येरमीया 4:13 - Sunuwar Bible

¹³ कोव़ङीन, मेको गोस्‍स खोदेंशो पा गाक्‍शो बाक्‍ब। मेको आ बग्‍गी फश गिवार खोदेंशो पा जाक्‍नीम। मेको आ शारा ककाकुली आन क्‍येङा रीब पा दोरनीम। आबी, गो खतम दुम्‍तय’ दे लोव़ पाइनीमी” देंत।

येरमीया 4:13 ပူးပေါင်းရင်းမြစ်များ

२ सामुएल 1:23

सावल नु योनाथन दाक्‍मुबाक्‍ताक्‍स। अरुम यो दाक्‍चा पुंइसाक्‍स। ब्रोंइसा नु बेक्‍सा नु यो काथा दुम्‍‍ताक्‍स। मेको निक्‍शी ककाकुली क्‍येङा यो रीब पा पाइब बाक्‍ताक्‍स। गुप्‍स क्‍येङा यो बोल्‍यो बाक्‍ताक्‍स।

यसैया 13:5

मेकोपुकी ङोन रागी रे जाक्‍नीम। रागी ङा सुर रे पा जाक्‍नीम। मिनु परमप्रभु यावेमी गाइश्‍शा, या शेशा रागी नेल्‍ल खतम सेल्‍पाइक्‍ब। योएल १:१५

यसैया 19:1

मिनु परमप्रभु यावेम इजीप्‍त आ पर्बम यसैया कली “कोव़ङीन, परमप्रभु यावे रीब पा बेरब गोस्‍सुम इजीप्‍त रागी जाक्‍ब। मेकेर ङा मूर्तिपुकी हिंशा ख्रिंख्रि पाइनीम। इजीप्‍त ङा मुर आन थुं लुक्‍च लाइब।

यसैया 3:8

मिनु यरूसलेम दाइल पांइसीशा गोल्‍त। यहूदा खतम दुम्त। मारदे हना मेकेर ङा मुर आन लोव़ नु आन पतीके परमप्रभु यावे कली काइ मगारचा ङा बाक्‍त। परमप्रभु आंमा मेको आन दातेमी बाक्‍शा यो, मेकोपुकीम महिंथु मरिम्‍शो पना पन बाक्‍नीम।

यसैया 5:28

मेको आन ब्रा हेश्‍शो बाक्‍नीम। आन लिब्रा आप्‍चा कली खुक्‍शो बाक्‍नीम। आन शारा मी आ झिल्‍का खोदेंशो बाक्‍नीम। आन बग्‍गी आन गुगील फश गिवार खोदेंशो बाक्‍नीम।

यसैया 66:15

परमप्रभु यावे मी नु जाक्‍ब। आ बग्‍गीपुकी फश गिवार खोदेंशो पा गाक्‍नीम। आ गाइश्‍शो चुरशोमी क्‍येक्‍क लेप्‍ब। आ हुइक्‍तीके हुरुर पा ब्रशो मी खोदेंशो बाक्‍ब। बजन संग्रह ५०:३; प्रकाश १९:११-१५

येरमीया 10:19

आबी, तन्‍न आं गार आ पर्बम हिंती। आं गार मसाब। तन्‍न गो आंम कली “थमा पा, एको आं सजाइ बाक्‍ब। गो एको फाल्‍चा माल्‍नुङ” देंती।

येरमीया 4:12

मेको फशेम मेको पने मचाप्‍ब। मारदे हना मेको शुश बोल्‍यो फश गिवार बाक्‍ब। मिनु गो मेको आन कली निसाफ पतीक लोव़ पाइनुङमी।

येरमीया 4:31

गो सुत्‍केरी रोइ पशो मीश मुर आ सेंदा खोदेंशो नेंता। मेको ङोंइती ङा आल थिचा चिक्‍शो मीश मुर आ सेंदा खोदेंशो बाक्‍त। सियोन आ तमीमी आ गुइ दिंशा आ सास कीशा ‘आबी, आं कली साइक्‍ब आन ङोंइती थाइनुङ’ देंत” दे परमप्रभु देंत।

