यसैया 63:5 - Sunuwar Bible

⁵ मिनु एर ओंथ कोव़ङुनु, वारच पाइब सुइ मबाक्‍म। मिनु गो नु गेय पाइब सुइ मबाक्‍म। मोपतीके गो आं सक्तिमी ग्राती। आं गाइक्‍तीकेमी आं कली वारच पाइक्‍ती।

यसैया 63:5 ပူးပေါင်းရင်းမြစ်များ

भजन संग्रह 107:12

मोपतीके मेकोपुकीमी शुश गेय पचा माल्‍तेक्‍म। मेकोपुकी गोल्‍तेक्‍म। तन्‍न मेको आन कली वारच पाइब सुइ मबाक्‍म।

भजन संग्रह 22:11

गे आं रे ङोन मबाक्‍कीन। मारदे हना गो श्‍येत जचा चिक्‍शो बाक्‍नुङ। वारच पाइब सुइ मबाक्‍नी‍म।

भजन संग्रह 44:3

मेको आन तरवारम मेको रागी मग्राशो बाक्‍तेक्‍म। आन सक्तिमी यो मग्राशो बाक्‍तेक्‍म। इन सक्ति नु इन कुल ङा छेङछेङमी ग्रातेक्‍म। मारदे हना गे मेको आन कली दाक्‍शो बाक्‍ती‍नी।

भजन संग्रह 69:20

आं कली रिश्‍शा कोव़शो आ पर्बम आं थुं जिक्‍शो बाक्‍ब। मिनु गो मारेइ पने मचाप्‍ब दुम्‍शो बाक्‍ती। आं कली शिशी पाइब ‘सुइ बाक्‍मा कों’ दे कोव़ता, तन्‍न सुइ मबाक्‍म। लेम्‍ब यो सुइ मबाक्‍म।

भजन संग्रह 94:16

परमप्रभु आ अरेशो लोव़ मटीब आन पर्बम सु पोन बोक्‍बा? मरिम्‍शो पाइब आन पर्बम सु पोन बोक्‍बा? भजन संग्रह ११५:१७

भजन संग्रह 98:1

परमप्रभु यावे कली नक कुम्‍सो का पय। मारदे हना मेकोमी छक लाक्‍चा ङा गेय पाप्‍तु। मेको आ ठेयब सक्तिमी ग्रात। भजन संग्रह ३३:३; यसैया ५९:१६; यसैया ६३:५

यसैया 40:10

कोव़ङीन, परमप्रभु, परमप्रभु यावे सक्ति पाइश्‍शो दुम्‍शा जाक्‍ब। मिनु हुकुम पाइब। आ इनाम आ नु बाक्‍ब। आ गेतीके आ ङोंइती बाक्‍ब। यसैया ६२:११

यसैया 41:28

तन्‍न गो कोव़ङुनु, सुइ मथिदु। अर्ती गेब सुइ मबाक्‍म। गो हिल्‍लो पाता, सुइम लोव़ मलेत्‍तीनी।

यसैया 50:2

गो जाक्‍ङानु, मारदे सुइ मबाक्‍मा? गो ब्रेङङानु, मारदे सुइमी लोव़ मलेत्‍ता? आं गुइ इन कली पाप रे प्रोंइने मचाप्‍चा ङा दुम्‍शो बाक्‍मे? इन कली प्रोंइने चाप्‍तीक सक्ति गो नु मबाक्‍बा? गो हुइक्‍तुनु, समुन्‍द्र सोव़ब। खोलापुकी ब्‍वाक्‍कु मबाक्‍शो गोरशो रागी सेल्‍नुङ। ब्‍वाक्‍कु मबाक्‍तीके ङांइपुकी बेक्‍शा, राक्‍शा, रिना पाइनीम। यसैया ५९:१; गन्‍ती ११:२३; प्रस्‍थान १४:२१

यसैया 51:5

गो आं ठीक पतीके रीब पा चाक्‍नुङ। गो ग्राचा चिक्‍शो बाक्‍नुङ। मिनु गो जात जात ङा मुर आन कली निसाफ पाइनुङ। समुन्‍द्र आ नेक्‍था बाक्‍ब मुरपुकीम आं लां कोव़नीम। आं वारच पतीके रिम्‍नीम। यसैया ४२:४

यसैया 51:9

परमप्रभु यावे सेंसीन, सेंसीन। सक्ति पाइश्‍शो दुमीन। साइ ङोंइती आंइ किकी पिपी आन कली पशो खोदेंशो पा, पने। साइ गे राहाब माइश्‍शो समुन्‍द्र ङा जन्‍तु कली मसाइक्‍नी ङा? ठेयब बुस्‍स कली मतूदीनी ङा? भजन संग्रह ८९:११

यसैया 52:10

परमप्रभु यावेमी रागी रागी ङा मुर आन ङोंइती आ सक्ति कोंइताक्‍व। मिनु रागी आ सुर सम्‍म ङा मुर नेल्‍लेमी आंइ परमप्रभुमी दोपा पाप रे प्रोंइबा, मेको ताइनीम।

यसैया 63:3

मिनु मेकोमी “गो आं कान अङगुर ख्राक्‍ता। गो नु जात जात ङा मुर सुइ मबाक्‍म। मिनु गो गाइश्‍शा, मेको आन कली ख्राक्‍ता। चुरशा मेको आन कली दिम्‍ताक्‍ङमी। मेको आन रस आं वाम ब्रुंइसाक्‍व। मिनु आं वा नेल्‍ल लल दुम्‍त। योएल ४:१३; प्रकाश १४:२०

इजीकीएल 22:30

मिनु गो मेको आन दातेम गारो प्रोव़शा गेब नु रागी मक्‍याम्‍दुल, दे रागी आ पर्बम आं ङोंइती राप्‍ब मुर का माल्‍ता, तन्‍न मथिदु। इजीकीएल १३:५

होसे 1:7

मिनु गो यहूदा आ खिं कली शिशी कोंइनुङ। मिनु मेको आन कली जोरी सत्रु आन गुइ रे पा प्रोंइनुङ। लिब्रा, तरवार नु लडाइ पाइब शारा नु शारा ङोइक्‍बपुकी रे ममाइ, तन्‍न गो मेको आन कली आंमान प्रोंइनुङमी” दे परमप्रभु यावे, आन परमप्रभुमी देंत। लो-रूहामा आ अर्थ “मदाक्‍नुङ” देंशो बाक्‍ब।

यूहन्‍ना 16:32

नोले नेल्‍ल ब्राशा, इन खिं खिं लशा, आं कली प्रोंइनीनी। मिनु गो का ला बाक्‍नुङ। तन्‍न गो का ला मदुम्‍नुङ। मारदे हना आं आफ गो नु बाक्‍ब। जकरिया १३:७; मत्ती २६:३१

१ कोरिन्‍थी 1:24

परमप्रभु यावेमी योव़शो यहूदी नु ग्रीकपुकीमी चहिं मार देंनीम देंशा हना “परमप्रभु यावे आ सक्ति नु जोक्‍तीक तुइक्‍तीक नेल्‍ल ख्रीस्‍त नु थिंसीब” देंनीम। कलस्‍सी २:३