न्‍यायाधीस 2:10 - Sunuwar Bible

¹⁰ मेको पाला ङा मुर नेल्‍ल बेक्‍मा बाक्‍त। मिनु मेको आन आल ठेयब दुम्‍मा बाक्‍त। मेकोपुकी परमप्रभु यावे कली मतुइक्‍ब बाक्‍मा बाक्‍त। मिनु इस्राएल ङा मुर आन कली ठेयब गेय पा वारच पशो यो मतुइश्‍शो बाक्‍मा बाक्‍त।

न्‍यायाधीस 2:10 ပူးပေါင်းရင်းမြစ်များ

उत्पत्ती 15:15

गे चहिं थुं नाइश्‍शा इ किकी पिपी आन बाक्‍तीक लाइनेवे। शुश बर्स दुम्‍शा बेक्‍नेवे। उत्‍पत्ती २५:७-८

उत्पत्ती 25:17

इश्‍माएल नेल्‍ल पा सहे का ३७ बर्स ब्रोंइमाक्‍त। मिनु बेक्‍शा, आ किकी पिपी नु लमाक्‍त।

उत्पत्ती 25:8

मिनु नोले शुश बर्स ङा खाल्‍पा दुम्‍शा बेक्‍शा, आ किकी पिपी नु लमाक्‍त। उत्‍पत्ती १५:१५

उत्पत्ती 49:33

याकूबमी आ तौ आन कली मोदें लोव़ पशा नोले, खाटमी आ खोइल दिंशा, बेक्‍माक्‍त। मिनु आ किकी पिपी आन बाक्‍तीक लमाक्‍त।

२ सामुएल 7:12

परमप्रभु यावेम दाऊद कली “इ नाक्‍त नुप्‍त हना नु इ किकी पिपी नु बाक्‍थ लचा नोले गो इ खिं ङा मुर आन दाते रे का कली इ पा ङा पिप सेल्‍नुङ। मिनु मेको आ राज्‍य बोल्‍यो सेल्‍नुङ। १राजा ८:२०

१ इतिहास 28:9

आं तौ सोलोमन, इ आफ आ परमप्रभु कली तुइश्‍शा मालो। इ थुं नेल्‍लेमी ग्‍येरशा मेको आ नोले खोतो। मारदे हना परमप्रभु यावेमी इ थुं कोव़ना कोव़न, इन मिम्‍शो नु पशो नेल्‍ल तुइक्‍ब। गे मेको कली माल्‍तीवी हना, गे थित्‍नेवे। तन्‍न गे मेको कली प्रोंइतीवी हना, इ कली गेना हना यो कली प्रोंइब। येरमीया २९:१३-१४; १राजा ११:३१,३३

अय्‍युब 21:14

मेकोपुकीम परमप्रभु कली आंइ रे पा ङोन लन। गो इन लांम गाक्चा मदाक्‍नीकी, देंनीम। अय्‍युब २२:१७

प्रस्‍थान 1:6

मिनु नोले योसेफ नु मेको आ लोक्‍ब आन पाला ङा मुर नेल्‍ल बेक्‍मा बाक्‍त। उत्‍पत्ती ५०:२६

प्रस्‍थान 1:8

मिनु नोले योसेफ कली मतुइक्‍ब पिप काम इजीप्‍त रागी कली सासन पवा बाक्‍त।

प्रस्‍थान 5:2

मिनु फाराओमी “परमप्रभु यावे सु बाक्‍म, गो मतुइक्‍नुङ। मार, आ देंशो लोव़ टिचा माल्‍नुङा? गो इस्राएली आन कली मारदे लचा गेनुङा? गो परमप्रभु यावे कली मतुइक्‍नुङ। मोपतीके इस्राएल ङा मुर, इन कली लचा मगेनन्‍नी” दें‍त।

यसैया 5:12

बीना, तार पाइश्‍शो ठेयब ताप्‍तीके, खैजडी नु बांसुरी नेंशा, शांबु दुक्‍नीनी। तन्‍न परमप्रभु यावे आ पशो प्रेंशा ममिम्‍नीनी। आ गुइ ङा गेय मताइनीनी। आमोस ६:५-६; भजन संग्रह ४४:२

येरमीया 22:16

मेकोमी प्रुङग नु मारेइ मथीब आन कली ठीक निसाफ पाप्‍तु। मिनु मेको कली रिम्‍शोन दुम्‍त। मेको आं कली तुइक्‍ब मुरुम पाइनीम” दे परमप्रभु यावेम देंत।

