बिलाप 1:15 - Sunuwar Bible

¹⁵ परमप्रभुमी आं दाते ङा लडाइ पाइब नेल्‍ल आन कली प्रोंइतु। मुल मेकोमी आं कली वारच मपथु, आ ठिटा वोंइश मुर नेल्‍ल आन कली साइक्‍तु। परमप्रभुम अङगुर ख्राक्‍शो खोदेंशो पा यहूदा ङा कन्‍ने मीश आल, यरूसलेम कली ख्राक्‍शो बाक्‍ब। यसैया ६३:३

बिलाप 1:15 ပူးပေါင်းရင်းမြစ်များ

२ राजा 9:33

मिनु येहूमी “मेको कली झेल रे ताइक्‍तीन” देंमाक्‍त। मिनु मेकोपुकीम इजेबेल कली उइ ताइक्‍तमे बाक्‍त। मिनु मेको आ हुश प्रेक्‍शा कोइ गारोमी नु कोइ शारा आन कली जुक्‍तमे बाक्‍त।

भजन संग्रह 119:118

इन फुल्‍लुम मुशा ब्रेक्‍शो लोव़ ङा लां रे हेंथे गाक्‍ब नेल्‍ल आन कली तिल्‍तीनी। मारदे हना मेको आन लां जोल बाक्‍त।

यसैया 28:18

मेना इन बेक्‍पाइक्‍ब नु पशो कबल नुप्‍ब। इन बेक्‍शो मुर आन बाक्‍तीक नु पशो सल्‍ला जाम्‍ब। मिनु मेको हिंचा ङा श्‍येत जतीक जाक्‍शा, इन कली सुम्‍ब।

यसैया 41:2

सुमी पूर्ब रे आ गेय पचा कली ग्राब का कली पोक्‍गा? मेकोमी रागी रागी ङा मुर आन कली आ गुइम गेब। मेकोमी पिप आन कली दिम्‍शा, आ तरवारम मेको आन कली फुरक खोदेंशो सेल्‍ब। आ लिब्रामी फशेम बेरशो भूस खोदेंशो सेल्‍ब। यसैया ४४:२८; यसैया ४५:१,१३; यसैया ४८:१४-१५

यसैया 5:5

मिनु मुल गो आं अङगुर रू कली मार पाइनुङा, इन कली देंनुङ। आ थरपु नेल्‍ल ग्रुंइनुङ। मिनु मार मार ओव़नीम। आ गारो नेल्‍ल प्रेश्‍शा ताइक्‍नुङ। मिनु दिम्‍शा ताइश्‍शा पाइनीम।

यसैया 63:3

मिनु मेकोमी “गो आं कान अङगुर ख्राक्‍ता। गो नु जात जात ङा मुर सुइ मबाक्‍म। मिनु गो गाइश्‍शा, मेको आन कली ख्राक्‍ता। चुरशा मेको आन कली दिम्‍ताक्‍ङमी। मेको आन रस आं वाम ब्रुंइसाक्‍व। मिनु आं वा नेल्‍ल लल दुम्‍त। योएल ४:१३; प्रकाश १४:२०

येरमीया 13:24

गो इ कली गोरशो रागी रे जाक्‍शो फशेम योल्‍शो भूस खोदेंशो पा फ्राइ‍नन।

येरमीया 14:17

गे मेको आन कली “आं मिक्‍च रे नाक्‍दो नाक्‍ती प्रेक्‍कु यिशा बाक्‍ल। मारदे हना आं मुर, ग्‍युं‍बे मपशो तमी थाम्‍पा श्‍येत जशो बाक्‍ब। ठेयब गार दुम्‍चा ङा पा मेको तुप्‍चा पुंइसीशो बाक्‍ब। येरमीया१३:१७

येरमीया 18:21

मोपतीके मेको आन आल आन कली अन्‍काल पपतीन। मेको आन कली तरवारम साइक्‍पतीन। मेको आन मीश आल मबाक्‍शो नु आन वोंइश बेक्‍शो मीश मुर दुम्‍मल। मेको आन वोंइश मुर बेक्‍तीक रोइम बेक्‍मल। मेको आन ठिटा वोंइश मुरपुकी लडाइम तरवारम साइक्‍चा पुंइसमल।

येरमीया 37:10

गेपुकी नु लडाइ पाइब कल्‍दी नेल्‍ल आन कली गे ग्रातीनी हना, मेको आन गार दुम्‍शोपुकी ला आन ताम्‍बुम लीतेक्‍म हना यो, मेकोपुकी जाक्‍शा एको सहर कली मी सुइक्‍नीम” देंत।

येरमीया 50:26

मेको आ एर ओंथ नेल्‍ल रे लडाइ पथ जाक्‍कीन। मेको आ अन्‍न वोइक्‍तीक खिं रोक्‍कीन। मेको कली अन्‍न खोदेंशो पा तेलीन। मेको कली मारेइ मली‍शो खतम सेलीन। मेको के मारेइ मलील।

येरमीया 51:34

सियोनमी “बेबीलोन ङा पिप नेबुकदरेसरमी आं कली दाक्‍ती। आं कली खतम सेल्‍ती। आं कली श्‍येत्‍थ गर खोदेंशो सेल्‍ती। आं कली अजीङगरम खोदेंशो पा दाक्‍ती। मिनु ब्रोव़शो जचा थोव़कम खोदेंशो पा आ कोव़ज प्रिंताक्‍व। मिनु नोले आं कली ताइक्‍ताक्‍यी।

