब्रेम्‍शोपुकी रागीम बाक्‍चा ताइनीम। मारेइ मारेइ तशा ग्‍येरशा, ठेयब थुं पा बाक्‍चा ताइनीम। मत्ती ५:५

भजन संग्रह 37:22

परमप्रभु रे आसीक ताइबपुकीमी रागी ताइनीम। परमप्रभु रे सराप ताइबपुकी जाम्‍शा लाइनीम।

भजन संग्रह 37:29

ठीक पाइबपुकीमी रागी ताइनीम। मिनु गेना हना यो मेकेर बाक्‍नीम। यसैया ६०:२१

भजन संग्रह 37:34

परमप्रभु यावे कली रिम्‍दीन। मेको आ लांम गाक्‍कीन। मेकोमी इन कली ठेयब सेल्‍शा, रागी इन कली गेब। मिनु गे परमप्रभु आ अरेशो मटीब आन कली खतम सेल्‍चा ताइनीनी।

भजन संग्रह 37:9

परमप्रभु आ अरेशो मटीब क्‍याम्‍चा पुंइसीनीम। तन्‍न परमप्रभु यावे आ लां कोव़बपुकी रागीम बाक्‍चा ताइनीम।

भजन संग्रह 69:32

दिप्‍चा पुंइसीशो मुरपुकी मेको तशा ग्‍येरसीनीम। परमप्रभु यावे कली माल्‍बपुकी, इन थुं ग्‍येत्‍थ लुक्‍च मदुम्‍ल।

यसैया 11:4

ठीक पतीकेमी प्रुङग आन कली निसाफ पाइब। रागी ङा आइक्‍च नु ठेयब मुर नेल्‍ल आन कली उइक्‍थ पा निसाफ पाइब। मिनु रागी ङा मुर आन कली आ लोव़मी तुप्‍ब। परमप्रभु यावे आ अरेशो लोव़ मटीब आन कली मुइश्‍शा साइक्‍ब। २थिस्‍सलोनिकी २:८

यसैया 29:19

मिनु ब्रेम्‍शो मुर परमप्रभु यावे कली मिम्‍शा ग्‍येरसीनीम। मिनु क्‍येट मथीबपुकी इस्राएली आन परमप्रभु यावे कली मिम्‍शा थाम्‍पा ग्‍येरसीनीम।

यसैया 60:21

इ रागी ङा मुर नेल्‍ल ठीक पाइब दुम्‍नीम। मेको आन बाक्‍तीके रागी गेना हना यो आन के दुम्‍ब। मेकोपुकी आं ख्रुम्‍शो बाक्‍नीम। मेकोपुकी आं सेल्‍शो मुर दुम्‍शा, आं कली ठेयब सेल्‍नीम।

यसैया 61:1

“परमप्रभु, परमप्रभु यावे आ सोक्‍त आं तार बाक्‍ब। मारदे हना परमप्रभु यावेमी तेल लुक्‍‍ताक्‍यी। मेकोमी आं कली दिप्‍‍शो प्रुङग मुर आन कली ग्‍येरपाइक्‍ब लोव़ नेंपाइक्‍चा कली, थुं जिक्‍शो आन कली आन थुं बारपाइक्‍चा कली, चोक्‍चा पुंइसीशो मुर आन कली प्रोंइ‍चा कली नु जेल्‍खान बाक्‍ब आन कली ग्रुंइचा कली सोइक्‍ताक्‍यी। यसैया १:२; मत्ती ११:५; लूका ४:१८-१९

सेफन्‍याह 2:3

गे रागी ङा परमप्रभु यावे आ ङोंइती ठीक पाइब नु ब्रेम्‍शो मुरपुकी परमप्रभु यावे कली मालीन। गे ठीक पाइब नु ब्रेम्‍शो थुं पाइश्‍शो दुम्‍चा मालीन। मिनु परमप्रभु यावेमी आ गाइश्‍शो नाक्‍त इन कली ख्रुइक्‍बा कों? आमोस ५:१५

गन्‍ती 12:3

मोसा चहिं रागी ङा मुर नेल्‍ले आन क्‍येङा ब्रेम्‍शो मुर बाक्‍त।

मत्ती 11:29

आं जवा लाम्‍सीशा, गो नु शेंसीने। मारदे हना गो शिशी पाइब नु ब्रेम्‍शो थुं ङा नङ। मिनु गे इन थुं नाइक्‍चा ताइनीनी। यसैया २८:१२; येरमीया ६:१६

