यूहन्‍ना 17:22 - Sunuwar Bible

²² गेमी आं कली गेशो सक्ति मेको आन कली गेतामी। मारदे गेतामी देंशा हना, गो निक्‍शी थुं का ङा दुम्‍शो खोदेंशो पा, मेकोपुकी यो गे नु थुं का ङा दुम्‍मल, दे मेको सक्ति गेतामी। प्रेरित ४:३२

यूहन्‍ना 17:22 ပူးပေါင်းရင်းမြစ်များ

मर्कूस 6:7

मिनु काबु आ १२ जना शेंसीब आन कली ब्रेश्‍शा, निनिक्‍शी पा शेंथ सोइक्‍चा गोवा बाक्‍त। शेंसीब आन कली वोल खेरतीक सक्ति गेवा बाक्‍त। लूका १०:१

लूका 22:30

आं राज्‍यमी गो नु काथा बाक्‍शा, जचा तूचा ताइनी‍नी। मिनु इं इस्राएल ङा १२ थर आन कली निसाफ पाइनीनी” दे माइक्‍मी बाक्‍त। मत्ती १९:२८

यूहन्‍ना 1:14

मिनु लोव़ माइश्‍शो मुर दुम्‍शा, गोपुकी नु बाक्‍शो बाक्‍त। मेको शिशी पाइब नु परमप्रभु यावे आ लां कोंइब बाक्‍त। गोपुकीमी “परमप्रभु यावे आ कांइचीक तौ बाक्‍ब” दे तुइश्‍शा, मेको कली परमप्रभु यावे आ छेङछेङ, आ शिशी नु आ थमा पतीकेमी ब्रीशो ताइतक। १तिमोथी ३:१६; प्रस्‍थान ३३:१८; यसैया ६०:१; २पत्रुस १:१६-१७

यूहन्‍ना 1:16

आ शिशी पतीक गो शुश शिशी तना तन बाक्‍तक। यूहन्‍ना ३:३४; कलस्‍सी १:१९

यूहन्‍ना 14:20

मिनु आं आफ आ आगाम बाक्‍नुङ। गेपुकी आं आगामी बाक्‍नीनी। मिनु गो इन आगामी बाक्‍नुङ, दे मेना रुप्‍शा तुइक्‍नीनी।

यूहन्‍ना 17:24

आं आफ, आं कली गेशो मुरपुकी गो नु काथा बाक्‍मल, दे पुंइनुङ। गे रागी सेल्‍चा ङोंइती आं कली दाक्‍शा, इन सक्ति आं कली गेतीनी। मिनु मेकोपुकीमी यो आं सक्ति तामेक्‍ल। यूहन्‍ना १२:२६; हितोपदेस ८:२२-३१

प्रेरित 5:41

मिनु सोइश्‍शोपुकी ग्‍येरसीशा, मेकेर रे लमा बाक्‍त। मारदे हना “येसु आ नेंमी श्‍येत जचा रिम्‍शो दुम्‍ब” देंमा बाक्‍त। मत्ती ५:१०-१२; १पत्रुस ४:१३

रोमी 8:30

आ तौ खोदेंशो दुम्‍मल, दे योव़चा पुंइसीब आन कली ब्रेत्‍ताक्‍व। मिनु ब्रेश्‍शो आन कली ठीक सेल्‍‍तु। मिनु ठीक दुम्‍शो आन कली बेक्‍चा रे प्रोंइशा, आ नु काथा बाक्‍चा गेब। १थिस्‍सलोनिकी २:१३,१४; रोमी ३:२६

२ कोरिन्‍थी 3:18

गो नेल्‍ल इं थुं गिल्‍शो वा हुक्‍शा, प्रभु आ छेङछेङ कोंइशा, प्रभु आ छेङछेङ पाइश्‍शो खोदेंशो दुम्‍शा फाइक्‍चा पुंइसाक्‍य। मेको फाइक्‍तीके बारना बारन लशा, इं कली छेङछेङ का रे अर्को छेङछेङम फाइक्‍ब। मेको नेल्‍ल प्रभु रे जाक्‍ब। मेको सोक्‍त बाक्‍ब। २कोरिन्‍थी ४:६

