यहोसु 3:8 - Sunuwar Bible

⁸ गे कबल पशो सन्‍दोस कुरब चढ़ेब आन कली ‘गेपुकी यर्दन खोला आ सुर ङा ब्‍वाक्‍कुम जाक्‍दीश्‍शा, मेक उइ राप्‍शा, बाक्‍चा माल्‍नीनी’ दे अरेचा माल्‍नेवे” देंत।

यहोसु 3:8 ပူးပေါင်းရင်းမြစ်များ

२ राजा 2:6

मिनु एलीयामी मेको कली “गे एक उइ बाक्‍को। मारदे हना परमप्रभु यावेम आं कली ‘यर्दन खोला लावो’ दे सोइक्‍ताक्‍यी” देंमाक्‍त। तन्‍न एलीशामी “परमप्रभु यावे ब्रोंइशा बाक्‍शो खोदेंशो पा नु इन ब्रोंइशा बाक्‍शो खोदेंशो पा, गो इन कली मप्रोंइनुङ” देंमाक्‍त। मोपतीके मेको निम्‍फा गाक्‍सा बाक्‍त।

२ इतिहास 29:15

मिनु मेकोपुकीम आन आन लोक्‍ब आन कली खुप्‍तमे बाक्‍त। मिनु मेकोपुकीम आंम कली परमप्रभु यावे आ ङोंइती ठीक सेल्‍सीमा बाक्‍त। मिनु पिपम परमप्रभु यावेमी देंशो खोदेंशो पा हुकुम पवा बाक्‍त। मिनु मेकोपुकीम परमप्रभु यावे आ खिं ओव़शा, ग्रांग्रा दि‍शो मार मार ग्रुंइदमे बाक्‍त।

२ इतिहास 29:27

मिनु हिज्‍कीयाहम चोशा चढ़ेशो चढ़ेतीकेम चढ़ेचा माल्‍नीम, दे हुकुम पवा बाक्‍त। मिनु चोशा चढ़ेतीकेम चढ़ेचा गोव़मेनु, परमप्रभु यावे कली कुम्‍सो पामे बाक्‍त। तुराही नु इस्राएल ङा पिप दाऊदमी सेल्‍शो ताप्‍तीक मेको कुम्‍सो नु ताप्‍मे बाक्‍त। १इतिहास २३:५

२ इतिहास 29:30

मिनु पिप हिज्‍कीयाह नु मेको आ सरकार ङा ठेयब मुरपुकीम लेवी आन कली दाऊद नु परमप्रभु यावे आ लोव़ पाइब आसाफ आ ब्रेक्‍शो कुम्‍सो पा परमप्रभु यावे कली ठेयब सेल्‍पदमे बाक्‍त। मोपा मेकोपुकीम थाम्‍पा ग्‍येरसीशा परमप्रभु यावे आ ङोंइती बाप्‍शा ठेयब सेल्‍मे बाक्‍त। २इतिहास २३:१८

२ इतिहास 30:12

परमप्रभु यावेमी यहूदा ङा मुर यो थुं का दुम्‍पदा बाक्‍त। मिनु मेकोपुकीमी पिप नु सरकार ङा ठेयब मुर आन कली देंशो, परमप्रभु यावे आ लोव़ खोदेंशो पा पामे बाक्‍त।

नेहेम्‍याह 13:22

मिनु गो लेवी आन कली ब्रेश्‍शा “आंम कली ठीक सेल्‍सीने। नाइक्‍तीक नाक्‍त परमप्रभु यावे के बाक्‍ब, दे मानेचा कली ठेयब लाप्‍चोपुकी खाल पथ बाक्‍कीन” दे माइक्‍तामी। मिनु गो “आं परमप्रभु, आं ओदेंशो पशो यो मिम्‍तीन। मिनु इन ठेयब नु गेना हना यो दाक्‍तीके कोंइ‍दीनी” देंती।

नेहेम्‍याह 13:28

मिनु नेल्‍ल क्‍येङा ठेयब चढ़ेब एल्‍याशीब आ चच, येहो-यादा आ तौमी होरोनी सान्‍बल्‍लत आ तमी का चाक्‍शो बाक्‍त। मोपतीके गो मेको कली आं ङोंइती रे ग्रुंइशा खेरता। नेहेम्‍याह २:१०,१९; नेहेम्‍याह १२:१०

प्रस्‍थान 14:13

मिनु मोसामी मुर आन कली “महिनीन। मुलाक्‍ती परमप्रभु यावेमी दोपा इन कली इजीप्‍त ङा मुर रे प्रोंइबा, कोव़शा बाक्‍कीन। मुलाक्‍ती तशो इजीप्‍त ङा मुर आन कली गे लेंशा गेनायो मताइनीनी।

बिलाप 3:26

सिक्‍सी पा परमप्रभु यावे आ श्‍येत रे प्रोंइतीके रिम्‍चा रिम्‍शो दुम्‍ब। रोमी ८:२५

यहोसु 3:17

मिनु मुरपुकी गाक्‍शा, सोव़शो खपीम यर्दन शोक्‍सीचा गोम्‍तेक्‍म। मिनु परमप्रभु यावे आ कबल पशो सन्‍दोस कुरब चढ़ेबपुकी यर्दन आ दातेमी सोव़शो खपीम राप्‍शा, रिम्‍शा बाक्‍तेक्‍म। मिनु इस्राएली नेल्‍ल सोव़शो खपीम गाक्‍शा, यर्दन आइक्‍ची हांबु जाक्‍दीत्‍तेक्‍म।

यहोसु 3:3

मिनु मेकोपुकीमी मुर आन कली “गेपुकी गेना परमप्रभु यावे, इन परमप्रभु आ कबल पशो सन्‍दोस चढ़ेब लेवीपुकीम कुरशो ताइनीनी, मेना छुल छाल बोक्‍शा, इन मारेइ मारेइ कुरशा, मेको आन नोले खोतीन।

यहोसु 3:7

मिनु परमप्रभु यावेमी यहोसु कली “मुलाक्‍त रे गो इ कली इस्राएली नेल्‍ल आन ङोंइती ठेयब सेल्‍नन। दोपा गो मोसा नु बाक्‍ङा, मोपा गे नु यो बाक्‍नुङ, दे नेल्‍ल आन कली तुइक्‍पाइक्‍नुङ। यहोसु ४:१४; यहोसु १:५,१७

यहोसु 3:9

मिनु यहोसुमी इस्राएली आन कली “ओंथ पिन। मिनु परमप्रभु यावे, इन परमप्रभु आ लोव़ नेनीन” देंत।

यहोसु 4:11

मिनु मुरपुकी शोक्‍ने थुम्‍मे नोले, परमप्रभु यावे आ कबल पशो सन्‍दोस कुरब आन ङोंइती चढ़ेबपुकी यो शोक्‍साक्‍म।