येरमीया 44:3 - Sunuwar Bible

³ मारदे मोदेंशो दुम्‍त देंशा हना, मेकेर ङा मुरुमी आं अरेशो मटिथु, गाइक्‍पाइक्‍‍तीमी। मेकोपुकीमी देवी देवता आन कली चढ़ेशा मेको आन नोले खोइक्‍तेक्‍म। ङोंइती मेकोपुकी, गेपुकी नु इन किकी पिपीमी यो मेको आन कली मतुइश्‍‍शो बाक्‍तेक्‍म।

येरमीया 44:3 ပူးပေါင်းရင်းမြစ်များ

नेहेम्‍याह 9:33

आंइ कली दुम्‍तीके, गे ठीक पशो बाक्‍नीनी। मारदे हना गे आंइ कली रिम्‍शो पाइतीनी। गोपुकीमी चहिं इन कली थम मरिम्‍शो पाइतक। दानीएल ९:५,७

यसैया 3:8

मिनु यरूसलेम दाइल पांइसीशा गोल्‍त। यहूदा खतम दुम्त। मारदे हना मेकेर ङा मुर आन लोव़ नु आन पतीके परमप्रभु यावे कली काइ मगारचा ङा बाक्‍त। परमप्रभु आंमा मेको आन दातेमी बाक्‍शा यो, मेकोपुकीम महिंथु मरिम्‍शो पना पन बाक्‍नीम।

येरमीया 11:17

मुर नेल्‍ल आन परमप्रभु यावेम इन कली ख्रुम्‍तु। मिनु मेकोमी इन कली मरिम्‍शो पचशो बाक्‍ब। मारदे हना इस्राएल आ खिं ङा मुर नु यहूदा आ खिं ङा मुरुम मरिम्‍शो पाम्‍तेक्‍म। परमप्रभुमी “मेकोपुकीमी बाल देवता कली मार मार चढ़ेशा आं कली गाइक्‍पाइक्‍तीमी” देंत।

येरमीया 16:10

मिनु गे एको मुर आन कली एको लोव़ नेल्‍ल देंनेनु, मेकोपुकीमी इ कली ‘मारदे परमप्रभु यावेम आंइ कली ओदेंशो ठेयब मरिम्‍शो दुम्‍तीक देंमे? आंइ मरिम्‍शो पशो मार बाक्‍बा? गो परमप्रभु यावे, आंइ परमप्रभु कली मार पाप पका ङा?’ देंनीम। येरमीया ५:१९

येरमीया 22:9

मिनु मेको आन कली ‘मारदे हना मेकोपुकीमी परमप्रभु यावे, आन परमप्रभु आ कबल पशो प्रोंइशा, देवी देवता आन कली पूजा पा, मेको आन कली गेय पाम्‍तेक्‍म’ देंशा लोव़ लेत्‍चा पुंइसीनी” देंनीम।

येरमीया 29:19

मारदे हना मेकोपुकीमी आं लोव़ मनेनेम। गो आं गेय नु आं लोव़ पाइब आन कली सोइक्‍ना सोइक्‍न बाक्‍ती हना यो मेको आन लोव़ मनेनेम” दे परमप्रभु यावेमी देंत। येरमीया २५:४

येरमीया 32:30

मारदे हना इस्राएल ङा मुर नु यहूदा ङा मुरुम आन ठिटा रेन आं ङोंइती मरिम्‍शो गेय ङा लाक्‍शा अरु मारेइ मपामे। थमा पा इस्राएल ङा मुरपुकीम आन गुइ ङा गेयम आं कली गाइक्‍पाइक्‍चा ङा लाक्‍शा, अरु मारेइ मपामे।

येरमीया 44:23

इन चोशा चढ़ेतीके, इन परमप्रभु यावे कली पाप पशो, आ देंशो मटिशो नु आ अरेशो, आ फुल्‍लुम मुशा ब्रेक्‍शो लोव़ नु आ शेंशो मटितीके इन कली ठेयब श्‍येत दुम्‍त। मेको आ पर्बम श्‍येत जाइ‍‍नीनी” दे माइक्‍तीमी।

येरमीया 44:8

मारदे गेपुकीमी इन गेयमी आं कली गाइक्‍पाइक्‍नीनी? मारदे गे इजीप्‍तमी बाक्‍शा, देवी देवता आन कली चढ़ेशा आं कली गाइक्‍पाइक्‍नीनी? गेपुकी क्‍याम्चा पुंइसीशा, रागी ङा मुर नेल्‍ल आन दातेमी सराप चीले राइब नु शुक्‍शी पाइक्‍चा पुंइसीब दुम्‍नीनी।

