यसैया 42:10 - Sunuwar Bible

¹⁰ परमप्रभु यावे कली नक कुम्‍सो का पने। रागी आ सुर ङा मुरपुकी परमप्रभु यावे कली कुम्‍सो पशा ठेयब सेलीन। समुन्‍द्र नु समुन्द्रम बाक्‍बपुकी परमप्रभु कली ठेयब सेलीन। समुन्‍द्र आ नेक्‍था बाक्‍ब नेल्‍लेमी मेको कली ठेयब सेलीन। भजन संग्रह ३३:३

यसैया 42:10 ပူးပေါင်းရင်းမြစ်များ

१ इतिहास 16:32

समुन्‍द्र नु मेकेर बाक्‍ब मारेइ मारेइ नेल्‍ल ग्‍येरशा रेयके पामेक्‍ल। रू नु मेकेर बाक्‍ब मारेइ मारेइ ग्‍येरसीमल।

भजन संग्रह 150:6

सोक्‍त पाइश्‍शो नेल्‍लेमी परमप्रभु यावे कली ठेयब सेलीन। परमप्रभु यावे कली ठेयब सेलीन। भजन संग्रह ४१:१४; प्रकाश ५:१३

भजन संग्रह 33:3

मेको कली नक कुम्‍सो का पने। रिम्‍शो पा ताप्‍शा, ग्‍येरसीने। भजन संग्रह ४०:४; भजन संग्रह ९६:१; भजन संग्रह ९८:३; भजन संग्रह १४४:९; भजन संग्रह १४९:१; यसैया ४२:१०; प्रकाश ५:९

भजन संग्रह 40:3

मेकोमी आं कली नक कुम्‍सो का पपाइक्‍ती। आंइ परमप्रभु कली ठेयब सेल्‍तीक कुम्‍सो पपाइक्‍ती। मिनु शुश मुरुम एको तशा, नेंशा, परमप्रभु यावे कली मान पा हिंशा, मेको कली थमा सुइक्‍नीम। भजन संग्रह ३३:३

भजन संग्रह 65:5

आंइ पुंइशो लोव़ इन ठेयब गेयमी आंइ कली प्रोंइशा लोव़ लेत्‍नीनी। परमप्रभु, आंइ कली श्‍येत रे प्रोंइब बाक्‍नीनी। गे ङोन बाक्‍ब रागी नु नेल्‍ल क्‍येङा ङोन ङा समुन्‍द्र आ नेक्‍था बाक्‍ब आन आस बाक्‍नीनी।

भजन संग्रह 72:10

टारशीश नु ङोन ङा टापु ङा पिपपुकीमी मेको कली तिरो थाप्‍तमेक्‍ल। शेबा नु सेबा ङा पिपपुकीमी मेको कली कोसेली चाक्‍गमेक्‍ल। यसैया ६०:९; भजन संग्रह ६८:३०; १राजा १०:१-२

भजन संग्रह 96:11

सरीङ नु रागी ग्‍येरसीसल। समुन्‍द्र नु मेकेर बाक्‍ब नेल्‍ल रेयके पामेक्‍ल। भजन संग्रह ९८:७-९; यसैया ४९:१३

भजन संग्रह 97:1

परमप्रभु यावे पिप बाक्‍ब। रागी ग्‍येरसेक्‍ल। ङोन ङोन ङा रागी ङा मुरपुकी यो ग्‍येरसीमल। भजन संग्रह ९३:१

प्रस्‍थान 15:1

मिनु नोले मोसा नु इस्राएलीपुकीमी परमप्रभु यावे कली कुम्‍सो पाम्‍तेक्‍म। “गो परमप्रभु यावे कली कुम्‍सो पाइनुङ। मारदे हना मेकोमी आ ठेयब सक्ति कोंइशा, ग्रात। शारा नु शारा ङोइक्‍ब आन कली समुन्‍द्रमी ताइक्‍ताक्‍व। प्रकाश १५:३

