यसैया 2:11 - Sunuwar Bible

¹¹ मुर नेल्‍ल आन ठेयब लेश्‍शो आइक्‍च सेल्‍चा पुंइसीनीम। बोरशो मुर नेल्‍ल ब्रेम्‍शो सेल्‍चा पुंइसीनीम। मेको नाक्‍ती परमप्रभु यावे ला ठेयब दुम्‍ब। यसैया २:११

यसैया 2:11 ပူးပေါင်းရင်းမြစ်များ

२ सामुएल 22:28

गे ब्रेम्‍शो मुर आन कली प्रोंइनीनी। तन्‍न ठेयब लेश्‍शो आन कली आइक्‍च सेल्‍‍नीनी।

भजन संग्रह 18:27

गे दिप्‍चा पुंइसीशो मुर आन कली श्‍येत रे प्रोंइनीनी। मिनु ठेयब लेश्‍शो मुर आन कली आइक्‍च सेल्‍नीनी। अय्‍युब २२:२९

भजन संग्रह 18:28

गे आं बत्ती ब्रपाइक्‍नीनी। परमप्रभु यावे, आं परमप्रभु, गे आं छिङछिङ कली छेङछेङ सेल्‍नीनी।

भजन संग्रह 20:8

मेकोपुकी गोल्‍नीम। तन्‍न गोपुकी राप्‍स ङा राप्‍स बाक्‍नीकी।

भजन संग्रह 46:10

मेकोमी “सिक्‍सी पा बाक्‍कीन। गो परमप्रभु नङ, दे तुइक्‍तीन। गो रागी रागी ङा मुर आन दातेमी ठेयब दुम्‍नुङ। गो रागी नेल्‍लेमी नेल्‍ल क्‍येङा ठेयब दुम्‍नुङ” देंत।

भजन संग्रह 46:11

मुर नेल्‍ल आन परमप्रभु यावे गोपुकी नु बाक्‍ब। याकूब आ परमप्रभु आंइ बोल्‍यो दरवार बाक्‍ब। ठेयब सेंदा पा।

भजन संग्रह 94:2

रागी कली निसाफ पाइब, बोक्‍कीन। मिनु ठेयब लेश्‍शो आन कली आन पशो ङा क्‍येक्‍क लेत्‍तीन। उत्‍पत्ती १८:२५

हितोपदेस 16:5

परमप्रभु यावे ठेयब लेश्‍शो आन कली तशा ग्रांग्रा दी‍ब। मेकोपुकी सजाइ मतथु मब्रोंइनीम।

हितोपदेस 30:13

का निक्‍शी मुर ठेयब लेश्‍शो बाक्‍नीम। मेको शुश बोरशो बाक्‍नीम।

यसैया 10:12

मिनु परमप्रभुमी सियोन डांडा नु यरूसलेमम पशो गेय थुमा नोले मेकोमी अस्‍सुर ङा ठेयब लेश्‍शो नु बोरशो पिप कली सजाइ गेब। यसैया ३७:३६

यसैया 12:1

मेको नाक्‍ती गेपुकीमी “परमप्रभु यावे, गे रिम्‍शो पाइब बाक्‍नीनी। गे आंइ पर्बम गाइक्‍ताक्‍नी हना यो, इन गाइक्‍चा नाइक्‍साक्‍व। मुल गे आंइ कली लेम्‍नीनी।

यसैया 12:4

मेको नाक्‍ती गेपुकीमी “परमप्रभु यावेमी रिम्‍शो पाप्‍तु” दे मुर आन कली देनीन। मेकोपुकी नु लोव़ पने। मेको आ गेय रागी रागी ङा मुर आन कली तुइक्‍पतीन। आ नें नेल्‍ल क्‍येङा ठेयब बाक्‍ब, दे शेंदीने। १इतिहास १६:८; भजन संग्रह १०५:१

यसैया 13:11

परमप्रभुमी “गो रागी कली आ मरिम्‍शो पशो आ पर्बम सजाइ गेनुङ। आं अरेशो लोव़ मटिथु, मरिम्‍शो पाइब आन कली सजाइ गेनुङमी। मिनु ठेयब लेश्‍शो आन ठेयब लेत्‍तीके साम्‍पाइक्‍नुङमी। ठेयब श्‍येत गेशा हुकुम पाइब आन कली ब्रेम्‍पाइक्‍नुङमी।