येरमीया 5:19

मिनु इन मुरपुकीम ‘मारदे इं परमप्रभु यावे, इं परमप्रभुमी इं कली ओदेंशो पवा?’ दे हिलो पाम्‍तेक्‍म हना, गे मेको आन कली ‘गेपुकीम दोपा आं कली प्रोंइशा, आंम रागीम अरु देवी देवता आन कली पूजा पनी, मोपा मुल गेपुकीम इन मतुइश्‍शो रागीम अर्को रागी ङा मुर आन गेय पाइनीनी’ देंशो बाक्‍ब माइक्‍मी। येरमीया १६:१०-१४

येरमीया 5:29

मार, एको आ पर्बम, गो मेको आन कली सजाइ मगेनुङमी? मिनु गो एको रागी ङा मुर आन कली क्‍येक्‍क मलेत्‍नुङमी?” दे परमप्रभु यावेमी देंत। येरमीया ५:९

येरमीया 7:19

मिनु मार, मेकोपुकीमी आं कली गाइक्‍पाइक्‍चा कली मो पशो मनमी ङा? मिनु मार, मेकोपुकीमी श्‍येत जचा कली मो पशो मन‍मी ङा?” देंत

बिलाप 1:8

यरूसलेममी ठेयब पाप पाप्‍तु। मोपतीके मेको शुक्‍शी पाइक्‍चा पुंइसाक्‍व। ङोंइती मेको कली मान पाइब नेल्‍ले मुल महिक्‍नीम। मारदे हना मेकोपुकीमी मेको कली शिश्रा ताम्‍तेक्‍म। मेको आंमान हुकयी पा आ कुल ख्रुइक्‍ब।

बिलाप 4:13

परमप्रभु यावे आ लोव़ पाइब आन पाप नु चढ़ेब आन मरिम्‍शो पशो आन पर्बम मो दुम्‍शो बाक्‍त। मेकोपुकीमी सहर आ दातेम ठीक पाइब मुर आन कली हुश ख्राक्‍श पोक्‍‍तेक्‍म।

इजीकीएल 9:9

मिनु मेकोमी आं कली “इस्राएल नु यहूदा ङा मुर आन खिं ङा मुर आन दोस थम ठेयब बाक्‍ब। रागी नेल्‍ल हुश ख्राक्‍शेम ब्रीशो बाक्‍ब। मिनु सहर दूली पतीकेम ब्रीशो बाक्‍ब। मारदे हना मेकोपुकीम ‘परमप्रभु यावेमी एको रागी प्रोंइशो बाक्‍ब। मिनु परमप्रभु यावेमी मारेइ मताइब’ देंनीम। इजीकीएल ८:१२

दानीएल 9:5

गोपुकीमी पाप पशा, मरिम्‍शो पाइतक। मिनु इन अरेशो मटिथु नु इन कली गन गन पा, इन शेंशो नु निसाफ पतीके लोव़ प्रोंइतक।

ब्‍यवस्‍था 13:6

मिनु सुइमी इ कली ख्रुइश्‍शोमी हें‍थे गाक्‍चा कली लेम्‍ब, मेको इ लोक्‍ब बाक्‍त हना, इ आफ आ तौ बाक्‍त हना, इ आंम आ तौ बाक्‍त हना, इ आंम आ तमी बाक्‍त हना, इ दाक्‍शो मीश बाक्‍त हना, इ शुश दाक्‍शो वारच बाक्‍त हना, नु मेकोमी ‘गे नु इ किकी पिपीमी मतुइश्‍शो देवी देवता आन कली सेउ पय’ देंतेक्‍म हना, ब्‍यवस्‍था १८:२०; १कोरिन्‍थी ५:९,१३

ब्‍यवस्‍था 29:25

मिनु मेकोपुकीमी ‘मेको परमप्रभु यावे, आन किकी पिपी आन परमप्रभुमी मेको कली इजीप्‍त रे ग्रुंइची ना पशो कबल प्रोंइने थुम्‍शो बाक्‍तेक्‍म।

ब्‍यवस्‍था 29:26

मिनु मेकोपुकीमी आन मतुइ‍श्‍शो नु परमप्रभुम मपचा देंशो देवी देवता आन ङोंइती बाप्‍शो बाक्‍तेक्‍म।

ब्‍यवस्‍था 32:17

मेकोपुकीमी परमप्रभु कली ममाइ, वोल आन कली चढ़ेम्‍तेक्‍म। आन ङोंइती मतुइश्‍शो देवी देवता आन कली चढ़ेम्‍तेक्‍म। आन किकी पिपीमी महिंशो नक सेल्‍शो देवी देवता आन कली चढ़ेम्‍तेक्‍म।

हिब्रू 3:16

नेंशा यो मटीब सु नमी? मोसाम इजीप्‍त रे ग्रुंइशा पिश्‍शोपुकी मनमी ङा?