बिलाप 2:21 - Sunuwar Bible

²¹ ठिटा नु खाल्‍पापुकी लांम गोल्‍शो बाक्‍नीम। आ ठिटी मीश मुर नु ठिटा वोंइश मुर तरवारमी साइक्‍चा पुंइसाक्‍म। गे इन गाइश्‍शो नाक्‍ती मेको आन कली शिशी मपाइक्‍थु साइक्‍तीनी।

बिलाप 2:21 ပူးပေါင်းရင်းမြစ်များ

२ इतिहास 36:17

मिनु परमप्रभुम मेको आन कली लडाइ तोपाइक्‍चा कली कल्‍दी आन पिप कली चाक्‍गा बाक्‍त। मिनु मेकोपुकीमी मेको आन आल आन कली परमप्रभु यावे आ बाक्‍तीक खिंम तरवारम क्‍योरशा सदमे बाक्‍त। मेकोपुकीमी वोंइश आल नु मीश आल आन कली, खाल्‍पा नु खूशो आन कली काइ शिशी मपामे बाक्‍त। परमप्रभुम मेको नेल्‍ल आन कली पिप नेबुकदनेसर आ गुइमी गेमी बाक्‍त।

एस्‍तर 3:13

मिनु मेको सोइश्‍शो मुरपुकीमी मेको ब्रेक्‍स रीब रीब पा पिप आ रागी ङा मुर नेल्‍ल आन कली सोइक्‍तमे बाक्‍त। मेको ब्रेक्‍समी मार ब्रेक्‍शो बाक्‍त देंशा हना, अदार माइश्‍शो महिना ङा १३ नाक्‍त, काबुमीन यहूदी नेल्‍ल आन कली साइक्‍चा माल्‍नीम। वोंइश आल रे खाल्‍पा सम्‍म नु मीश मुर नु आल ब्रेप्‍च नेल्‍ल आन कली यो साइक्‍चा माल्‍नीम। मिनु यहूदी आन शोंप नेल्‍ल रोइक्‍चा माल्‍नीम, दे ब्रेक्‍शो बाक्‍त।

यसैया 27:11

मिनु मेको आ राशी सोव़शा, जिक्‍नीम। मिनु मीश मुरपुकी जाक्‍शा, चोचा कली शी खुप्‍‍नीम। मारदे हना मेकोपुकी रुप्‍तीक मपाइश्‍शो थर ङा मुर बाक्‍नीम। मोपतीके मेको आन कली सेल्‍बमी मेको आन कली शिशी मपाइब। येरमीया ४:२२; ब्‍यवस्‍था ३२:१८

येरमीया 11:22

मोपतीके मुर नेल्‍ल आन परमप्रभु यावेम ‘गो मेको आन कली सजाइ गेनुङमी। मेको आन ठिटा मुरपुकी तरवारम क्‍योरशा साइक्‍चा पुंइसीनीम। मिनु मेको आन तमी तौ चहिं अन्‍कालम बेक्‍नीम।

येरमीया 13:14

गो मुर आन कली जिपाइक्‍नुङमी। गो आम आफ नु आन तमी तौ आन दातेमी जिपाइक्‍नुङमी। गो मेको आन कली दाक्‍शा, शिशी पा साइक्‍तीक रे आं थुं मलेत्‍नुङ, दे परमप्रभु यावेम” देंत।

येरमीया 18:21

मोपतीके मेको आन आल आन कली अन्‍काल पपतीन। मेको आन कली तरवारम साइक्‍पतीन। मेको आन मीश आल मबाक्‍शो नु आन वोंइश बेक्‍शो मीश मुर दुम्‍मल। मेको आन वोंइश मुर बेक्‍तीक रोइम बेक्‍मल। मेको आन ठिटा वोंइश मुरपुकी लडाइम तरवारम साइक्‍चा पुंइसमल।

येरमीया 21:7

मिनु नोले परमप्रभु यावेमी ‘गो यहूदा ङा पिप सिदकीयाह, मेको आ गेय पाइबपुकी नु मेको सहर ङा बेक्‍तीक रोइ, तरवार नु अन्‍काल रे ब्रोंइशो मुर आन कली बेबीलोन ङा पिप नेबुकदरेसर आ गुइम गेनुङमी। गो मेको आन कली साइक्‍चा माल्‍ब आन जोरी सत्रु आन गुइम जिम्‍मा गेनुङमी। मिनु मेकोमी मेको आन कली तरवारम साइक्‍पाइक्‍ब। मेकोमी मेको आन कली शिशी मपथु, मप्रोंइब नु दाक्‍तीके मकोंइथु, साइक्‍पाइक्‍ब’ मतीस” दे माइक्‍तीम्‍सी।

येरमीया 4:31

गो सुत्‍केरी रोइ पशो मीश मुर आ सेंदा खोदेंशो नेंता। मेको ङोंइती ङा आल थिचा चिक्‍शो मीश मुर आ सेंदा खोदेंशो बाक्‍त। सियोन आ तमीमी आ गुइ दिंशा आ सास कीशा ‘आबी, आं कली साइक्‍ब आन ङोंइती थाइनुङ’ देंत” दे परमप्रभु देंत।

