यहोसु 8:2 - Sunuwar Bible

² गे यरीको नु मेकेर ङा पिप कली मार मार पवी, ऐ सहर नु मेकेर ङा पिप कली यो मोदेंशो पावो। मेक ङा मारेइ मारेइ, बी ब्‍यफ क्‍यारश भेडा नेल्‍ल गे इन कली लांइसीन। मिनु सहर आ नोले गे हुल का मुर बाप्‍पाइश्‍शा, वोतीन” देंत। यहोसु ६:२१; ब्‍यवस्‍था २०:१०-१८

यहोसु 8:2 ပူးပေါင်းရင်းမြစ်များ

२ इतिहास 13:13

येरोबामम नोले रे जाक्‍शा लडाइ पचा कली हुल का बाप्‍पाइश्‍शा वोइश्‍शो बाक्‍माक्‍त। मिनु मेको आन लडाइ पाइब आन ठेयब हुलम चहिं यहूदा नु लडाइ पामे बाक्‍त। येरोबाम आ बाप्‍पाइश्‍शो हुल चहिं नोले रे जाक्‍मा बाक्‍त।

२ इतिहास 20:22

मिनु मेकोपुकीम कुम्‍सो पा परमप्रभु यावे कली ठेयब सेल्‍मे चोटीन परमप्रभु यावेमी बाप्‍ब हुल का वोदा बाक्‍त। मिनु यहूदा नु लडाइ पथ जाक्‍ब अम्‍मोनी, मोआबी नु सेइर डांडा ङा मुर आन कली क्‍याम्‍दा बाक्‍त।

भजन संग्रह 39:6

मुरपुकी वांकु खोदेंशो पा गाक्‍शो बाक्‍नीम। मेकोपुकी मोशा सुर्ता पाइनीम। शुश शोंप तेल्‍नीम। मेको सुम जाइबा मतुइक्‍नीम। भजन संग्रह ४९:१७-२१; उपदेसक २:१८-२१; लूका १२:१५-२१

हितोपदेस 13:22

रिम्‍शो मुरुमी आ चच युइ आन कली शोंप हेंशा वोइक्‍ब। तन्‍न मरिम्‍शो पाइब आन शोंप ठीक पाइबपुकीम ताइनीम।

हितोपदेस 28:20

थमा सुइक्‍ब मुर शुश आसीक ताइनीम। तन्‍न सुम रीब पा क्‍येट चेम्‍चा दाक्‍बा, मेको सजाइ मतथु, मब्रोंइब। हितोपदेस १३:११

येरमीया 17:11

मुर, आंम आ मपशो ब्‍वोफु पुप्‍ब क्‍येन्‍रे खोदेंशो बाक्‍ब। मेकोमी हेंथे पा शोंप चेम्‍ब। मेको आ ब्रोंइतीक नाक्‍ती उइक्‍थ दुम्‍मेनु, मेको आ शोंपोम मेको मुर कली प्रोंइब। मिनु आ बेक्‍ची ना मेको कली मूर्ख मिम्‍सीब। लूका १२:२०

येरमीया 51:12

बेबीलोन ङा गारो आ ङोंइती छेदर ख्रुक्‍‍कीन। शुश कोव़ब वोतीन। खाल पाइब वोतीन। बाप्‍ब आन कली ठीक पा वोतीन। परमप्रभु यावेमी बेबीलोन ङा मुर आन पर्बम आ मिम्‍शो पाप्‍तु।

ब्‍यवस्‍था 2:35

गो आंइ ग्राशो सहर ङा मारेइ मारेइ आंम के सेल्‍शा, बी ब्‍यफ, क्‍यारश भेडा यो आंइ कली वोंइसाक्‍क।

ब्‍यवस्‍था 20:14

तन्‍न मीश मुर, आलपुकी, बी ब्‍यफ, क्‍यारश भेडा नु सहरम बाक्‍शो मारेइ मारेइ इन के दुम्‍ब। मोपा परमप्रभु यावे, इन परमप्रभुमी गेशो ग्राशो थोव़क तशा ग्‍येरसीन।

ब्‍यवस्‍था 3:2

मिनु परमप्रभु यावेमी आं कली ‘मेको आन कली तशा महिनो। मारदे हना गो मेको नु आ मुर नेल्‍ल आन कली इन गुइमी गेता। मेको आ रागी नु आ मुरपुकी इन के दुम्‍त। मिनु गे हेश्‍बोनम बाक्‍शो एमोरी आन पिप सीहोन कली खोदेंशो पा मेको कली यो पने’ देंत।

