यसैया 64:6 - Sunuwar Bible

⁶ गो नेल्‍ल ग्रांग्रा दिशो मुर खोदेंशो दुम्‍तक। आंइ ठीक पतीके नेल्‍ल ग्रांग्रा दिशो लुम्‍सीशो वा खोदेंशो दुम्‍त। गो सफा खोदेंशो पा सोल सुल बेक्‍नीकी। आंइ मरिम्‍शो पशो फश खोदेंशो दुम्‍शा, आंइ कली बेरपाइक्‍ब।

यसैया 64:6 ပူးပေါင်းရင်းမြစ်များ

२ सामुएल 22:46

अर्को रागी ङा मुर हिंशा ख्रिंख्रि पा आन बोल्‍यो दरवार रे जाक्‍तेक्‍म।

अय्‍युब 14:4

सुमी ग्रांग्रा दिशो रे ग्रांग्रा मदिशो सेल्‍ने चाप्‍बा? सुइमी मचाप्‍ब।

अय्‍युब 25:4

बेक्‍शा लाइब मुर दोपा परमप्रभु आ ङोंइती ठीक पाइब दुम्‍ने चाप्‍नीमी ङा? मीश मुर रे जरमेशो मुर दोपा ग्रांग्रा मदिचा ङा दुम्‍ने चाप्‍नीमी ङा? अय्‍युब ९:२; भजन संग्रह १४३:२

अय्‍युब 40:4

“गो शोर गाक्‍शो मुरुम इन कली मार लोव़ लेन्‍ने चाप्‍नुङा ङा? गो आं गुइम आं शोव़ सुम्‍नुङ। उत्‍पत्ती ३२:९; यसैया ६:५; हितोपदेस ३०:३२

भजन संग्रह 1:4

परमप्रभु आ अरेशो मटीबपुकी चहिं मोदेंशो मबाक्‍नीम। मेकोपुकी फशेमी बेरपाइश्‍शो भूस खोदेंशो बाक्‍नीम।

भजन संग्रह 14:4

मरिम्‍शो पाइबपुकीमी परमप्रभु यावे कली मतुइक्‍नीम। आ मुर आन कली शोब्‍ले जशो खोदेंशो पा नेक्‍नीम। मेकोपुकीमी परमप्रभु यावे कली यो मपुंइनीम। मीका ३:३

भजन संग्रह 51:5

थमा पा, गो जरमेसी ङा रेन मरिम्‍शो पाइब बाक्‍ती। आं ममा आ कोव़जम जोल्‍ङा रेन मरिम्‍शो पाइब बाक्‍ती। रोमी ३:४; यूहन्‍ना ३:६

यसैया 1:28

तन्‍न परमप्रभु यावे आ देंशो लोव़ मटीब, मेको कली प्रोंइबपुकी कालेमीन खतम दुम्‍नीम। परमप्रभु यावे कली प्रोंइबपुकी क्‍याम्‍चा पुंइसीनीम।

यसैया 1:30

गे सोव़शो रवा ङा सफा पाइश्‍शो नु ब्‍वाक्‍कु मतशो रू खोदेंशो दुम्‍नीनी।

यसैया 43:22

तन्‍न याकूब, गे आं कली ठेयब मसेली। इस्राएल, गे आं नोले खोइक्‍चा आ पर्बम मारेइ ममिम्‍ती।

यसैया 46:12

गे खकटा थुं पाइश्‍शोपुकी नेनीन। गे पाप रे प्रोंइतीके रे शुश ङोन बाक्‍नीनी।

यसैया 48:1

मिनु परमप्रभु यावेमी “याकूब आ खिं ङा मुर, नेनीन। इन कली इस्राएल नें वोइश्‍शो बाक्‍ब। गे यहूदा आ चच युइ बाक्‍नीनी। गे परमप्रभु यावे आ नें थिशा, कसम जाइनीनी। गे इस्राएली आन परमप्रभु कली ठेयब सेल्‍खु पाइनीनी। यसैया ५१:१

यसैया 50:1

मिनु परमप्रभु यावेमी “गोम इन ममा कली प्रोंइशा गेशो छोड पत्र ते बाक्‍म? गो तेको आं कली जेर गेब कली इन कली ले‍यन्‍नी? ममाइ, गे इन पापम पतीके लेयसीशो ननी। इन हेंथे पतीकेमी इन ममा प्रोंइचा पुंइसीशो बाक्‍ब। यसैया ५४:६; ब्‍यवस्‍था २४:१; यसैया ५२:३

यसैया 50:2

गो जाक्‍ङानु, मारदे सुइ मबाक्‍मा? गो ब्रेङङानु, मारदे सुइमी लोव़ मलेत्‍ता? आं गुइ इन कली पाप रे प्रोंइने मचाप्‍चा ङा दुम्‍शो बाक्‍मे? इन कली प्रोंइने चाप्‍तीक सक्ति गो नु मबाक्‍बा? गो हुइक्‍तुनु, समुन्‍द्र सोव़ब। खोलापुकी ब्‍वाक्‍कु मबाक्‍शो गोरशो रागी सेल्‍नुङ। ब्‍वाक्‍कु मबाक्‍तीके ङांइपुकी बेक्‍शा, राक्‍शा, रिना पाइनीम। यसैया ५९:१; गन्‍ती ११:२३; प्रस्‍थान १४:२१

