यूहन्‍ना 3:16 - Sunuwar Bible

¹⁶ परमप्रभु यावेमी रागी ङा मुर आन कली शुश दाक्‍ताक्‍व। मोपतीके आ कांइचीक तौ रागीमी सोइक्‍ताक्‍व। सु सुमी मेको कली थमा सुइक्‍नीमी, मेकोपुकी नरक मलाइनीम। तन्‍न गेना हना यो परमप्रभु यावे नु बाक्‍चा ताइनीम। रोमी ५:८; रोमी ८:३२; १यूहन्‍ना ४:९

यूहन्‍ना 3:16 ပူးပေါင်းရင်းမြစ်များ

उत्पत्ती 22:12

मेकोमी “इ तौ कली मक्‍योरो। मेको कली मारेइ मपतो। मारदे हना गे परमप्रभु कली मान पा हिंबाक्‍ते। गो मुल तुइक्‍ताक्‍ङ। गे इ का ला बाक्‍शो तौ आं कली गेचा ठीक पाप्‍तीवी। इ का ला तौ यो आं कली गेचा टीबाक्‍ते” देंमाक्‍त। रोमी ८:३२; हिब्रू ११:१७

उत्पत्ती 22:2

मिनु मेकोमी “इ तौ लतो। का ला बाक्‍शो दाक्‍शो इ तौ इसहाक लतो। मिनु मोरीयाह रागी लावो। मेकेर लशा, इ तौ कली चोशा चढ़ेयी। तेको डांडाम चढ़ेचा माल्‍नेवे, गो इ कली कोंइन‍न” देंमाक्‍त।

यसैया 9:6

मारदे हना आंइ कली आल का थिशो बाक्‍ब। तौ का गेशो बाक्‍ब। मेको आंइ कली रिम्‍शो पा सासन पाइब दुम्‍ब। मेको आ नें मार बाक्‍ब देंशा हना, छक लाक्‍चा ङा गेय पाइब, जोक्‍तीक तुइक्‍तीक अर्ती गेब, सक्ति पाइश्‍शो परमप्रभु, गेना हना यो बाक्‍ब आफ नु थुं नाइश्‍शा बाक्‍चा गेब पिप बाक्‍ब। यसैया २२:२२; मीका ५:१; मीका ४:३

मत्ती 9:13

चढ़ेतीक ममाइ, तन्‍न शिशी पशो तचा दाक्‍नुङ, दे देंशो आ अर्थ मार बाक्‍म, दे शेंसीने। ठीक पाइब आन कली ब्रेत्‍थ जाक्‍शो मनङ। पापी आन कली ब्रेत्‍थ जाक्‍शो नङ” दे माइक्‍तीमी। होसे ६:६; मत्ती १२:७; १सामुएल १५:२२; मत्ती १८:११

मर्कूस 12:6

मिनु सोइक्‍ने चाप्‍चा ङा का ला लीमाक्‍त। मेको आ दाक्‍शो तौ बाक्‍माक्‍त। मिनु ‘आं तौ आ देंशो टीनीम’ दे मिम्‍शा, आ तौ कली सोइक्‍ता बाक्‍त।

लूका 2:14

“नेल्‍ल क्‍येङा इर ङा परमप्रभु यावे नेल्‍ल क्‍येङा ठेयब बाक्‍ब। आ दाक्‍शो मुर आन कली थुं नाइश्‍शा बाक्‍चा गेब” दे कुम्‍सो पामे बाक्‍त। लूका १९:३८; गन्‍ती ६:२६; एफिसी २:१४,१७

यूहन्‍ना 1:14

मिनु लोव़ माइश्‍शो मुर दुम्‍शा, गोपुकी नु बाक्‍शो बाक्‍त। मेको शिशी पाइब नु परमप्रभु यावे आ लां कोंइब बाक्‍त। गोपुकीमी “परमप्रभु यावे आ कांइचीक तौ बाक्‍ब” दे तुइश्‍शा, मेको कली परमप्रभु यावे आ छेङछेङ, आ शिशी नु आ थमा पतीकेमी ब्रीशो ताइतक। १तिमोथी ३:१६; प्रस्‍थान ३३:१८; यसैया ६०:१; २पत्रुस १:१६-१७

यूहन्‍ना 1:18

मुरपुकीमी परमप्रभु यावे कली गेनायो मतामे। तन्‍न परमप्रभु यावे नु बाक्‍ब आ कांइचीक तौमी मुर आन कली परमप्रभु यावे कली तुइक्‍पाइक्‍तु। यूहन्‍ना ६:४६; मत्ती ११:२७

यूहन्‍ना 1:29

आ दीसा यूहन्‍नामी येसु कली आ बाक्‍तीक गे पिना पिन पशो तशा “परमप्रभु यावे आ पाठा मेकोन बाक्‍ब। मेकोमी रागी नेल्‍ल ङा मुर आन मरिम्‍शो पशो क्‍याम्‍ब। यसैया ५३:७

यूहन्‍ना 10:28

गो मेको आन कली परमप्रभु यावे नु गेना हना यो ब्रोंइशा बाक्‍चा गेनुङमी। मेको नरकम मलाइनीम। सुइमी आं गुइ रे रोइश्‍शा, लाइक्‍ने मचाप्‍नीम।

यूहन्‍ना 3:15

मारदे क्‍युक्‍चा पुंइसीब देंशा हना, सुमी मेको कली थमा सुइक्‍बा, मेको गेना हना यो ब्रोंइशा बाक्‍चा ताइब” देंत।