यहोसु 10:1

मिनु यरूसलेम ङा पिप अदोनी-सेदेकमी “यहोसुमी ऐ सहर ग्राशा, खतम सेल्‍तु। मिनु यरीको नु मेकेर ङा पिप कली पाइश्‍शो खोदेंशो पा मेको ऐ सहर नु मेकेर ङा पिप कली यो पाइक्‍‍तु। मिनु गिबोन ङा मुरपुकी इस्राएली नु गारशा, मुल आन दातेमी बाक्‍शो बाक्‍तेक्‍म” दे नेंतु। यहोसु ६:-; यहोसु ८:-; यहोसु ९:-

यहोसु 10:28

मिनु मेको नाक्‍ती यहोसुमी माकेदा आंम के सेल्‍तु। मेको सहर ङा मुर नेल्‍ल आन कली नु मेकेर ङा पिप कली तरवारमी साइक्‍तु। मेकोमी मेकेर ङा मुर नेल्‍ल आन कली खतम पोक्‍तु। सुइ कली यो मप्रोन। मेकोमी यरीको ङा पिप कली पशो बुदी माकेदा ङा पिप कली यो पाइक्‍‍तु।

यहोसु 11:14

मिनु इस्राएलीपुकीमी मेको सहर ङा मार मार थोव़क नु बी ब्‍यफ, क्‍यारश भेडा आंम कली वोंइसाक्‍म। तन्‍न मुर नेल्‍ल आन कली साइक्‍तेक्‍म। नेल्‍ल आन कली खतम सेल्‍शा, का कली यो मप्रोनेम। ब्‍यवस्‍था २०:१०-१५

यहोसु 6:21

मिनु सहर ङा मीश मुर वोंइश मुर, आल, खाल्‍पी खाल्‍पा बी ब्‍यफ, क्‍यारश भेडा, गधा नेल्‍ल आन कली तरवारम साइक्‍तेक्‍म।

यहोसु 8:12

मिनु ङोंइती यहोसुमी ५ हजार लडाइ पाइब आन कली लाइश्‍शा, ऐ क्‍येङा पच्‍छिम गे बेथेल नु ऐ आस दातेम बाप्‍चा कली वोइक्‍तु।

यहोसु 8:14

मिनु सुनी कना ऐ ङा पिपमी मेको आन कली तशा, ऐ ङा लडाइ पाइब नु सहर ङा वोंइश मुर नेल्‍ल इस्राएली नु लडाइ पथ लाम्‍तेक्‍म। पिप नु आ मुर नेल्‍ल अराबाह माइक्‍तीकेमी दिंम आ ङोंइती जाक्‍तेक्‍म। तन्‍न सहर आ नोले मेकोपुकी बाप्‍शा बाक्‍शो बाक्‍नीम मतुइक्‍तेम।

यहोसु 8:19

मिनु यहोसुम आ तरवार दिंदानु, मेको बाप्‍शा बाक्‍ब लडाइ पाइब नेल्‍ल बोक्‍शा बारशा, ऐ सहर आगा ओव़तेक्‍म। मेकोपुकी ओव़शा, सहर कली आंम के सेल्‍शा, मी सुइक्‍ताक्‍म।

यहोसु 8:24

मिनु इस्राएलीपुकीमी ऐ ङा मुर नेल्‍ल आन कली, गोरशो रागी ङा दिंममी साइक्‍ने थुम्‍शा, ऐ सहर लेश्‍शा, ओव़शा, मेकेर बाक्‍शो आन कली यो तरवारमी क्‍योरशा साइक्‍तेक्‍म।

यहोसु 8:3

मिनु यहोसु नु लडाइ पाइब नेल्‍ल ऐ सहर कली लडाइ तोथ, लाम्‍तेक्‍म। यहोसुमी ३० हजार लडाइ पाइब मुर आन कली योव़शा, नाक्‍दो सोइक्‍ताक्‍व।

यहोसु 8:7

गेपुकी इन बाप्‍तीके रे बोक्‍शा ग्रूशा, सहर आंम के सेलीन। मिनु परमप्रभु यावे, इन परमप्रभुमी मेको सहर इन कली गेब।

यहोसु 8:8

परमप्रभु यावेमी आ देंशो खोदेंशो पा, सहर इन गुइमी गेवा नोले, मेको कली मी सुइक्‍तीन” दे मेको आन कली देंत।

यहोसु 8:9

मिनु यहोसुमी मेको आन कली सोइक्‍ताक्‍व। मिनु मेकोपुकी ऐ क्‍येङा पच्‍छिम बेथेल नु ऐ आस दातेम बाप्‍शा बाक्‍तेक्‍म। मिनु यहोसु मेको नाक्‍दो आ मुर आन दातेमी बाक्‍त।

यहोसु 9:3

मिनु गिबोन ङा मुरपुकीमी यहोसुमी यरीको नु ऐ सहर कली मार मार पवा, मेको लोव़ नेंशा, यहोसु ६:२०-२१; यहोसु ६:२६-२८