यसैया 53:6

गो नेल्‍ले भेडा खोदेंशो दुम्‍शा लां साम्‍तक। गो नेल्‍ले आंम आंमा लां खोइक्‍तक। परमप्रभु यावेमी आंइ मरिम्‍शो पशो नेल्‍ले मेको आ तारी वोइक्‍तु। १पत्रुस २:२५; १यूहन्‍ना ३:५

यसैया 6:5

मिनु गो “आबी, मुल बेक्‍ब दुम्‍ती। मारदे हना गो मरिम्‍शो लोव़ पाइब बाक्‍ती। मिनु मरिम्‍शो लोव़ पाइब आन दातेमी बाक्‍शो बाक्‍नुङ। मो हना यो गो मुर नेल्‍ल आन परमप्रभु यावे, पिप कली ताता” देंती। प्रस्‍थान ३३:२०

यसैया 8:17

मिनु गो याकूब आ खिं ङा मुर आन क्‍येङा आ कुल ख्रुइक्‍ब परमप्रभु यावे आ लां कोव़शा, रिम्‍शा बाक्‍नुङ।

दानीएल 9:13

मोसामी इन अरेशो लोव़म ‘मेको कली मटीब श्‍येत जाइनीम’ दे ब्रेक्‍शो खोदेंशो पा, मेको श्‍येत नेल्‍ल आंइ कली दुम्‍त। मिनु गोपुकीमी परमप्रभु यावे, आंइ परमप्रभु कली ‘इन थमा लोव़ कली रुप्‍तीक थुं गेकी’ दे मपुंइक। मिनु आंइ मरिम्‍शो पशो मप्रोंइक। इन कली दाक्‍शा मप्रोंइतीके ममिम्‍तक।

होसे 4:19

ठेयब फश गिवार पशा, मेको आन कली योल्‍ब। मिनु मेको आन चढ़ेशो आ पर्बम मुने दोक्‍नीम।

होसे 7:7

मेको नेल्‍ले मी खोदेंशो पा ब्रशो बाक्‍नीम। मिनु आन सासन पाइब आन कली साइक्‍नीम। मेको आन पिप नेल्‍ल आन कली साइक्‍तेक्‍म। मिनु मेकेर ङा सुइमी यो आं कली मथोइनीम” देंत।

लेवी 13:12

मिनु मेको आ रोइ कुशुलम बारना बारन लशा, चढ़ेबमी कोव़ङानु, आ गार पिया रे खोइल सम्‍म बाक्‍त हना,

जकरिया 3:3

यहोसु ग्रांग्रा दिशो लुम्‍सीशो वा फेक्‍शा, स्‍वर्ग ङा गेय पाइब आ ङोंइती राप्‍शो बाक्‍त।

रोमी 7:18

रिम्‍शो पतीके गो नु मबा, दे रुप्‍ता। रिम्‍शो पपदाक्‍ती हना यो, रिम्‍शो पने मचबु। उत्‍पत्ती ६:५; उत्‍पत्ती ८:२१

रोमी 7:24

मोपतीके थुं खाइश्‍शा “मार मुर नङा? एको बेक्‍शा लाइब पाप पाइब रां रे सुम प्रोंइबा?” दे ङाक्‍शा बाक्‍नुङ।

फिलिप्‍पी 3:9

मोपा आ मुर दुम्‍शा, परमप्रभु यावे आ अरेशो लोव़ ङा आंम ठीक पतीके मबाक्‍थु, ख्रीस्‍त कली थमा सुइक्‍तीकेमी ठीक दुम्‍तीके बाक्‍ब। मेको ठीक दुम्‍तीके परमप्रभु यावेमी गेशो थमा सुइक्‍तीके रे ला बाक्‍ब। रोमी ३:२२

तीतस 3:3

ङोंइती गो मरुप्‍ब बाक्‍तय। परमप्रभु यावे कली मटीब बाक्‍तय, हेंथे गाक्‍ब, मार मार दाक्‍तय, मेको दला दाक्‍स पाइब बाक्‍तय। ग्रांग्रा दिचा ङा गेय पाइब बाक्‍तय। गो मरिम्‍शो पा गेहे पाइतय। मिनु गोपुकी काइ मदाक्‍मुय। १कोरिन्‍थी ६:११; एफिसी २:२; एफिसी ५:८; १पत्रुस ४:३

प्रकाश 7:13

मिनु मेको शेंब खाल्‍पा कामी आं कली “मेको बुश वा फेक्‍शो मुरपुकी सु नमी? ते रे जाक्‍मा?” दे हिल्‍लो पती।