यसैया 14:15

तन्‍न गे बेक्‍शो मुर आन बाक्‍तीकेम तोक्‍चा पुंइसाक्‍वे। तुरस क्‍येङा यो उइ तोक्‍चा पुंइसाक्‍वे।

यसैया 2:17

नु मुर नेल्‍ल आन ठेयब लेश्‍शो आइक्‍च सेल्‍चा पुंइसीनीम। बोरशो मुर नेल्‍ल ब्रेम्‍शो सेल्‍चा पुंइसीनीम। मेको नाक्‍ती परमप्रभु यावे ला ठेयब दुम्‍ब। यसैया २:१

यसैया 23:9

मिनु मुर नेल्‍ल आन परमप्रभु यावेमी मेको मिम्‍ताक्‍व। आ शुश दारस आ पर्बम ठेयब लेत्‍तीके खतम सेल्‍चा नु आ मान पाइक्‍चा पुंइसीब आन कली मुने तोक्‍चा कली मिम्‍ताक्‍व।

यसैया 24:21

मेको नाक्‍ती परमप्रभु यावेमी स्‍वर्गम बाक्‍ब सक्ति पाइश्‍शो आन कली सजाइ गेब। मिनु रागी कली सासन पाइब पिप आन कली सजाइ गेब। दानीएल १०:१३; येरमीया ४६:२५

यसैया 25:9

मिनु मेको नाक्‍ती मुरपुकीमी “कोव़ङीन, मेको आंइ परमप्रभु बाक्‍ब। गो मेको आ लां कोव़तक। मिनु मेकोम आंइ कली श्‍येत रे प्रोंइतु। मेको आंइ रिम्‍शा बाक्‍शो परमप्रभु यावे बाक्‍ब। गोपुकी आ प्रोंइशो तशा ग्‍येरसाक्‍क। भजन संग्रह ४८:१५

यसैया 26:1

मेको नाक्‍ती यहूदा रागी ङा मुरपुकीम मार कुम्‍सो पाइनीम देंशा हना “आंइ सहर बोल्‍यो बाक्‍ब। परमप्रभुमी आंइ कली ग्राचा गेब। लडाइ पाइब आन कली ओव़ने मचाप्‍तीके गारो हिरब।

यसैया 28:5

मेको नाक्‍ती मुर नेल्‍ल आन परमप्रभु यावे आ लीशो मुर आन कली छेङछेङ पा ब्रशो सिरपेच नु पियाम चुइक्‍तीके दुम्‍ब।

यसैया 29:18

मेको नाक्‍ती नोफा मनेंबपुकी किताब ङा लोव़ नेंनीम। गेना हना यो छिङछिङम बाक्‍ब, मिक्‍च मताइबपुकी मिक्‍च ताइब दुम्‍नीम। यसैया ३५:५; मत्ती ११:५

यसैया 30:18

मुल सम्‍म परमप्रभु यावेमी इन कली शिशी पचा कली रिम्‍ब। इन कली आ दाक्‍तीके कोंइचा कली बोक्‍ब। मारदे हना परमप्रभु यावे ठीक निसाफ पाइब परमप्रभु बाक्‍ब। सु सुम मेको कली रिम्‍नीमी, मेको ग्‍येरसीशो बाक्‍नीम।

यसैया 30:23

मिनु परमप्रभुमी इन शोक्‍शो रू कली रेउ यिपाइश्‍शा, अन्‍न सिप्‍पाइक्‍ब। मिनु अन्‍न ग्रेल्‍शा, शुश जचा ताइनीनी। मेना इन बी ब्‍यफ ठेयब दिंममी जोइनीम।

यसैया 37:23

गे सु कली शुक्‍शी पवी? सु आ पर्बम गे ठेयब लेश्‍शो लोव़ पवी? गे इस्राएली आन का ला बाक्‍शो परमप्रभु आ ङोंइती ठेयब लेश्‍शो दुमे?