येरमीया 46:18

परमप्रभु, पिपमी “आं ब्रोंइशा बाक्‍शो खोदेंशो पा” देंत। मेको पिप आ नें मुर नेल्‍ल आन परमप्रभु यावे बाक्‍ब। पहाड आन दाते ङा ताबोर पहाड खोदेंशो पा का जाक्‍ब। मेको समुन्‍द्र आ नेक्‍था ङा कारमेल खोदेंशो पा जाक्‍ब।

येरमीया 48:40

मिनु परमप्रभु यावेमी “कोव़ङीन, मेको ककाकुली खोदेंशो पा जुक्‍ब। मेको आ फ्रां हाम्‍शा, मोआब तारी जुक्‍ब। येरमीया ४९:२२

येरमीया 49:22

कोव़ङीन, मेको ककाकुली खोदेंशो पा बेरशा जाक्‍ब। मिनु मेको जुक्‍शा बोज्रा तार मेको आ फ्रां हाम्‍ब। मेको नाक्‍ती एदोम ङा लडाइ पाइब आन थुं सुत्‍केरी रोइ प‍शो मीश मुर आन थुं खोदेंशो दुम्‍ब। येरमीया ४८:४०

येरमीया 6:23

मेकोपुकी लिब्रा नु तरवार शेशा ठीक दुम्‍शो बाक्‍नीम। मेकोपुकी मरिम्‍शो पाइब नु काइ शिशी मपाइ‍ब बाक्‍नीम। आन रेयके समुन्‍द्र ग्रीशो खोदेंशो बाक्‍ब। मेकोपुकी शारा ङोइश्‍शा सियोन आ तमी, इ कली लडाइ तोचा कली ठीक दुम्‍शो बाक्‍नीम” देंत। येरमीया ५०:४२

येरमीया 9:19

सियोन रे रोंका पशो नेंसाक्‍व। गोपुकी खतम दुम्‍तय। गोपुकी मुनेम सुम्‍सीशो बाक्‍नय। गोपुकीम आंइ रागी प्रोंइचा माल्‍नीकी। मारदे हना मेकोपुकीम आंइ खिं प्रेत्‍तेक्‍म” देंतेक्‍म।

बिलाप 4:19

आंइ कली खेदा पाइबपुकी सरीङम बेरब ककाकुली क्‍येङा यो रीब पा जाक्‍तेक्‍म। मेकोपुकीमी आंइ कली पहाडम खेदा पाम्‍तेक्‍म। गोरशो रागीमी बाप्‍शा बाक्‍तेक्‍म।

इजीकीएल 26:10

मेको आन शुश शाराम पोक्‍शो फुरकुम इ कली सुम्‍ब। शारा ङोइक्‍ब नु बग्‍गी आन गुगील आन रेयकेम इ गारो हिम्‍‍पाइक्‍ब। नेबुकदनेसर इ लाप्‍चो रे ओव़मेनु, प्रेश्‍शो गारोम हिरशो सहर खोदेंशो पा ओव़ब।

इजीकीएल 38:9

गे फश गिवार खोदेंशो पा बारचा माल्‍नेवे। गे गोस्‍स खोदेंशो पा मेको रागी कली सुम्‍चा माल्‍नेवे। गे नु इ लडाइ पाइब नेल्‍ल नु गे नु बाक्‍ब नेल्‍लेम मोदेंशो पचा माल्‍नीनी’ देनो” देंत।

दानीएल 11:40

मिनु नोले ङा नाक्‍ती दक्‍खिन ङा पिपमी मेको कली लडाइ तोइब। मिनु उत्तर ङा पिपमी फश गिवार खोदेंशो पा मेको नु लडाइ पाइब। मेकोमी बग्‍गी, शारा ङोइक्‍ब नु लडाइ पाइब जहाज शुश चाक्‍शा लडाइ पाइब।

दानीएल 7:4

मेको ङोंइती ङा जन्‍तु गुप्‍स खोदेंशो बाक्‍शा, ककाकुली आ फ्रां खोदेंशो फ्रां पाइश्‍शो बाक्‍त। मिनु गो कोव़शा बाक्‍ङानु, मेको आ फ्रां तुल्‍चा पुंइसाक्‍व। मिनु मेको खप रे बोक्‍पाइश्‍शा, मुर खोदेंशो पा आ खोइल निक्‍शीमी राप्‍पाइक्‍चा पुंइसाक्‍व। मिनु मेकोमी मुर आ थुं ताप्‍तु।