मत्ती 21:5

“सियोन ङा तमी कली ओदें तुइक्‍पतीन। कोव़ङीन, इन पिप ब्रेम्‍शो दुम्‍शा, गधा गधैनी आ चाइक्‍ब ङोइश्‍शा, इन बाक्‍तीके गे पिन पिन बाक्‍ब” दे ब्रेक्‍शो बाक्‍ब। जकरिया ९:९

रोमी 4:13

परमप्रभु यावेमी अब्राहाम कली अरेशो लोव़ टितीके लोव़ मगेशो बाक्‍त। तन्‍न थमा सुइश्‍शो तशा “इ चच युइ शुश दुम्‍शा, रागी नेल्‍ल ब्रीनीम” दे लोव़ गेशो बाक्‍त। उत्‍पत्ती २२:१७-१८

गलाती 5:23

ब्रेम्‍शो दुम्‍नीमी नु आंम कली चलेस जोक्‍नीमी। मोदेंशो पाइब मुर कली परमप्रभु यावे आ अरेशो लोव़मी मारेइ मपाइब। १तिमोथी १:९

एफिसी 4:2

गेपुकी ब्रेम्‍शो दुम्‍शा, सुइ नु मचुरथु, रिम्‍शो पा बाक्‍कीन। मुर आन कली फाल्‍शा, मेकोपुकी नु रिम्‍शो पा दाक्‍मुने। कलस्‍सी ३:१२-१३

कलस्‍सी 3:12

गेपुकी परमप्रभु यावे आ योव़शो, आंम आ दाक्‍शो मुर दुम्‍तीनी। मोपतीके शिशी पचा, रिम्‍शो पमुचा, ब्रेम्‍शो थुं पाइश्‍शो, ठेयब मलेत्‍थु टीब नु फाल्‍ब मुर दुमीने।

१ तिमोथी 6:11

मोपतीके गे परमप्रभु यावे आ मुर दुम्‍शा, मेको नेल्‍ल रे ङोन बाक्‍को। ठीक पतीके, परमप्रभु यावे कली मिम्‍शा दाक्‍चा, थमा सुइक्‍चा, मुर आन कली दाक्‍चा, थमा सुइक्‍चा मप्रोंइचा नु ब्रेम्‍शो दुम्‍चा ला मिम्‍तो। २तिमोथी ३:१७; २तिमोथी २:२२

२ तिमोथी 2:25

जिचा पोक्‍ब आन कली रिम्‍शो लोव़मी ठीक सेल्‍चा माल्‍ब। परमप्रभु यावेमी मेको आन कली आ गे लेप्‍पाइश्‍शा, थमा शेंतीके तुइक्‍पाइक्‍ब कों?

तीतस 3:2

मिनु सुइ आन पर्बम काइ शुक्‍शी मपचा, जिचा मपोक्‍चा, मुर आन कली रिम्‍शो पा फाल्‍चा, ठेयब मलेत्‍थु, मुर आन कली वारच पचा माल्‍नीम। फिलिप्‍पी ४:५

याकूब 1:21

मोपतीके ग्रांग्रा दिचा ङा गेय नु काइ मरिम्‍शो पतीके नेल्‍ल प्रोनीन। गे ठेयब मलेत्‍थु, इन थुंमी वोइश्‍शो परमप्रभु यावे आ अरेशो लोव़ टिने। मोपा गेपुकी परमप्रभु यावे आ अरेशो लोव़ टिनीनु, मेको लोव़मी इन कली नरक रे प्रोंइने चाप्‍ब। १पत्रुस २:१

याकूब 3:13

मिनु इन दातेमी सु निप्‍स पाइश्‍शो नु रुप्‍तीक थुं पाइश्‍शो मुर बाक्‍मा, मेकोमी आ गेय रे पा आ ब्रेम्‍तीके रुप्‍तीक थुं रे जाक्‍ब, दे कोंइदल।

१ पत्रुस 3:15

तन्‍न इन थुंमी “ख्रीस्‍त ला प्रभु बाक्‍ब” दे मेको कली ठेयब सेलीन। गे गेना हना यो “इन थमा सुइक्‍तीके मार में” दे हिल्‍लो पाइब आन कली लोव़ लेत्‍चा ठीक दुम्‍शा बाक्‍कीन। ब्रेम्‍शो थुंमी रिम्‍शो लोव़ पा लोव़ लेत्‍तीने। १पत्रुस २:२१-१४

१ पत्रुस 3:4

मुर आन थुंमी ख्रुइश्‍शो जाम्‍शा मलाइब पांइतीके बाक्‍ब। मेको मार बाक्‍ब देंशा हना, ब्रेम्‍शो नु सिक्‍सी पा बाक्‍तीक थुं बाक्‍ब। मेको परमप्रभु यावे आ ङोंइती शुश रिम्‍शो बाक्‍‍ब।