यसैया 4:1

मेना ७ जना मीश मुरपुकीमी वोंइश मुर का कली ग्‍याइश्‍शा “गो आंइ जचा थोव़क जाइनीकी। आंइ वा फेक्‍नीकी। आंइ कली इन नें गेशा, आंइ मुने साम्‍शा, आल थिपाइक्‍की” देंनीम।

यसैया 40:23

मेकोमी सासन पाइब आन कली शोर गाक्‍शो सेल्‍ब। हुकुम पाइब जाम्‍शा लाइनीम।

यसैया 52:6

मोपतीके आं मुर आन कली आं नें तुइक्‍पाइक्‍नुङमी। काबु नाक्‍ती मेकोपुकीमी ‘गो मेको लोव़ पाइब बाक्‍नुङ’ दे तुइक्‍चा माल्‍नीम” देंत।

येरमीया 12:9

मार, मेको सिवार आं थेरशो रू तशा गेहे पाइबा ङा? आं ङोंइती छिर छिर पाइश्‍शो सिखारी चिक्‍ब खोदेंशो मदुम ङा? मेको कली अर्को सिखारी चिक्‍बपुकीम पुम्‍शा राम्‍शी तोव़मेक्‍ल। लावो, लशा ब्‍वाकी ङा जन्‍तु नेल्‍ल आन कली पुक्‍मी। मिनु मेको कली ब्‍वपाइक्‍चा कली चाक्‍मी। यसैया ५६:९

येरमीया 9:24

तन्‍न सु ठेयब लेत्‍नीमी, मेकोपुकीम ‘गो परमप्रभु यावे कली तुइक्‍नुङ’ देंमल ‘मेको थमा पा परमप्रभु यावे बाक्‍ब, दे तुइक्‍नुङ, दे नें बोरपाइक्‍ने चाप्‍नीम। परमप्रभु यावेमी रागी कली शिशी पाइब, ठीक निसाफ नु ठीक पाइब बाक्‍ब’ देंमल। मारदे हना मेको आं दाक्‍शो बाक्‍ब, दे ग्‍येरसीनुङ” दे परमप्रभु यावेम देंत। १कोरिन्‍थी १:३१; २कोरिन्‍थी १०:१७

इजीकीएल 38:14

मोपतीके “ए मुर, गोग कली आं लोव़ पावो। मेको कली ‘परमप्रभु, परमप्रभु यावेमी इ कली आं मुर इस्राएली मारेइ मदुम्‍थु रिम्‍शो पा बाक्‍मानु, गे मेक मलाइनेवे?

इजीकीएल 38:19

मेको नाक्‍ती गो आं जोंब बोक्‍शा, गाइश्‍शो चुरशोम इस्राएल रागीम ठेयब ख्रिनु कुइब।

इजीकीएल 39:11

मिनु परमप्रभु यावेमी “मेको नाक्‍ती गो गोग आ मुर आन कली इस्राएल रागीम तुरस का गेनुङ। मेको इस्राएल ङा समुन्‍द्र आ पूर्ब गे मुर आन लतीक बेंसी ङा लांम बाक्‍ब। मेकेर गोग आ लडाइ पाइब नु मेको आन कली वारच पाइब हुल नेल्‍ल थिम्‍चा पुंइसीनीम। मोपतीके मेको बाक्‍तीक कली हामोन-गोग आ बेंसी देंनीम।

इजीकीएल 39:22

मिनु मेको नाक्‍त रे इस्राएल आ खिं ङा मुरपुकीम गोन परमप्रभु यावे, मेको आन परमप्रभु नङ, दे तुइक्‍नीम।

दानीएल 4:34

मिनु पिपमी “मेको देंशो नेल्‍ल जाक्‍दीम नोले, गो आं पिया पोक्‍शा सरीङ गे कोव़ता। मिनु आं निप्‍स लेंशा रिम्‍शो दुम्‍त। मिनु गो नेल्‍ल क्‍येङा ठेयब नु गेना हना यो ब्रोंइशा बाक्‍ब परमप्रभु कली ठेयब सेल्‍शा, मान पाता। मेको आ सासन पतीके गेना हना यो लीब। मेको आ राज्‍य पाला पाला सम्‍म लीब। दानीएल ३:३३

होसे 2:16

मिनु परमप्रभु यावेमी “मेको नाक्‍त गे आं कली ‘आं वोंइश’ देंनेवे। मिनु ‘आं बाल देवता’ मदेंनेवे। यसैया ५४:५

होसे 2:18

गो मेको नाक्‍त मेकोपुकी, ब्‍वाकी ङा जन्‍तुपुकी, सरीङ ङा चिक्‍बपुकी नु खपीम ग्रे‍शा गाक्‍ब जन्‍तुपुकी नु कबल का पाइनुङ। मिनु मेको रागी ङा मुरपुकीमी मेना रे लिब्रा, तरवार नु लडाइ मताइनीम। मिनु मुर नेल्‍ल हेम्‍म पा बाक्‍चा ताइनीम। उत्‍पत्ती ९:९-१०; इजीकीएल ३४:२५

