न्‍यायाधीस 14:4 - Sunuwar Bible

⁴ परमप्रभु यावेम सिम्‍सोन कली मेको मीश आल कली दाक्‍पाइश्‍शो बाक्‍त, दे आ आम आफोमी मतुइश्‍शो बाक्‍ताक्‍स। परमप्रभुमी पलिस्‍ती आन कली खतम पचा कली मोदेंशो पशो बाक्‍माक्‍त। मेना पलिस्‍तीपुकीमी इस्राएली आन कली सासन पशो बाक्‍मा बाक्‍त।

न्‍यायाधीस 14:4 ပူးပေါင်းရင်းမြစ်များ

१ राजा 12:15

मोपा पिपम मेको मुर आन लोव़ मनेना बाक्‍त। मारदे हना, शिलो सहर ङा अहीयाह रे पा नेबात आ तौ येरोबाम कली देंशो लोव़ गाप्‍चा कली परमप्रभु यावेमी मोदेंशो पशो बाक्‍माक्‍त। १राजा ११:२९-३१

१ राजा 12:24

परमप्रभु यावेमी ‘गेपुकी आंम लोक्‍ब इस्राएली नु लडाइ पचा कली इर मलने। गे नेल्‍ल इन खिं खिं लेश्‍शा लने। मारदे हना एको आं मिम्‍शा पशो बाक्‍ब’ देंनो” देंमाक्‍त। मोपतीके मेकोपुकी परमप्रभु यावे आ देंशो खोदेंशो पा लडाइ पथ मलथु, आन खिं खिं लेश्‍शा लमा बाक्‍त।

२ राजा 6:33

मिनु एलीशाम मेकोपुकी नु लोव़ पना पन बाक्‍मेनु मेको लोव़ कुरब मुर जाक्‍माक्‍त। मिनु पिपमी “एको खतम दुम्‍तीक परमप्रभु यावे रे जाक्‍शो बाक्‍ब। मुल गो मारदे परमप्रभु यावे कली आस पा बाक्‍नुङा?” देंमाक्‍त। आमोस ३:६

२ इतिहास 10:15

मिनु पिपम मेको मुर आन लोव़ मनेना बाक्‍त। मारदे हना परमप्रभुमी शिलो ङा अहीयाह रे पा नेबात आ तौ येरोबाम आ पर्बम देंशो लोव़ खाप्‍चा कली परमप्रभु यावेम मोदेंशो पपाइश्‍शो बाक्‍माक्‍त। १राजा ११:२९-३१

२ इतिहास 22:7

तन्‍न परमप्रभु आ मिम्‍शो खोदेंशो पा योराम नु अहाज्‍याह ग्रुम्‍सानु, अहाज्‍याह आ बेक्‍तीक दुम्‍माक्‍त। मेको ग्रुम्‍शा, अहाज्‍याह नु येहोराम निम्‍शी आ तौ येहू कली ग्रुम्‍थ लसा बाक्‍त। परमप्रभु यावेमी आहाब आ खिं ङा मुर आन कली थुम्‍पाइक्‍चा कली येहू कली योव़शो बाक्‍माक्‍त। १राजा १९:१६; २राजा ९:६-७

२ इतिहास 25:20

तन्‍न अमस्‍याहम मेको लोव़ मनेना बाक्‍त। मोपतीके परमप्रभुमी मेको कली मुर आन गुइमी गेवा बाक्‍त। मारदे हना मेकोपुकीम एदोम ङा देवता आन कली खोइश्‍शो बाक्‍मा बाक्‍त।

भजन संग्रह 115:3

आंइ परमप्रभु स्‍वर्गम बाक्‍ब। मेकोमी मार दाक्‍ता, मेको पाइब।

दानीएल 6:4

मिनु मेको ठेयब कोव़ब मुर नु सहे का २० जना पारसी रागी कली हुकुम पाइबपुकीमी गेहे पा दानीएल कली दोस गेचा, दे क्‍यारी पचा गोव़मे बाक्‍त। तन्‍न मरिम्‍शो नु दोस गेतीक मारेइ मथिदमे बाक्‍त। मारदे हना दानीएल रिम्‍शो, मारेइ दोस मपाइश्‍शो गेय पाइब मुर बाक्‍‍त।

ब्‍यवस्‍था 28:48

मोपतीके परमप्रभु यावेमी इन कली जोरी सत्रु सोइक्‍ब। गेपुकी शोव़लु बेक्‍शा नु तूतू दाक्‍ना दाक्‍न, फेक्‍चा मतथु नु मारेइ मगाप्‍शो दुम्‍शा, मेको आन गेय पचा माल्‍नीनी। मिनु मेकोमी इन कली मक्‍याम्‍दमे सम्‍म फलम के हलो इन तारी वोइक्‍नीम। येरमीया २८:१३-१४

यहोसु 11:20

मारदे हना नेल्‍ल आन कली खतम सेल्‍चा, दे परमप्रभु यावेमी मेको नेल्‍ल आन थुं खकटा सेल्‍शा, नेल्‍ल खतम दुम्‍चा कली इस्राएलीपुकी नु लडाइ पतीक थुं गेप्‍तु। मिनु शिशी मपथु, नेल्‍ल आन कली खतम सेल्‍पाइक्‍तु। परमप्रभु यावेमी मोसा कली अरेशो खोदेंशो दुम्‍त। प्रस्‍थान ४:२१; ब्‍यवस्‍था ७:२

न्‍यायाधीस 13:1

मिनु इस्राएलीपुकीमी लेंशा परमप्रभु यावे आ ङोंइती मार मरिम्‍शो बाक्‍मे, मेको पामे बाक्‍त। मोपतीके परमप्रभु यावेमी मेको आन कली ४० बर्स सम्‍म पलिस्‍ती आन गुइमी गेमी बाक्‍त।

न्‍यायाधीस 14:5

मिनु नोले सिम्‍सोन आ आम आफ नु तिम्‍नाहमी ब्रुम्‍माक्‍त। मिनु मेकेर ङा अङगुर रूमी जाक्‍दीम्‍माक्‍त। मिनु मेकेर ठिटा गुप्‍स का ग्रूशा, मेको कली ग्राम्‍दा बाक्‍त।

न्‍यायाधीस 15:11

मिनु यहूदा ङा हजार सां मुर एताम ङा रोंगु ङा पुक्‍खीमी यिमा बाक्‍त। मिनु मेकोपुकीमी सिम्‍सोन कली “पलिस्‍तीपुकी आंइ सासन पाइब बाक्‍नीम, दे गे तुइक्‍नीनी। गे मारदे आंइ कली मोदेंशो पा मरिम्‍शो पनी?” देंमा बाक्‍त। मिनु सिम्‍सोनमी “मेकोपुकीमी आं कली दोदेंशो पामे, गो यो में मोदेंशो ला पाता” देंमाक्‍त।

न्‍यायाधीस 15:3

मिनु सिम्‍सोनमी “गो मुल पलिस्‍ती आन कली थम मरिम्‍शो पाता हना यो, दोस मताइब दुम्‍ती” देंमाक्‍त।