येरमीया 6:11

तन्‍न गो परमप्रभु यावे आ गाइक्‍तीकेम ब्रीशो बाक्‍नुङ। गो मेको हेरा तेक्‍‍ने मचाप्‍नुङ। मिनु मेकोमी “मेको लां मेर गाक्‍ब आल आन तार मोतो। बुक्‍शा बाक्‍शो ठिटा आन तार मोतो। मीश वोंइश निम्‍फा लाइक्‍चा पुंइसीनीस। खाल्‍पा नु खूशो लाइक्‍चा पुंइसीनीम।

बिलाप 2:21

ठिटा नु खाल्‍पापुकी लांम गोल्‍शो बाक्‍नीम। आ ठिटी मीश मुर नु ठिटा वोंइश मुर तरवारमी साइक्‍चा पुंइसाक्‍म। गे इन गाइश्‍शो नाक्‍ती मेको आन कली शिशी मपाइक्‍थु साइक्‍तीनी।

बिलाप 3:34

रागी ङा जेल्‍खानम चोक्‍चा पुंइसीशो नेल्‍ल आन कली खोइलीमी दिम्‍नीम।

दानीएल 3:13

मिनु मेको नेंशा, पिप नेबुकदनेसर शुश गाइश्‍शा, चुरशा “शद्रक, मेशक नु अबेद-नेगो आन कली आं ङोंइती चाक्‍कीन” दे हुकुम पाप्‍तु। मिनु मेको आन कली चाक्‍शा, पिप आ ङोंइती राप्‍पाइक्‍तेक्‍म।

योएल 3:13

मिनु इन गुयेमी रिक्‍चा ठीक दुमीन। मारदे हना बाली नाली खुप्‍ची जाक्‍शो बाक्‍ब। मिनु ओव़शा अङगुर ख्राक्‍कीन। मारदे हना कोल ब्रीशो बाक्‍त। गर ब्रीशा क्‍युप्‍शो बाक्‍नीम। मेको खोदेंशो पा आन मरिम्‍शो पशो शुश दुम्‍त। प्रकाश १४:१५; यसैया ६३:३,६; प्रकाश १४:१८

मीका 7:10

मेना आं जोरी सत्रुम मेको ताइनीम। मिनु मुने दोक्‍नीम। मारदे हना मेकोपुकीमी ङोंइती ‘परमप्रभु यावे, इ परमप्रभु ते बाक्‍‍म?’ देंशो बाक्‍तेक्‍म। गो मेको आन खतम दुम्‍शो ताइनुङ। मुल यो मेकोपुकी लां ङा हिलो खोदेंशो पा दिम्‍चा पुंइसीशो बाक्‍नीम। भजन संग्रह ७९:१०

मलाकी 4:3

मिनु गेपुकीमी आं अरेशो लोव़ मटीब आन कली इन खोइलीमी दिम्‍नीनी। आं निसाफ पतीक नाक्‍ती मेको इन खोइलीम दिम्‍शा, पुलु खोदेंशो सेल्‍चा पुंइसीनीमी” दे मुर नेल्‍ल आन परमप्रभु यावेमी देंत।

लूका 21:24

कोइ तरवारम बेक्‍नीमी। कोइ ग्‍याइश्‍शा अर्को रागीम लाइक्‍चा पुंइसीनीम। मिनु आन नाक्‍त मजाक्‍दीम सम्‍म अर्को जात ङा मुरपुकीमी यरूसलेम कली दिप्‍‍शा वोइक्‍नीम। यसैया ६३:१८; प्रकाश ११:२; रोमी ११:२५

ब्‍यवस्‍था 28:33

इन मतुइश्‍शो मुरपुकीमी इन रू ङा ख्रुम्‍शो जाइनीम। मिनु गेपुकी गेना हना यो श्‍येत जचा नु दिप्‍चा पुंइसीनीनी। न्‍यायाधीस ६:३

हिब्रू 10:29

मिनु परमप्रभु यावे आ तौ कली खोइलीम दिम्‍ब, शुश सजाइ गेशा साइक्‍चा पुंइसाक्‍म, दे तुइक्‍नय। ङोंइती आंम कली पाको सेल्‍शो नक कबल ङा हुश आ पर्बम शुक्‍शी पा “हुश नेल्‍ल कांइचीक बाक्‍ब, मार अर्को लोव़ बाक्‍बा ङा?” देंनीम। परमप्रभु यावे आ सोक्‍ती आ पर्बम यो शुक्‍शी पाइनीम। मोदेंशो पाइबपुकी शुश सजाइ गेचा मपुंइसीनीमी ङा? हिब्रू २:३; हिब्रू १२:२५

प्रकाश 19:15

मिनु मेको ङोंइती ङा बुश शारा ङोइक्‍ब आ शोव़ रे रागी रागी ङा मुर आन कली साइक्‍चा कली हेश्‍शो तरवार का ग्रूत। मिनु मेकोमी फलाम के कोक्‍केमी मेको आन कली सासन पाइब, नेल्‍ल सक्ति पाइश्‍शो परमप्रभु यावे आ गाइक्‍चा ङा कोल खोइलीमी दिम्‍ब। भजन संग्रह २:९; प्रकाश १४:१९-२०

न्‍यायाधीस 10:8

मेको बर्समी मेकोपुकीमी इस्राएली आन कली थाम्‍पा श्‍येत गेशा, साप्‍पा दिप्‍मे बाक्‍त। मिनु यर्दन खोला आ आइक्‍ची हांबु, पूर्ब गे गिलाद माइश्‍शो एमोरी आन रागीमी बाक्‍ब इस्राएली आन कली १८ बर्स सम्‍म थाम्‍पा श्‍येत गेशा दिप्‍मे बाक्‍त।