होसे 8:1

मिनु “तुराही ता‍पो। ककाकुली का परमप्रभु यावे आ खिं तारी बेरना बेरन बाक्‍ब। मारदे हना मुरपुकीमी आं पशो कबल प्रोंइतेक्‍म। आं अरेशो लोव़ मटीम। यसैया ५८:१; ब्‍यवस्‍था २८:४९; होसे ६:७

मीका 2:4

मेको नाक्‍ती मुरपुकीमी इन पर्बम शुक्‍शी पा कुम्‍सो पाइनीम। मिनु इन पर्बम रोंका पा ङाक्‍नीम। मिनु मुरपुकीमी ‘गोपुकी थमा पा खतम दुम्‍तक। आंइ मुर आन थेरशो रू अर्को मुरुम लाइक्‍नीम। आंइ रू आंइ जोरी सत्रु आन दातेमी योक्‍सीनीम’ देंनीम” देंत।

नहुम 1:3

परमप्रभु यावे ओंखां ओंखां पा गाइक्‍ब। तन्‍न मेको ठेयब सक्ति पाइश्‍शो बाक्‍ब। मिनु परमप्रभु यावेमी दोस ताइब आन कली सजाइ मगेथु मप्रोंइब। मेको आ लां फश गिवारम बाक्‍ब। मिनु गोस्‍स मेको आ खोइल ङा फुरक बाक्‍नीम। प्रस्‍थान ३४:६-७

हबकुक 1:8

मेको आन शारा जोइ आन क्‍येङा रीब पा दोरब बाक्‍नीम। मिनु नाक्‍दो ग्रूब फर खोदेंशो पा साइक्‍ब बाक्‍नीम। मेको आन शारा बारनीम। मेको आन शारा ङोइक्‍ब ङोन रागी रे जाक्‍नीम। ककाकुली खोदेंशो पा बेरशा, रीब पा सिखार ग्‍याइक्‍नीम। सेफन्‍याह ३:३

जकरिया 6:1

मिनु गो लेंशा इर गे कोव़ङुनु आं ङोंइती डांडा आस दाते रे ४ ओटा बग्‍गी यिशो तातामी। मेको डांडा कांसा के बाक्‍ताक्‍स। प्रकाश ६:१-८; जकरिया १:८

मत्ती 24:30

मिनु सरीङमी रागीम जरमेशो आ चिन्‍ड तांइसीब। मिनु नेल्‍ल जात ङा मुरपुकी ङाक्‍नीम। रागीम जरमेशो कली गोस्‍स तारी बाक्‍शा, सक्ति नु ठेयब छेङछेङमी यिशो ताइनीम। प्रकाश १:७; मत्ती २६:६४; दानीएल ७:१३-१४; प्रकाश १९:११-१३

ब्‍यवस्‍था 28:49

मिनु परमप्रभु यावेमी नेल्‍ल क्‍येङा ङोन बाक्‍शो रागी रे मरुप्‍शो लोव़ पाइब मुरपुकी बेरशो ककाकुली खोदेंशो पा इन तारी जुक्‍पाइक्‍ब। हबकुक १:८; यसैया ३३:१९; येरमीया ५:१५

प्रकाश 1:7

मिनु येसु ख्रीस्‍त लेश्‍शा, दोपा यीबा देंशा हना, सरीङ रे गोस्‍सुमी गिल्‍सीशा यीब। मिनु मुर नेल्‍लेमी मेको कली यिन यिन पशो ताइनीम। मेको कली साइक्‍पाइक्‍बपुकीमी यो ताइनीम। मिनु थर थर ङा मुरपुकीम मेको कली तशा, रोंका पा ङाक्‍नीम। एको थमा लोव़ बाक्‍ब। आमेन। मत्ती २४:३०; जकरिया १२:१०; यूहन्‍ना १९:३७