लूका 19:17 - Sunuwar Bible

¹⁷ ‘गे रिम्‍शो गेय पाइब बाक्‍ते, आइक्‍च गेयमी रिम्‍शो पाप्‍तीवी। मोपतीके १० ओटा सहर कली अधिकार पाइब सेल्‍नन’ देंमाक्‍त। लूका १६:१०

लूका 19:17 ပူးပေါင်းရင်းမြစ်များ

उत्पत्ती 39:4

मिनु योसेफ पोतीफर आ ङोंइती शिशी तवा बाक्‍त। मिनु आ खिंमी गेय पवानु, आ ठेयब गेय पाइब सेला बाक्‍त। मिनु अर्को गेय पाइबपुकी कली अरेब यो सेला बाक्‍त। आ मारेइ मारेइ योसेफ कली कोव़पदा बाक्‍त।

हितोपदेस 27:18

सुमी फोव़शी रवा खाल पाइबा, मेकोमी फल जचा ताइब। सुम आ होव़प कली रिम्‍शो पा कोव़बा, मेको मान पाइक्‍चा पुंइसीब।

मत्ती 25:21

आ होव़पमी ‘रिम्‍शो पाप्‍तीवी। थमा सुइक्‍चा पुंइसीशो बाक्‍ते। इच्‍ची खोइ तशोमी शुश सेल्‍शा, रिम्‍शो गेय पाप्‍तीवी। मोपतीके शुश अधिकार गेनन। ग्‍येरसीशा बाक्‍स’ देंब। मत्ती २४:४५-४७

लूका 16:10

मिनु लेंशा “सुमी थम आइक्‍च गेय कली रिम्‍शो पा पाइबा, मेकोमी ठेयब गेय यो रिम्‍शो पा पाइब। सुम आइक्‍च गेय, दे मरिम्‍शो पा पाइबा, मेकोमी ठेयब गेय यो मरिम्‍शो पा पाइ‍ब। लूका १९:१७

लूका 19:16

मिनु ङोंइती ङा जाक्‍शा ‘आं होव़प, इन गेशो क्‍येटमी, मार मार ग्‍याप्‍शा लेयशा, अर्को १० मीना चेम्‍ता’ देंमाक्‍त।

लूका 19:18

मिनु मेको नोले अर्को जाक्‍शा ‘आं होव़प, इन गेशो क्‍येटमी ग्‍याप्‍शा लेयशा, अर्को ५ मीना चेम्‍ता’ देंमाक्‍त।

लूका 22:30

आं राज्‍यमी गो नु काथा बाक्‍शा, जचा तूचा ताइनी‍नी। मिनु इं इस्राएल ङा १२ थर आन कली निसाफ पाइनीनी” दे माइक्‍मी बाक्‍त। मत्ती १९:२८

रोमी 2:29

मार पा यहूदी दुम्‍नीम देंशा हना, मार पचा दुम्‍बा, मार पचा मदुम्‍बा, मेको तुइश्‍शा, परमप्रभु यावे आ सोक्‍तीम थुंम ख्रोइक्‍तीक चिनु ख्रोइश्‍शा ला परमप्रभु यावे आ मुर दुम्‍नीम। मेको आन कली मुरपुकीमी ठेयब मसेल्‍नीम। तन्‍न परमप्रभु यावेमी नेल्‍ल तुइश्‍शा “रिम्‍शो पाइतीनी” देंब। ब्‍यवस्‍था ३०:६; फिलिप्‍पी ३:३; कलस्‍सी २:११

१ कोरिन्‍थी 4:5

मोपतीके प्रभु आ निसाफ पतीक नाक्‍त मजाक्‍म सम्‍म मुर आन कली मनाक्‍तीन। आ निसाफ नाक्‍ती जाक्‍मेनु, ख्रुइश्‍शा वोइश्‍शो लोव़ नेल्‍ल तुइक्‍पाइक्‍ब। छिङछिङम ख्रुइश्‍शो थुं ङा थोव़क नेल्‍ल छेङछेङम तांइसीनीम। मिनु परमप्रभु यावेमी मुर आन कली “गे रिम्‍शो पाइतीनी” देंब। १कोरिन्‍थी ३:८

२ तिमोथी 2:10

मोपतीके गो योव़शो मुर आन कली मिम्‍शा, श्‍येत नेल्‍ल फाल्‍नुङ। मोपा मेकोपुकीमी ख्रीस्‍त येसुमी पाप रे प्रोंइशो दुम्‍शा, गेना हना यो परमप्रभु यावे आ छेङछेङमी ब्रोंइशा बाक्‍चा तामेक्‍ल। कलस्‍सी १:२४

१ पत्रुस 1:7

मारदे श्‍येत जाइनीनी देंशा हना, इन थमा सुइश्‍शो थमा कों, जोल कों, दे नाक्‍चा कली श्‍येत जाइनीनी। मोपा श्‍येत जाइतीनी हना, इन थमा सुइक्‍तीके मीम याप्‍पाइश्‍शो सुन क्‍येङा शुश क्‍येट लाइब दुम्‍ब। मिनु येसु ख्रीस्‍त आ यिची ना ठेयब सेल्‍तीक, छेङछेङ नु मान पतीक दुम्‍ब। हितोपदेस १७:३, यसैया ४८:१०

१ पत्रुस 5:4

नेल्‍ल क्‍येङा ठेयब गोठला जाक्‍मेनु, गे गेना हना यो लीब परमप्रभु यावे आ छेङछेङ ङा सिरपेच ताइनीनी। हिब्रू १३:२०; १कोरिन्‍थी ९:२५; २तिमोथी ४:८

१ सामुएल 2:30

मोपतीके परमप्रभु यावे, इस्राएली आन परमप्रभुमी “इ किकी पिपी आन खिं ङा मुर नेल्‍ल गेना हना यो आं ङोंइती चढ़ेब दुम्‍नीम, गो कसम जशो नङ” देंशो बाक्‍त। तन्‍न परमप्रभु यावेमी “मुल ओदेंशो मदुम्‍ब। मारदे हना आं कली ठेयब सेल्‍ब आन कली गो ठेयब सेल्‍नुङ। आं कली आइक्‍च सेल्‍ब नेल्‍ल आइक्‍च सेल्‍चा पुंइसीनीम। प्रस्‍थान २८:१; मलाकी ३:१६-१८