यसैया 44:19 - Sunuwar Bible

¹⁹ सुइमी मारेइ ममिम्‍ब कामी “गो मेको शी आधा मीम चोता। मेको मी तारी शोब्‍ले चोशा, श्‍ये वाल्‍शा ब्‍वाता। मुल गो मेको आ लीशो ठुटा रे ग्रांग्रा दिशो मूर्ति सेल्चा दुम्‍बा ङा? गो मेको आ ङोंइती बाप्चा दुम्‍बा ङा?” देंब सुइ मबाक्‍ब।

यसैया 44:19 ပူးပေါင်းရင်းမြစ်များ

ब्‍यवस्‍था 27:15

मिनु मेकोपुकीमी “सु मुरुमी मुशा, यपाइश्‍शा मूर्ति सेल्‍ब, मेको परमप्रभु यावे कली ग्रांग्रा दित्‍चा ङा बाक्‍ब। मिनु मेको जोक्‍ब मुरुमी आ सेल्‍शो मूर्ति कली ख्रुइश्‍शोमी वोइक्‍ब, मेको मुर सराप राइब” देंतेक्‍म। मिनु मुर नेल्‍लेमी “आमेन, मोदेंशो दुम्‍ल” देंचा माल्‍नीम। प्रस्‍थान २०:४,२३

१ राजा 11:7

मिनु सोलोमनम मोआब ङा ग्रांग्रा दिशो मूर्ति केमोश नु अम्‍मोनी आन ग्रांग्रा दिशो मूर्ति मोलेक आस कली यरूसलेम आ पूर्ब गे ङा डांडा काम पूजा पतीक थान सेला बाक्‍त। गन्‍ती २१:२९; २राजा २३:१३

१ राजा 11:5

मोपा सोलोमन सीदोनी आन अश्‍‍तोरेथ देवी नु अम्‍मोनी आन ग्रांग्रा दिशो मूर्ति मोलोक आस नोले खोदा बाक्‍त। मोलोक नु मोलेक नें वोइश्‍शो देवता मिल्‍कोम यो बाक्‍त।

होसे 7:2

गो मेको आन मरिम्‍शो पशो नेल्‍ल तुइश्‍शा मिम्‍नुङ। मेकोपुकीम मतुइक्‍नीम। मेकोपुकीमी मरिम्‍शो ला पाइनीम। मिनु मेको आन पाप गेना हना यो आं ङोंइती बाक्‍नीम” देंत।

इजीकीएल 40:4

मिनु मेकोम आं कली “ए मुर, कोव़ङो। मिनु नोफा दाइश्‍शा नेनो। गो इ कली मार मार कोंइक्‍नुङा, मेको रिम्‍शो पा कोव़शा, इ थुंम वोतो। मारदे हना गे मो पचा कली एक चाक्‍शो बाक्‍ते। मिनु गे मार ताइक्‍नेवे, मेको नेल्‍ल इस्राएल आ खिं ङा मुर आन कली शेंदीमी” देंत।

यसैया 45:20

मिनु परमप्रभु यावेमी “गे नेल्‍ल खुम्‍सीशा बुक्‍कीन। गे रागी रागी ङा लीशो मुर आं नेक्‍था जाक्‍कीन। शी के मूर्ति कुरबपुकी मारेइ मतुइक्‍ब बाक्‍नीमी। मेकोपुकीमी आन मूर्ति कली पुंइना पुंइन बाक्‍नीमी। तन्‍न मेकोपुकीमी श्येत रे प्रोंइने मचाप्‍नीम।

यसैया 5:13

मोपतीके आं मुर मारेइ मतुइक्‍थु आन रागी रे ग्‍याइश्‍शा लाइक्‍चा पुंइसीनीम। मेको आन ठेयब मुरपुकी शोव़लुम बेक्‍नीम। आन हुल शुश ब्‍वाक्‍कु तूतू दाक्‍नीम।

