यूहन्‍ना 6:63 - Sunuwar Bible

⁶³ परमप्रभु यावे आ सोक्‍त ब्रोंइचा गेब बाक्‍ब। मुरुम चहिं मारेइ पने मचाप्‍नीम। आं देंशो लोव़ परमप्रभु यावे आ सोक्‍ती ङा ब्रोंइचा गेब लोव़ बाक्‍ब।

यूहन्‍ना 6:63 ပူးပေါင်းရင်းမြစ်များ

उत्पत्ती 2:7

मिनु नोले परमप्रभु यावेमी रू ङा खप के मुर का सेला बाक्‍त। मिनु मुर आ नेंमी ब्रोंइतीक सोक्‍त मुइक्‍ता बाक्‍त। मिनु मुर सोक्‍त पाइश्‍शो दुम्‍माक्‍त। उत्‍पत्ती ३:१९; अय्‍युब १०:९; अय्‍युब ३३:४; भजन संग्रह १०४:२९-३०; १कोरिन्‍थी १५:४५,४७

भजन संग्रह 119:130

इन लोव़ नेंशोनु, रुप्‍तीक थुं गेब। मतुइक्‍ब आन कली तुइक्‍ब सेल्‍ब।

भजन संग्रह 119:50

गो श्‍येत जङानु, इन थोक्‍शा पशो लोव़मी आं कली लेम्‍शा ब्रोंइचा गेब।

भजन संग्रह 119:93

गो इन अरेशा ब्रेक्‍शो लोव़ गेनायो मप्रेंनुङ। मारदे हना गे मेको आ पतीकेमी आं कली ब्रोंइपाइक्‍तीनी।

हितोपदेस 4:13

अर्ती कली मिम्‍शा, मेको कली मप्रेंदो। मेको कली टिवो। मारदे हना मेको इ ब्रोंइतीक बाक्‍ब।

यूहन्‍ना 5:21

मिनु आं आफोमी बेक्‍शो आन कली दोपा सेंबा, मोपा आ तौमी यो सु कली बेक्‍शो रे सेंचा दाक्‍बा, मेको कली सेंपाइक्‍ब। दानीएल ७:१३-१४; प्रेरित १०:४२

यूहन्‍ना 6:68

मिनु सिमोन पत्रुसमी “प्रभु, गो सु का आ नोले खोइक्‍नीकी? गे गेना हना यो ब्रोंइशा बाक्‍चा ङा लोव़ पाइनीनी।

प्रेरित 5:20

मिनु ग्रुंइशा “परमप्रभु यावे आ खिं लशा, मुर आन कली येसु आ नेंमी ब्रोंइतीक लां आ पर्बम शेंदीने” दे सोइक्‍तीमी बाक्‍त।

रोमी 10:17

ङोंइती ख्रीस्‍त आ लोव़ नेंशा तुइक्‍पाइक्‍चा माल्‍नीम। मेको लोव़ नेंशा ला थमा सुइक्‍ने चाप्‍नीम।

रोमी 2:25

गे ख्रोइक्‍तीक चिनु ख्रोइश्‍शा, परमप्रभु यावे आ आ अरेशो लोव़ टीतीनी हना, रिम्‍शो दुम्‍ब। तन्‍न ख्रोइक्‍तीक चिनु ख्रोइश्‍शा आ अरेशो मटीतीनी हना, गे ख्रोइक्‍तीक चिनु मख्रोइश्‍शो खोदेंशो दुम्‍नीनी।

रोमी 8:2

मारदे हना येसु ख्रीस्‍त आ ब्रोंइचा गेब सोक्‍त आ अरेशो लोव़मी इन कली पाप पचा नु बेक्‍चा आ अरेशो लोव़ रे प्रोंइतु।

१ कोरिन्‍थी 15:45

मार ब्रेक्‍शो बाक्‍ब देंशा हना “नेल्‍ल क्‍येङा ङोंइती ङा मुर, आदम, ब्रोंइब दुम्‍माक्‍त” दे ब्रेक्‍शो बाक्‍ब। नेल्‍ल क्‍येङा नोले ङा आदम चहिं ब्रोंइतीक सोक्‍त गेब दुम्‍त। उत्‍पत्ती २:७; २कोरिन्‍थी ३:१७

गलाती 5:25

गो परमप्रभु यावे आ सोक्‍तीमी ब्रोंइतय हना, इं गेय यो परमप्रभु यावे आ सोक्‍तीमीन पय। रोमी ८:४

गलाती 5:6

ख्रीस्‍त येसु नु थुं का दुम्‍शा, ख्रोइक्‍तीक चिनु ख्रोइश्‍शो, मख्रोइश्‍शो आन कली मतिल्‍थु, थमा सुइक्‍तीकेमी दुशा गारशा दाक्‍मुशा बाक्‍शोम सक्ति बाक्‍ब। गलाती ६:१५; रोमी २:२६; १कोरिन्‍थी ७:१९