येरमीया 51:22

गो इ रे पा वोंइश मुर नु मीश मुर आन कली तुप्‍ता‍मी। गो इ रे पा खूशो नु ठिटा आन कली तुप्‍ता‍मी। गो इ रे पा ठिटी नु ठिटा आन कली तुप्‍ता‍मी।

येरमीया 6:11

तन्‍न गो परमप्रभु यावे आ गाइक्‍तीकेम ब्रीशो बाक्‍नुङ। गो मेको हेरा तेक्‍‍ने मचाप्‍नुङ। मिनु मेकोमी “मेको लां मेर गाक्‍ब आल आन तार मोतो। बुक्‍शा बाक्‍शो ठिटा आन तार मोतो। मीश वोंइश निम्‍फा लाइक्‍चा पुंइसीनीस। खाल्‍पा नु खूशो लाइक्‍चा पुंइसीनीम।

येरमीया 9:20

मिनु गे मीश मुरपुकी परमप्रभु यावे आ लोव़ नेनीन। मेको आ लोव़ नेंचा कली इन नोफा दाइक्‍तीन। इन तमी आन कली रोंका पचा शेंदीन। आंम नेक्‍था ङा मुर नु रोंका पतीक शेंमुने।

येरमीया 9:21

बेक्‍पाइक्‍ब झेल रे ङोइश्‍शा आंइ बाक्‍तीकेम ओव़त। मेको आंइ आल आन कली लां रे नु आंइ ठिटा आन कली बुक्‍शा बाक्‍तीक रे साइक्‍चा कली जाक्‍त।

बिलाप 1:15

परमप्रभुमी आं दाते ङा लडाइ पाइब नेल्‍ल आन कली प्रोंइतु। मुल मेकोमी आं कली वारच मपथु, आ ठिटा वोंइश मुर नेल्‍ल आन कली साइक्‍तु। परमप्रभुम अङगुर ख्राक्‍शो खोदेंशो पा यहूदा ङा कन्‍ने मीश आल, यरूसलेम कली ख्राक्‍शो बाक्‍ब। यसैया ६३:३

बिलाप 1:18

परमप्रभु यावे ठीक पाइब बाक्‍ब। मारदे हना गो आ लोव़ काइ मटीब दुम्‍ती। तन्‍न गे जात जात ङा मुर नेल्‍ल नेनीन। आं श्‍येत कोव़ङीन। आं मीश आल नु ठिटा वोंइश आल नेल्‍ल ग्‍याइश्‍शा लाइक्‍चा पुंइसाक्‍म। येरमीया ३:४२; येरमीया ५:१६

बिलाप 1:4

सियोन लतीक लां रोंका पाइनीम। मारदे हना सुइमी चाड मानेचा कली मेकेर रे मगाक्‍नीम। सहर ङा ठेयब लाप्‍चो नेल्‍ल श्‍येत्‍थ बाक्‍नीम। आ चढ़ेबपुकी हुकयी पाइनीम। आ मीश आल सुर्ता पाइनीम। मिनु सहरम श्‍येत जशो बाक्‍ब।

बिलाप 2:17

परमप्रभु यावेमी मार मिम्‍ता नु ङोंइती मार पाइनुङ देंमे, मेको पाप्‍तु। साइ ङोंइती हिंच कोंइशा देंशो लोव़ मुल पाप्‍तु। मेकोमी शिशी मपथु, नेल्‍ल खतम सेल्‍तु। मिनु इ जोरी सत्रु आन कली इ पर्बम ग्‍येरपाइक्‍तु। इ जोरी सत्रु आन सक्ति ठेयब सेल्‍तु।

बिलाप 2:2

परमप्रभुमी शिशी मपथु याकूब आ बाक्‍तीक नेल्‍ल खतम सेल्‍तु। मोपा चुरशा यहूदा आ तमी आ गारो हिरशो सहर नेल्‍ल खतम सेल्‍तु। मेकोमी मेको राज्‍य नु आ सासन पाइब आन कली मान मताइब, आइक्‍च सेल्‍तु।

बिलाप 3:43

गे चुर‍शा आंइ कली खेदा पाइतीनी। काइ शिशी मपथु साइक्‍तीनी।

इजीकीएल 24:21

मार लोव़ पाप्‍तु देंशा हना ‘इस्राएल आ खिं ङा मुर आन नेल्‍ल क्‍येङा दाक्‍शो, इन सक्ति, इन कोव़त दाक्‍शो नु थुंम दाक्‍शो आं बाक्‍तीक गो ग्रांग्रा दिशो सेल्‍नुङ। मिनु इन प्रोंइशा वोइश्‍शो इन तमी तौ तरवारम साइक्‍चा पुंइसीनीम