प्रस्‍थान 20:11

मारदे हना परमप्रभु यावेमी ६ नाक्‍तीमी सरीङ नु रागी, ठेयब समुन्‍द्र नु ठेयब समुन्‍द्रमी बाक्‍शो नेल्‍ल आन कली सेल्‍तु। मिनु नोले ङा नाक्‍त नांइसाक्‍व। मोपतीके परमप्रभु यावेमी ‘मेको आं नाक्‍त बाक्‍ब’ दे मेको नाक्‍त कली आसीक गेशो बाक्‍ब। उत्‍पत्ती २:२-३

यसैया 11:11

मेना परमप्रभुमी आ लीशो मुर आन कली लेंशा प्रोंइशा चाक्‍ब। मिनु ते रे प्रोंइशा चाक्‍ब देंशा हना, अस्‍सुर, इजीप्‍त, पथ्रोस, एथीयोपीया, एलाम, शिनार, हमाथ नु समुन्‍द्र आ नेक्‍था रे प्रोंइशा चाक्‍ब। इजीकीएल ३७:२१-२२

यसैया 12:5

परमप्रभु यावे कली ठेयब सेल्‍तीक कुम्‍सो पने। मारदे हना मेकोमी थम सक्ति पाइश्‍शो गेय पशो बाक्‍ब। एको लोव़ रागी नेल्‍लेमी ब्रपतीन।

यसैया 42:4

मेकोम रागी नेल्‍लेम मुर आन कली ठीक निसाफ पतीक लां मकोंइदा सम्‍म ग्‍युम्‍शा मगोल्‍ब। समुन्‍द्र आ नेक्‍थाम बाक्‍ब मुरपुकी आ शेंशो नेंचा दाक्‍शा, मेको कली रिम्‍नीम” देंत।

यसैया 44:23

गे सरीङ कुम्‍सो पावो। रागी नेल्‍ल रेयके पा, शुश कुम्‍सो पने। गे डांडा, ब्‍वाकी नु रवा नेल्‍लेमी कुम्‍सो पने। मारदे हना परमप्रभु यावेमी याकूब कली श्‍येत रे प्रोंइतु। इस्राएल रागीमी आं नें ठेयब सेल्‍शो बाक्‍ब। यसैया ४९:१३; यसैया ५५:१२; भजन संग्रह ९६:११-१३

यसैया 48:20

‘बेबीलोन रे ग्रूङीन। कल्‍दी आन रागी रे प्रोक्‍कीन’ दे ठेयब सेंदा पा नेल्‍ल आन कली नेंपतीन। रागी ङा सुर सम्‍म नेंपतीन। गेपुकीमी ‘परमप्रभु यावेमी आ गेय पाइब याकूब कली पाप रे प्रोंइतु’ दे नेंपतीन” देंत। येरमीया ५१:६; प्रकाश १८:४

यसैया 49:13

सरीङ, ग्‍येरसीशा कुम्‍सो पावो। रागी, ग्‍येरसो। डांडापुकी ग्‍येरशा, कुम्‍सो पने। मारदे हना परमप्रभु यावेमी आ मुर आन कली लेम्‍‍ताक्‍व। मेकोमी श्‍येत जाइब आन कली शिशी पाइब। यसैया ४४:२३

यसैया 49:6

मिनु मेकोमी “याकूब आ थर ङा मुरपुकी नु इस्राएल ङा लीशो मुर आन कली ङोंइती ङा खोदेंशो सेल्‍चा कली इ कली आइक्‍च गेय का बाक्‍ब। गो इ कली रागी रागी ङा मुर आन कली छेङछेङ दुम्‍पाइक्‍नुङ। मिनु मेको आं पाप रे प्रोंइतीके रागी ङा सुर सम्‍म ब्रल” देंत। यसैया ४२:६; यसैया ६०:३; लूका २:१२; प्रेरित १३:४७

यसैया 51:5

गो आं ठीक पतीके रीब पा चाक्‍नुङ। गो ग्राचा चिक्‍शो बाक्‍नुङ। मिनु गो जात जात ङा मुर आन कली निसाफ पाइनुङ। समुन्‍द्र आ नेक्‍था बाक्‍ब मुरपुकीम आं लां कोव़नीम। आं वारच पतीके रिम्‍नीम। यसैया ४२:४