गलाती 6:15

ख्रोइक्‍तीक चिनु ख्रोइक्‍चा, मख्रोइक्‍चा मेको ममिम्‍तीने। ख्रीस्‍त येसु नु थुं का दुम्‍शा, नक मुर दुम्‍चा चहिं नेल्‍ल क्‍येङा ठेयब बाक्‍ब, दे रुपीने। गलाती ५:६; १कोरिन्‍थी ७:१९; २कोरिन्‍थी ५:१७

ब्‍यवस्‍था 32:47

मारदे हना एको इन कली आइक्‍च लोव़ ममाइ। एको इन ब्रोंइतीक बाक्‍ब। एको पशा, गेपुकी यर्दन शोक्‍शा इन के सेल्‍शो रागीम शुश नाक्‍त ब्रोंइनीनी” दे माइक्‍तीमी। लेवी १८:५

१ थिस्‍सलोनिकी 2:13

गेपुकीमी आंइ शेंशो परमप्रभु यावे आ लोव़ नेंशा, मुर आ लोव़ ममाइ, थमा पा परमप्रभु यावे आ लोव़ बाक्‍ब, दे तुइक्‍ताक्‍नी। थमा सुइश्‍शा मेको लोव़मी इन थुंमी गेय पना पन बाक्‍ब। मो दुम्‍मेनु, गोपुकीमी परमप्रभु यावे कली “गे थिस्‍सलोनिकी ङा मुर आन कली रिम्‍शो पाइतीनी” देंना देंन बाक्‍नीकी। गलाती १:११-१२

१ तिमोथी 4:8

रां कली रिम्‍शो पतीके इच्‍का ला रिम्‍शो बाक्‍ब। परमप्रभु यावे कली मिम्‍शा दाक्‍तीके नेल्‍ल क्‍येङा रिम्‍शो बाक्‍ब। मारदे हना मुल कली रिम्‍शो बाक्‍ब नु गेना हना यो परमप्रभु यावे नु बाक्‍चा कली नोले यो रिम्‍शो बाक्‍ब। १तिमोथी ६:६

हिब्रू 13:9

मुल सम्‍म मनेंशो नु दूली शेंब लोव़मी इन थुं क्‍याल्‍चा मगेने। परमप्रभु यावे आ शिशीमी रिम्‍शो थुं पाइश्‍शो दुम्‍तय, दे गेनायो मप्रेंदीने। चोव़खो जशोमी ठीक थुं मसेल्‍ब, दे रुपीने। एफिसी ४:१४; २कोरिन्‍थी १:२१; रोमी १४:१७; १तिमोथी ४:८

हिब्रू 4:12

मारदे हना परमप्रभु यावे आ लोव़ ब्रोंइतीक सक्ति पाइश्‍शो, गेय पाइब नु निम्‍फा पटटी हेश्‍‍शो तरवार क्‍येङा हेश्‍शो बाक्‍ब। मेकोमी श्‍ये नु रुश, सोक्‍त नु थुं तिल्‍ब। मिनु मिम्‍तीके नु थुं ङा लोव़ नेल्‍ल नाक्‍ने चाप्‍ब। प्रकाश २:१२; येरमीया २३:२९

याकूब 1:18

परमप्रभु यावेमी इं कली आ थमा लोव़ पतीकेमी नक जरमेशो मुर सेल्‍तु। मोदेंशो पा ङोंइती सिश्‍शो फल खोदेंशो पा आ मुर दुम्‍तय। यूहन्‍ना १:१३; १पत्रुस १:१:२३

१ पत्रुस 1:23

गे नक जरमेशो खोदेंशो बाक्‍नीनी। जाम्‍शा लाइब ममाइ। गेनायो मजाम्‍ब दुम्‍तीनी। मेकोन ब्रोंइचा गेब नु गेना हना यो लीब परमप्रभु यावे आ लोव़ बाक्‍ब। यूहन्‍ना १:१३; याकूब १:१-१८

१ पत्रुस 3:18

मारदे हना ख्रीस्‍त यो मुर नेल्‍ल आन पाप क्‍याम्‍चा कली साइक्‍चा पुंइसाक्‍व। ठीक पाइबमी ठीक मपाइब आन श्‍येत जाप्‍तु। मो पशा इं कली परमप्रभु यावे आ बाक्‍तीक चाक्‍दीप्‍ब। मोपतीके साइक्‍चा पुंइसीशा यो, सेंचा पुंइसाक्‍व।

१ पत्रुस 3:21

ब्‍वाक्‍कुमी ख्रुम्‍शा ग्रुंइतीके मेको नु गारचा ङा बाक्‍ब। मेकोमी इन कली मुल प्रोंइब। इन रां चिक्‍चा ममाइ, तन्‍न इन थुं ङा मिम्‍तीके रिम्‍शो दुम्‍ल, दे परमप्रभु यावे कली पुंइतीके बाक्‍ब। मेको नेल्‍ल येसु ख्रीस्‍त आ सेंसीशो रे जाक्‍ब। एफिसी ५:२६; हिब्रू १०:२२