यूहन्‍ना 3:8 - Sunuwar Bible

⁸ फश ते रे जाक्‍ब, ते लाइबा मतुंइ‍सीब। आ रेयके नेंशा यो ते रे ग्रूबा, ते ते लाइबा, मतुंइ‍सीब। परमप्रभु यावे आ सोक्‍त रे जरमेशो मुर मेको खोदेंशो बाक्‍नीम” देंत।

यूहन्‍ना 3:8 ပူးပေါင်းရင်းမြစ်များ

भजन संग्रह 107:25

मिनु मेकोमी अरेशा, ठेयब फश गिवार पपाइक्‍तु। मिनु ठेयब समुन्‍द्र आ छाल पोक्‍तु।

भजन संग्रह 107:29

मेकोमी फश गिवार दिक्‍पाइक्‍तु। मिनु ठेयब समुन्‍द्र आ छाल दिक्‍तेक्‍म।

भजन संग्रह 135:7

मेकोमी रागी आ सुर सुर रे गोस्‍स पोक्‍ब। मेकोमी चिला दाप्‍पाइश्‍शा, रेउ यिपाइक्‍ब। मिनु मेकोमी आ बाक्‍तीक रे फश पपाइक्‍ब। येरमीया १०:१३

उपदेसक 1:6

फश दक्‍खिन गे पाइब। मिनु उत्तर गे लाइब। मेको गेना हना यो आ हिरतीकेम हिरशा लेप्‍ब।

इजीकीएल 37:9

मिनु मेकोमी आं कली “ए मुर, सोक्‍त कली आं लोव़ पावो। गे मुर, आं लोव़ पावो। मेको आन कली परमप्रभु, परमप्रभु यावेमी ‘ए सोक्‍त, पूर्ब, पच्‍छिम, उत्तर दक्‍खिन रे जाक्‍कीन। मिनु एको बेक्‍शो आन कली मुइक्‍तीन। मिनु ब्रोंइम‍ल’ देनो” देंत।

यूहन्‍ना 1:13

ठेयब जातमी जरमेतीके, मुर आन दाक्‍शोमी जरमेतीके नु मुर आन थुंमी मिम्‍शोमी ममाइ तन्‍न परमप्रभु यावे आ पतीके ला आ तमी तौ दुम्‍ने चाप्‍नीम। यूहन्‍ना ३:५-६

यूहन्‍ना 3:7

मुर लेंशा जरमेचा माल्‍ब, दे आं लोव़ नेंशा छक मलाक्‍कीन।

यूहन्‍ना 3:9

मिनु निकोदेमसमी “इन देंशो दोपा दुम्‍ने चाप्‍बा ङा?” दे हिल्‍लो पाप्‍तु।

प्रेरित 2:2

मिनु सरीङ रे हुरुर पा फश खोदेंशो फो ग्रूशा, आन बाक्‍तीक प्रिंशा थुरशा रेयके पवा बाक्‍त।

प्रेरित 4:31

मोदेंशो प्रार्थना पने थुम्‍मे चोटीन ख्रिनु कुशो खोदेंशो पा आन बुक्‍शा बाक्‍तीके एर ओंथ नेल्‍ल हिम्‍से बाक्‍त। मिनु नेल्‍ले परमप्रभु यावे आ सोक्‍तीम प्रिंचा पुंइसमा बाक्‍त। मिनु महिंथु ठेयब थुं पा परमप्रभु आ लोव़ शेंना शेंन गाक्‍बाक्‍मा बाक्‍त।

१ कोरिन्‍थी 12:11

मोदेंशो सक्ति पाइश्‍शो गेय नेल्‍ले परमप्रभु यावे आ सोक्‍तीमी पपाइश्‍शो बाक्‍ब। मिनु परमप्रभु यावे आ सोक्‍तीमी आ दाक्‍स पा सु सु आन कली गेचा दाक्‍बा, मेको आन कली गेब। रोमी १२:३; एफिसी ४:७

१ कोरिन्‍थी 2:11

मुर आन थुंमी मार बाक्‍बा, सुमी तुइक्‍नीमी ङा? आंम आन थुं ङा लोव़ आंमा ला तुइक्‍नीम। परमप्रभु यावे आ सोक्‍त ङा लाक्‍शा सुइमी परमप्रभु यावे आ थुं ङा लोव़ मतुइक्‍नीम, आ सोक्‍तीम ला तुइक्‍ब।

१ यूहन्‍ना 2:29

“येसु ख्रीस्‍त नेल्‍ल ठीक पाइब बाक्‍ब” दे तुइक्‍ताक्‍नी हना, सु सुम ठीक पाइनीमी, मेको नेल्‍ल परमप्रभु आ आलपुकी नमी, दे तुइक्‍नीनी। १यूहन्‍ना ३:७-१०