यसैया 60:6

गे शुश दलओंठ ताइनेवे। मिदयान नु एफाह ङा दलओंठ आन चाइक्‍बपुकीमी इ रागी ब्रीनीम। मिनु शेबा रे यो चाक्‍नीम। मेकोपुकीमी सुन नु धूप चाक्‍शा ‘परमप्रभु यावे ठेयब बाक्‍ब’ दे ग्‍येरशा आं पर्बम शेंनीम। भजन संग्रह ७२:१०; मत्ती २:१-११

यसैया 60:9

समुन्‍द्र आ नेक्‍था ङा मुरपुकीम आं लां कोव़नीम। ङोंइती टारसीस ङा जहाजम इ आल आन कली ङोन रागी रे चाक्‍नीम। मेको आन सुन चांदी यो मेकोपुकी नु बाक्‍ब। मेको परमप्रभु यावे, इ परमप्रभु आ नेंमी जाक्‍नीम। इस्राएली आन का ला बाक्‍शो परमप्रभु आ पर्बम चाक्‍ब। मारदे हना मेकोमी इन कली दारशो सेल्‍शो बाक्‍ब। यसैया ४२:४; यसैया ५५:५

यसैया 62:11

परमप्रभु यावेमी रागी आ सुर सम्‍म ङा मुर नेल्‍ल आन कली “सियोन आ तमी कली ‘इ कली पाप रे प्रोंइब जाक्‍ना जाक्‍न बाक्‍ब। इ कली गेतीक इनाम मेको नु बाक्‍ब। मेको इ ततीक इनाम आ ङोंइती गाक्‍ब’ देंशो बाक्‍ब। जकरिया ९:९; यसैया ४०:९-१०

यसैया 65:14

आं गेय पाइबपुकी थुंम ग्‍येरसीशा, कुम्‍सो पाइनीमी। गेपुकी चहिं श्‍येत जशा, इन थुं लुक्‍च लशा खाइश्‍शा, वाइ ब्रेश्‍शा ङाक्‍नीनी।

सेफन्‍याह 2:11

परमप्रभु यावेमी मेको आन कली थम मरिम्‍शो पाइब। रागी ङा देवी देवता नेल्‍ल आन कली खतम पोक्‍ब। नेल्‍ल आन बाक्‍तीकेमी बाक्‍शा, मेको आ ङोंइती बाप्‍चा माल्‍नीम। रागी रागी समुन्‍द्र आ सुंगी नु टापु ङा मुर नेल्‍ल परमप्रभु यावे आ ङोंइती बाप्‍नीम’ देंत।

प्रकाश 14:3

मिनु मेको ठेयब ताप्‍तीके ताप्‍बपुकीमी ठेयब नित्‍तीक आ ङोंइती, मेको ४ ओटा सेस जन्‍तु नु शेंब खाल्‍पा आन ङोंइती नक कुम्‍सो का पाम्‍तेक्‍म। मेको कुम्‍सो सुइमी शेंसीने मचबेम। तन्‍न मेको लाख का ४४ हजार मुरुम ला मेको कुम्‍सो शेंसीने चाप्‍तेक्‍म।

प्रकाश 5:9

मिनु मेकोपुकीमी पाठा कली नक कुम्‍सो का पाम्‍तेक्‍म। मार नक कुम्‍सो पाम्‍तेक्‍म देंशा हना “मेको कागज ताक्‍ने नु प्राक्‍ने चाप्‍ब, गे का ला ननी। मारदे हना गे मुर आन कली परमप्रभु यावे आ नेक्‍था बाक्‍पाइक्‍चा कली ग्‍याप्‍तीनी। दोपा ग्‍याप्‍तीनी देंशा हना, साइक्‍चा पुंइसीशा, इन हुश शाइश्‍शा ग्‍याप्‍तीनी। मिनु गे मार मुर ग्‍याप्‍तीनी देंशा हना, नेल्‍ल थर रे, नेल्‍ले लोव़ रे, नेल्‍ल जात रे नु नेल्‍ल रागी रे मुरपुकी ग्‍याप्‍तीनी। भजन संग्रह ३३:३