२ कोरिन्‍थी 5:20

मिनु गो ख्रीस्‍त आ पर्बम मुर आन कली गेय पाइब बाक्‍नीकी। परमप्रभु यावेमी आंइ पतीकेमी मुर आन कली ब्रेप्‍ब। गोपुकी ख्रीस्‍त आ पर्बम मुर नेल्‍ल आन कली “परमप्रभु यावे नु गारब दुमीने” दे शेंनीकी। लूका १०:१६

२ कोरिन्‍थी 6:1

गो परमप्रभु यावे नु गेय पतीके इन कली “परमप्रभु यावे आ शिशी त‍शा, मप्रेंदीन” देंनीकी। २कोरिन्‍थी १:२४

एफिसी 2:20

मिनु ख्रीस्‍त आ सोइश्‍शो नु साइ ङा परमप्रभु यावे आ लोव़ पाइबपुकी जग खोदेंशो दुम्‍तेक्‍म। गेपुकी चहिं मेको तारी सेल्‍शो खिं खोदेंशो ननी। ख्रीस्‍त येसु मेको खिं ङा ङोंइती वोइश्‍शो जग फुल्‍लु खोदेंशो बाक्‍ब। मत्ती १६:१८; यसैया २८:१६; १पत्रुस २:४-६ मत्ती १६:१८

फिलिप्‍पी 1:29

ख्रीस्‍त कली थमा सुइक्‍चा ला इन कली गेशो ममाइ, तन्‍न मेको आ पर्बम श्‍येत जचा यो गेशो बाक्‍ब।

कलस्‍सी 1:24

मुल गो इन पर्बम श्‍येत जाता हना यो, ग्‍येरसाक्‍यी। मारदे हना आं रांमी ख्रीस्‍त आ लीशो श्‍येत थुम्‍पाइक्‍नुङ। ख्रीस्‍त आ लीशो श्‍येत थमा सुइक्‍ब आन पर्बम बाक्‍ब। मेकोपुकी ख्रीस्‍त आ रां बाक्‍नीम। एफिसी ३:१३; २तिमोथी २:१०

१ यूहन्‍ना 1:3

मिनु आंइ तशो नु नेंशो इन कली शेंनीकी। मारदे हना गो नेल्‍ल थुं का ङा दुम्‍यल। मिनु गो नेल्‍ल इं आफ परमप्रभु यावे नु आ तौ येसु ख्रीस्‍त नु थुं का ङा बाक्‍नय।

१ यूहन्‍ना 3:24

सुमी आ अरेशो लोव़ पाइबा, येसु नु थुं का ङा बाक्‍ब। मिनु येसु यो मेको मुर नु थुं का ङा बाक्‍ब। परमप्रभु यावे नु गोपुकी थुं का ङा दुम्‍तय, दे दोपा तुइक्‍नय देंशा हना, मेकोमी गेशो सोक्‍तीमी शेंशो रे तुइक्‍नय। १यूहन्‍ना ४:१३; रोमी ८:९

१ यूहन्‍ना 4:17

दोपा मुर आन कली दाक्‍चा रिम्‍शो दुम्‍त देंशा हना, गोपुकी परमप्रभु यावे आ निसाफ पची नाक्‍त महिंनय। मारदे हना गोपुकी परमप्रभु यावे नु थुं का ङा दुम्‍शा, रागीमी बाक्‍नय। १यूहन्‍ना २:२८

प्रकाश 21:14

मिनु मेको सहर ङा गारोमी १२ ओटा जग बाक्‍तेक्‍म। मेको जगमी पाठा आ सोइश्‍शो १२ जना आन नें ब्रेक्‍शो बाक्‍तेक्‍म।