इजीकीएल 5:11

मोपतीके परमप्रभु, परमप्रभु यावेमी ‘गो ब्रोंइशा बाक्‍शो खोदेंशो पा, मो पाइनुङ। मारदे हना इ मूर्ति नु इ ग्रांग्रा दिशो गेयम आं बाक्‍तीक ग्रांग्रा दिशो सेल्‍तीके, गो इ कली खतम सेल्‍नुङ। गो इ कली शिशी मपथु सुइ आन कली ब्रोंइचा मगेनुङ। इजीकीएल ७:४; इजीकीएल ८:७-१८

इजीकीएल 7:4

गो इ कली शिशी मपथु, सुइ आन कली ब्रोंइचा मगेनुङ। गो इ कली इ गेय आ पर्बम नु इ मूर्ति पूजा आ पर्बम सजाइ गेनुङ। मिनु गे, गो परमप्रभु यावे नङ, दे तुइक्‍नेवे’ ” देंत। इजीकीएल ५:११; इजीकीएल ८:१८; इजीकीएल ९:१०

इजीकीएल 7:9

गो इ कली शिशी मपथु, सुइ आन कली ब्रोंइचा मगेनुङ। गो इ कली इ पशो खोदेंशो पा सजाइ गेनुङ। इ मूर्ति पूजा पशो इ दातेम बाक्‍ब। मिनु गो इ कली तुप्‍ब, परमप्रभु यावे नङ, दे तुइक्‍नेवे।

इजीकीएल 8:18

मोपतीके गो मेको आन कली आं गाइक्‍तीकेम गेय पाइ‍नुङ। गो मेको आन कली शिशी मपथु, सुइ आन कली ब्रोंइचा मगेनुङ। मेकोपुकीम ठेयब सेंदा पा पुंइशा ग्रीतेक्‍म हना यो, मेको आन लोव़ मनेंनुङ” देंत। इजीकीएल ७:४; यसैया १:१५

इजीकीएल 9:10

मोपतीके गो मेको आन कली शिशी मपथु सुइ आन कली ब्रोंइचा मगेनुङ। मेको आन पशो खोदेंशो पा सजाइ गेनुङमी” देंत। इजीकीएल ७:४

आमोस 4:10

गो इन दातेम इजीप्‍त रागी कली खोदेंशो पा बेक्‍चा ङा रोइ सोइक्‍ताक्‍ङ। गो इन ठिटा आन कली तरवारमी क्‍योरशा साइक्‍पाइक्‍तामी। इन शारा रोइक्‍पाइक्‍तामी। इन बाक्‍तीक ङा मरिम्‍शो रिना इन नें आगाम प्रिंताक्‍ङ। मो हना यो गेपुकी आं गे मलेन्‍नी” दे परमप्रभु यावेमी देंत। प्रस्‍थान ९:३

आमोस 8:13

मेको नाक्‍ती दारशो मीश आल नु बोल्‍यो वोंइश आल ब्‍वाक्‍कु तूचा मतथु, थाइनीम।

जकरिया 11:6

मुल रे गो रागी ङा मुर आन कली शिशी मपाइ‍नुङ” दे परमप्रभु यावेमी देंत। मिनु परमप्रभुमी “गो नेल्‍ल आन कली आन नेक्‍था ङा मुर आन गुइमी नु आन पिप आन गुइमी गेनुङ। मिनु मेकोपुकीमी रागी कली खतम सेल्‍नीम। मेको आन गुइ रे सुइ आन कली मप्रोंइनुङमी।

ब्‍यवस्‍था 28:50

मेको मुरपुकी काइ शिशी मपाइश्‍शो बाक्‍नीम। मेकोपुकीमी खाल्‍पा आन कली मान मपाइनीम। मिनु आल आन कली यो काइ शिशी मकोंइनीम।

ब्‍यवस्‍था 32:25

लां लांमी तरवारम मेको आन कली रोम रोइक्‍च सेल्‍नुङ। खिं खिंम राम्‍शी पोक्‍नुङ। ठिटा ठिटी, दूध तूब आल, चां बोइश्‍शो नेल्‍ल आन कली खाल का ङा पाइ‍नुङ। इजीकीएल ५:१७; इजीकीएल १४:२१

यहोसु 6:21

मिनु सहर ङा मीश मुर वोंइश मुर, आल, खाल्‍पी खाल्‍पा बी ब्‍यफ, क्‍यारश भेडा, गधा नेल्‍ल आन कली तरवारम साइक्‍तेक्‍म।

१ सामुएल 15:3

अमालेकी आन कली लडाइ तोशा, मेको आन कली सतीन। मेको आन शोंप नेल्‍ल खतम पोक्‍कीन। मारेइ मप्रोनीन। नेल्‍ल आन कली खतम पोक्‍कीन। मेको आन मीश मुर, वोंइश मुर, मीश आल, वोंइश आल, दूध तूब आल, बी ब्‍यफ, क्‍यारश भेडा, दलओंठ नु गधा नेल्‍ल आन कली खतम पोक्‍कीन” देंमाक्‍त।