येरमीया 36:9 - Sunuwar Bible

⁹ यहूदा ङा पिप योसीयाह आ तौ येहो-याकीम आ सासन पशो ५ बर्स ९ महिनाम यरूसलेममी बाक्‍शो मुर नेल्‍ल नु यहूदा ङा सहर रे जाक्‍शो मुर आन कली यरूसलेमम परमप्रभु यावे आ ङोंइती नेल्‍ल आन कली नेंपाइश्‍शा माइजा बाक्‍तीक लोव़ पाम्‍तेक्‍म।

येरमीया 36:9 ပူးပေါင်းရင်းမြစ်များ

२ इतिहास 20:3

मिनु येहो-शाफातम हिंशा, परमप्रभु यावे कली पुंइचा, दे थुं पवा बाक्‍त। यहूदा रागी ङा मुर नेल्‍ल कली “माइजा बाक्‍कीन” दे हुकुम पवा बाक्‍त।

नेहेम्‍याह 9:1

मिनु मेको महिना ङा २४ नाक्‍त नोले इस्राएलीपुकी माइजा बाक्‍शा, अरन्‍डी फेक्‍शा नु आन पियामी फुरक देप्‍शा खुम्‍साक्‍म।

एस्‍तर 4:16

“सुसा सहरमी लशा, यहूदी नेल्‍ल आन कली आं पर्बम माइजा बाक्‍चा कली पुक्‍कीन। नाक्‍त सां नु नाक्‍दो सां सम्‍म मारेइ मजने, मारेइ मतूङीन। मिनु गो नु आं गेय पाइबपुकी यो गे खोदेंशो पा माइजा बाक्‍नीकी। मिनु में नोले ऐन कानुनमी मगेशो बाक्‍त हना यो, गो पिप आ बाक्‍तीकेम लाइनुङ। गो खतम दुम्‍ती हना, यो दुम्‍ङल” दे लोव़ सोइक्‍ताक्‍व।

येरमीया 36:1

यहूदा ङा पिप योसीयाह आ तौ येहो-याकीममी सासन पवा आ ४ बर्सम परमप्रभु यावेम येरमीया कली लोव़ पाप्‍तु। येरमीया २५:१

येरमीया 36:22

मेना मेको बर्स ङा ९ महिना बाक्‍तीके, पिप हिंउदम बाक्‍तीके, खिंम बाक्‍शो बाक्‍त। मेको आ ङोंइती मी ब्रशो बाक्‍त।

येरमीया 36:6

मोपतीके गे तेकोइ माइजा बाक्‍तीक नाक्‍त परमप्रभु यावे आ खिं लशा, आं इ कली ब्रेक्‍पाइश्‍शो कागजम बाक्‍शो लोव़ मुरपुकीम नेंचा ङा पा पढेशा नेंपाइक्‍मी। यहूदा ङा सहर रे जाक्‍शो मुर नेल्‍लेम नेंचा ङा पा पढेशा नेंपाइक्‍मी।

योएल 1:13

चढ़ेबपुकी, सुर्ता पा अरन्‍डी फेक्‍शा रोंका पने। चढ़ेतीकेमी गेय पाइबपुकी रोंका पने। आं परमप्रभु आ गेय पाइबपुकी, नाक्‍दो यो सुर्ता पा अरन्‍डी फेक्‍शा बाक्‍कीन। मारदे हना इन परमप्रभु आ खिंमी अन्‍न चढ़ेतीके नु तूचा थोव़क चढ़ेतीके देक्‍शो बाक्‍ब।

योएल 1:14

मिनु माइजा बाक्‍चा कली मुर आन कली खुप्‍तीन। परमप्रभु यावे आ खिंम रागीम बाक्‍ब मुर नेल्‍ल बुक्‍शा, खाल्‍पा आन कली ब्रेत्‍तीन। गे खाल्‍पा नु मुर आन कली परमप्रभु यावे, इन परमप्रभु आ खिंम पुक्‍कीन। मिनु परमप्रभु यावे कली ठेयब सेंदा पा ‘वारच पाइक्‍की’ दे पुनीन” देंत। भजन संग्रह १०४:१०,११; योएल २:१५

लेवी 23:27

“मेको ७ महिना ङा १० नाक्‍त पाप क्‍याम्‍तीक नाक्‍त बाक्‍ब। मेको नाक्‍ती गेपुकीमी परमप्रभु यावे आ पर्बम ग्रुम्‍चा माल्‍नीनी। गेपुकी मेको नाक्‍त माइजा बाक्‍चा माल्‍नीनी। मिनु गेपुकीमी परमप्रभु यावे कली मीम चोशा चढ़ेतीक चढ़ेचा माल्‍नीनी। लेवी १६:-

योना 3:5

मिनु मेको नेंशा निनवे ङा मुरपुकीमी परमप्रभु आ लोव़ थमा बाक्‍ब, दे थमा सुदमे बाक्‍त। मेकोपुकीमी “निनवे सहर ङा आइक्‍च नु ठेयब मुर आन मरिम्‍शो पतीके रे लेत्‍तेक्‍म, दे कोंइचा कली नेल्‍ल माइजा बाक्‍शा, अरन्‍डी फेक्‍सीन” दे नेल्‍ल आन कली नेंपदमे बाक्‍त। मत्ती १२:४१; योएल १:१४

जकरिया 8:19

मिनु मेकोमी मार देंत देंशा हना “४ महिना ङा माइजा बाक्‍तीक, ५, ७ नु १० महिना ङा माइजा बाक्‍तीके, मुल रे यहूदा ङा मुर ग्येरशा सोम्शा पतीक नाक्‍त दुम्‍चा माल्‍नीम। मेको ग्‍येरशा बाक्‍तीक चाड दुम्‍चा माल्‍नीम। मोपतीके गे थमा लोव़ पचा नु थुं नाइक्‍चा दाक्‍तीन” दे मुर नेल्‍ल आन परमप्रभु यावेमी देंत। जकरिया ७:३,५

न्‍यायाधीस 20:26

मिनु इस्राएली नेल्‍ले बेथेल सहर लमा बाक्‍त। मिनु मेकोपुकीमी नाक्‍दो सम्‍म परमप्रभु यावे आ ङोंइती ङाक्‍शा माइजा बाक्‍मा बाक्‍त। मेकोपुकीमी परमप्रभु यावे कली चोशा चढ़ेतीक नु दुशा बाक्‍चा आ पर्बम चढ़ेतीक चढ़ेमे बाक्‍त। न्‍यायाधीस २०:१८; यहोसु १८:२१-२२

१ सामुएल 7:6

मिनु मेकोपुकी मिस्‍पाम बुक्‍‍मा बाक्‍त। मिनु ब्‍वाक्‍कु चाक्‍शा, परमप्रभु यावे आ ङोंइती मोदमे बाक्‍त। मिनु मेको नाक्‍ती माइजा बाक्‍शा, मेकोपुकीमी “गो परमप्रभु यावे आ ङोंइती पाप पाइतक” देंमा बाक्‍त। मिनु सामुएलम इस्राएली आन कली मिस्‍पा सहरम ब्रेश्‍शा निसाफ पवा बाक्‍त। २सामुएल २३:१६