२ राजा 23:13

मिनु पिपमी यरूसलेम आ पूर्ब गे बाक्‍शो डांडा ङा थान ग्रांग्रा दिशो सेल्‍पदा बाक्‍त। मेको खतम सेल्‍ब डांडा आ दक्‍खिन गे बाक्‍माक्‍त। मिनु मेकेर पिप सोलोमनमी सीदोनी आन ग्रांग्रा दिशो अश्‍‍तोरेथ देवी आ मूर्ति, मोआब ङा ग्रांग्रा दिशो देवता केमोश आ मूर्ति नु अम्‍मोनी आन ग्रांग्रा दिशो देवता मोलेक आ मूर्ति आन थान सेल्‍पाइश्‍शो बाक्‍माक्‍त। मिनु योसीयाहमी मेको आ सेल्‍शो पूजा पतीक थान प्रेश्‍शा ग्रांग्रा दिशो सेल्‍पदा बाक्‍त।मेको मोलेक देवता कली मिल्‍कोम यो देंशो बाक्‍त। १राजा ११:७

ब्‍यवस्‍था 32:46

मेको आन कली “मुलाक्‍त गे इन कली आं देंशो लोव़ नेल्‍ल इन थुंम वोतीन। इन तमी तौ आन कली देनीन। गे मेको आन कली ‘मेको अरेशो लोव़ नेल्‍ल होस पा पचा माल्‍नीनी’ दे मतीन। ब्‍यवस्‍था ६:७

प्रस्‍थान 7:23

मिनु फाराओ आ खिं लेम्‍माक्‍त। मार दुम्‍मे, मारेइ ममिम्‍ता बाक्‍त।

हाग्‍गै 1:5

मिनु मुर नेल्‍ल आन परमप्रभु यावेमी “गे दोदेंशो बाक्‍नीनी, मिम्‍तीन।

यसैया 46:8

मिनु “गे हेंथे गाक्‍बपुकी, आं देंशो मिम्‍तीन। साइ ङा लोव़ इन थुंम वोतीन।

२ राजा 23:14

मिनु योसीयाहमी थान ङा ख्रुक्‍शो फुल्‍लु जिक्‍शा फस पोक्‍पाइक्‍मी बाक्‍त। मिनु मूर्ति पाइश्‍शो थाम एश्‍शा मेको आ बाक्‍तीकेम मुर आन रुशेम प्रिंपाइक्‍मी बाक्‍त।

यसैया 44:18

मेको मुरपुकीमी मारेइ मतुइक्‍थु, मरुप्‍नीम। मारदे हना मेको मिक्‍च मताइनीमी। आन थुं मरोक्‍सीशो बाक्‍ब। मेकोपुकी मारेइ मरुप्‍ब बाक्‍नीम।

यसैया 66:3

मिनु सुमी ब्‍यफ साइक्‍बा, मेको मुर साइक्‍ब खोदेंशो बाक्‍ब। सुमी पाठा का चढ़ेबा, मेको कुचुम आ शुर जिक्‍ब खोदेंशो बाक्‍ब। सुमी अन्‍न चढ़ेबा, मेको पोव़ आ हुश चढ़ेब खोदेंशो बाक्‍ब। सुमी मिम्‍शा चढ़ेतीके धूप चोइबा, मेको मूर्ति पूजा पाइब खोदेंशो बाक्‍ब। मेको आन दला दाक्‍स पाइनीमी। आन ग्रांग्रा दिशो गेयमी ग्‍येरसीनीमी। १सामुएल १५:२२-२३

होसे 4:12

आं मुरपुकीमी शी के मूर्ति कली हिल्‍लो पाइनीम। मिनु मेकोपुकीमी कोक्‍केमी साहीत कोव़नीम। मारदे हना तेल्‍लेम पतीक थुंमी मेको आन कली हेंथे गाक्‍पाइश्‍शो बाक्‍ब। मेकोपुकीमी तेल्‍लेम पचा कली परमप्रभु कली प्रोंइतेक्‍म। येरमीया २:२७; होसे ५:४