येरमीया 31:34

मेना रे परमप्रभु यावे कली तुइक्‍तीन, दे मुर कामी अर्को कली मशेंनीम। मारदे हना आइक्‍च रे ठेयब नेल्‍लेम आं कली तुइक्‍नीम। गो मेको आन मरिम्‍शो पशो माफ गेनुङमी। मिनु लेंशा गेनायो मेको आन पाप ममिम्‍नुङ” दे परमप्रभु यावेमी देंत। येरमीया ३३:८; यसैया ४३:२५; रोमी ११:२६-२७

येरमीया 9:2

गोरशो रागीम मुर आन कली बास बाक्‍तीक बाक्‍शो हना, गो आं मुर आन कली प्रोंइशा, मेकेर लशा बाक्‍ङ वा। मिनु मेको आन रे ङोन लङ वा। मारदे हना मेको नेल्‍ल आन नाता ख्रोइश्‍शा अरु नु इप्‍‍नीम। मेको नेल्‍ल मरिम्‍शो हुल का बाक्‍नीम।

येरमीया 9:3

मेकोपुकीम जोल पस ला जोक्‍नीम। मोपा जोल पतीकेमी रागी ङा ठेयब मुर दुम्‍तेक्‍म। थमा लोव़ पतीकेमी ममाइ। मेकोपुकी मरिम्‍शो पशो का रे अर्को मरिम्‍शो पाइनीम। मिनु आं कली मतुइक्‍नीम। येरमीया ५:१

येरमीया 9:5

मेको नेल्‍लेम आन नेक्‍था ङा मुर आन कली जोल पाइनीम। सुइमी थमा लोव़ मपाइनीम। मेकोपुकीम जोल पचा शेंसीशो बाक्‍नीम। मेकोपुकीम मरिम्‍शो ला पाइनीम।

गन्‍ती 27:13

मिनु गे मेको रागी तवी नोले, गे इ लोक्‍ब हारून खोदेंशो पा इ किकी पिपी नु बाक्‍थ लाइनेवे। गन्‍ती २०:२४-२८

लूका 20:32

नोले मेको मीश मुर यो बेक्‍माक्‍त।

प्रेरित 13:36

दाऊदमी मेको लोव़ ब्रेक्‍शो बाक्‍त हना यो, आंम पर्बम ममाइ। मारदे हना दाऊदमी परमप्रभु यावेमी गेशो सासन पने थुम्‍शा बेक्‍शा, आ किकी पिपी आन कली थिम्‍तीकेमी थिम्‍चा पुंइसीशा राक्‍शा ल‍माक्‍त।

ब्‍यवस्‍था 31:16

मिनु परमप्रभु यावेमी मोसा कली “गे इ किकी पिपी नु बाक्‍चा चिक्‍शो बाक्‍नेवे। गे बेक्‍ङे नोले मेको मुर आन लशो रागीम जाक्‍दीश्‍शा, मेको रागी ङा आन मतुइश्‍शो देवी देवता आन कली खोइक्‍नीम। आं कली प्रोंइशा, गो नु पशो कबल क्‍याम्‍नीम।

२ थिस्‍सलोनिकी 1:8

मेको नु हुरुर पा ब्रशो मी सरीङ रे यीब। प्रभुमी परमप्रभु यावे कली मतुइक्‍ब नु आ ग्‍येरपाइक्‍ब लोव़ मटीब आन कली क्‍येक्‍क लेप्‍ब। रोमी २:८

तीतस 1:16

मिनु मेकोपुकीमी “गो परमप्रभु यावे कली तुइक्‍नुङ” देंखु पाइनीमी। तन्‍न आन पतीकेमी मतुइक्‍ब बाक्‍नीम, दे तुंइसीब। मोपा मेकोपुकी ग्रांग्रा दिचा ङा मुर बाक्‍नीम। मिनु मटीब दुम्‍शा, रिम्‍शो गेय यो पने मचाप्‍नीम। २तिमोथी ३:५

यहोसु 24:31

इस्राएलीपुकीमी यहोसु आ ब्रोंइतीक नाक्‍त सम्‍म परमप्रभु यावे कली ठेयब सेल्‍तेक्‍म। मिनु परमप्रभु यावेमी पशो नेल्‍ल तशा तुइक्‍ब खाल्‍पापुकी बाक्‍मा सम्‍म मेकोपुकीमी परमप्रभु यावे कली ठेयब सेल्‍तेक्‍म। न्‍यायाधीस २:७

१ सामुएल 2:12

एली आ तौ निम्‍फा हिंचा ङा मरिम्‍शो पाइब बाक्‍सा बाक्‍त। मेको निक्‍शी परमप्रभु यावे कली मान पा महिंब बाक्‍सा बाक्‍त।