यूहन्‍ना 3:18

सुमी परमप्रभु यावे आ तौ कली थमा सुइक्‍बा, मेको स्‍वर्गमी निसाफ पचा मपुंइसीब। सुमी चहिं थमा मसुइक्‍बा, मेको ङोंइती रेन निसाफ पा सजाइ तचा पुंइसीब दुम्‍शो बाक्‍ब। मारदे हना मेकोमी परमप्रभु यावे आ कांइचीक तौमी पाप रे प्रोंइब, दे थमा मसुइश्‍शो बाक्‍ब। यूहन्‍ना ५:२४

यूहन्‍ना 3:36

सुमी आ तौ आ देंशो थमा सुइक्‍बा, मेको गेना हना यो ब्रोंइशा बाक्‍चा ताइब। सुम चहिं आ देंशो मटीबा, मेको गेना हना यो ब्रोंइशा बाक्‍चा मतथु, परमप्रभु यावे आ गाइश्‍शो ताइब” दे यूहन्‍नामी शेंताक्‍व।

यूहन्‍ना 6:40

मिनु सु सुमी परमप्रभु यावे आ तौ, दे आं कली तुइक्‍नीमी नु थमा सुइक्‍नीम। मेको आन कली नोले ङा नाक्‍तीमी सेंपाइश्‍शा, गेना हना यो ब्रोंइशा बाक्‍चा गेनुङमी। आं आफ आ दाक्‍शो गेय मेकोन बाक्‍त” दे यहूदी आन कली शेंताक्‍व। यूहन्‍ना ५:२९; यूहन्‍ना ११:२४

रोमी 5:10

ङोंइती गोपुकी परमप्रभु यावे आ जोरी सत्रु दुम्‍शा बाक्‍यानु, आ तौ आ बेक्‍शोमीन परमप्रभु यावेमी इं कली आ दाक्‍शो मुर सेल्‍तु। आ दाक्‍शो मुर दुम्‍शा, येसु आ ब्रोंइशोमीन सजाइ जचा रे मब्रोंइया ङा? ब्रोंइतय। २कोरिन्‍थी ५:१८; रोमी ८:७; कलस्‍सी १:२१

रोमी 5:8

तन्‍न परमप्रभु यावेमी इं कली शुश दाक्‍शा, गो पापी, इं बेक्‍चा आ पा ङा ख्रीस्‍त कली बेक्‍चा गेप्‍तु। यूहन्‍ना ३:१६; १यूहन्‍ना ४:१०

रोमी 8:32

परमप्रभु यावेमी इं कली दाक्‍शा, आ दाक्‍शो तौ कली इं पाप क्‍याम्‍चा कली बेक्‍चा गेप्‍तु। मोपा आ दाक्‍शो तौ लाइ गेवानु, इं कली मार मार माल्‍या, मेको मगेबा ङा? गेब।

एफिसी 2:4

तन्‍न परमप्रभु यावे शुश शिशी पाइब दुम्‍तीके इं कली तशा, शिशी पा दाक्‍ताक्‍व।

२ थिस्‍सलोनिकी 2:16

इं प्रभु येसु ख्रीस्‍त नु इं आफ परमप्रभु यावे आस शिशीमी इं कली दाक्‍शा, गेना हना यो थुं बारपाइश्‍शा, रिम्‍शो आस गेम्‍ताक्‍स।

तीतस 3:4

तन्‍न पाप रे प्रोंइब परमप्रभु यावे आ रिम्‍शो पतीके, आ दाक्‍तीके नु शिशी जाक्‍त। तीतस २:११

हिब्रू 2:9

गोपुकीमी येसु कली मान पाइक्‍चा पुंइसीतीके, छेङछेङ ङा सिरपेच गुप्‍शो नु सक्ति पाइश्‍शो दुम्‍शो ताइतय। रागीम बाक्‍मेनु, परमप्रभु यावे आ स्‍वर्ग ङा गेय पाइब क्‍येङा इच्‍ची आइक्‍च दुम्‍शो बाक्‍त। मारदे हना परमप्रभु यावेमी मुर नेल्‍ल आन कली शिशी पाइनुङ, दे कोंइचा कली मुर आन पर्बम श्‍येत जपाइश्‍शा बेक्‍चा गेप्‍तु। फिलिप्‍पी २:८-९

१ यूहन्‍ना 3:1

इं आफोमी इं कली शुश दाक्‍शा “परमप्रभु यावे आ तमी तौ” दे नें वोइश्‍शो बाक्‍त। मिनु गोपुकी आ तमी तौ दुम्‍तय। मोपतीके रागी ङा मुरपुकीमी इं कली मतुइक्‍नीम। मारदे मतुइक्‍नीम देंशा हना, मेकोपुकीमी येसु ख्रीस्‍त कली यो मतुइक्‍नीम। यूहन्‍ना १:१२; यूहन्‍ना १६:३

१ यूहन्‍ना 4:19

गोपुकी चहिं परमप्रभु यावे कली मारदे दाक्‍नय देंशा हना, मेकोमी ङोंइती इं कली शुश दाक्‍ताक्‍व।

प्रकाश 1:5

मिनु येसु ख्रीस्‍तमी यो मो देंत। मिनु मेको सु बाक्‍ब देंशा हना, परमप्रभु यावे आ देंशो थमा पाइब सांकछी नु नेल्‍ल क्‍येङा ङोंइती बेक्‍शो रे सेंसीशो नु रागी ङा पिप आन कली सासन पाइब बाक्‍ब। येसु ख्रीस्‍तमी इं कली दाक्‍शा, आ हुशेमी इं पाप रे प्रोंइतु। प्रकाश ३:१४; यूहन्‍ना १८:३७; १तिमोथी ६:१३