होसे 2:21

परमप्रभु यावेमी “मेको नाक्‍त गो सरीङ कली लोव़ लेत्‍नुङ। सरीङमी रागी कली लोव़ लेप्‍ब।

योएल 3:18

मेको नाक्‍ती डांडाम शुश अङगुर सित्‍नीम। मिनु पहाडम दूध शुश बाक्‍ब। यहूदा ङा खोला नेल्‍लेमी ब्‍वाक्‍कु शाइक्‍नीम। मिनु परमप्रभु यावे आ खिं रे पा ब्‍वाक्‍कु बुक्‍तीके शित्तीम ङा दिंम जिप्‍पाइक्‍ब। आमोस ९:१३; इजीकीएल ४७:१

आमोस 9:11

परमप्रभु यावे, इन परमप्रभुमी “गो मेको नाक्‍त दाऊद आ ब्रेश्‍शो खिं आन कली लेंशा सेल्‍नुङ। मिनु मेको आ ब्रेश्‍शो गारो आ पोव़ला सुइ‍नुङ। मिनु मोपा नेल्‍ल साइ ङोंइती ङा खोदेंशो सेल्‍नुङ। १राजा १२:१९; प्रेरित १५:१६-१७

ओबदिया 1:8

परमप्रभु यावेमी “गो मेको नाक्‍त एदोम ङा जोक्‍ब तुइक्‍ब मुर आन कली खतम सेल्‍नुङ। एसाव आ डांडाम बाक्‍ब रुप्‍ब मुर आन कली साइक्‍नुङमी।

मीका 2:3

मोपतीके परमप्रभु यावेमी मार देंत देंशा हना “गो मेको आन खिं ङा मुर आन कली श्‍येत गेनुङ। मेको रे आंम कली प्रोंइने मचाप्‍नीम। ठेयब लेश्‍शा गाक्‍ने मचाप्‍नीम। मारदे हना मेको थम श्‍येत जतीक नाक्‍त बाक्‍ब। आमोस ५:१३

मीका 4:6

परमप्रभु यावेमी मार देंत देंशा हना “मेको नाक्‍ती गो खोइल मदुक्‍ब आन कली खुप्‍नुङमी। मिनु गो खेरशो नु श्‍येत जशो आन कली खुप्‍नुङमी। येरमीया ३१:८; ब्‍यवस्‍था ३०:४

मीका 5:10

मेको नाक्‍ती गो इन शारा इन दाते रे खतम पोक्‍नुङ। इन बग्‍गी प्रेश्‍शा गेनुङ।

सेफन्‍याह 3:11

मेको नाक्‍त आं कली मटिशो आ पर्बम गे मुने दोक्‍चा ममाल्‍नीनी। मेना इ दाते ङा ठेयब लेश्‍शो मुर आन कली ग्रुंइनुङमी। आं डांडामी गे लेंशा ठेयब लेश्‍शो मदुम्‍‍नेवे।

सेफन्‍याह 3:16

मेको नाक्‍त यरूसलेम कली सियोन ङा मुर महिनीन। गे शुश गेय पने।

जकरिया 9:16

मेको नाक्‍ती परमप्रभु यावे, आन परमप्रभुमी मेको आन कली श्‍येत रे प्रोंइब। मारदे हना मेकोपुकी आ बगाल खोदेंशो बाक्‍नीम। मेको सिरपेच ङा हीरा खोदेंशो पा ब्राइनीम। मेकोपुकी परमप्रभु यावे, आन परमप्रभु आ रागीम हीरा खोदेंशो पा ब्राइनी‍म।

मलाकी 4:1

मुर नेल्‍ल आन परमप्रभु यावेमी “आं निसाफ पतीक नाक्‍ती जाक्‍ब। मेको ठेयब मी खोदेंशो पा ब्रशो बाक्‍ब। मेना ठेयब लेश्‍शो नु मरिम्‍शो पाइब नेल्‍ल सोव़शो ठुटा खोदेंशो बाक्‍नीम। मेको नाक्‍ती मीम मेको आन कली नेक्‍ब। मिनु मेको आन शाक्‍श नु राशी यो मलीब।

लूका 18:14

परमप्रभु यावेमी मेको कली आ पाप क्‍याम्‍शा, ठीक दुम्‍पाइक्‍तु। मिनु ठीक दुम्‍शा, आ खिं लेत्‍त। फरिसी चहिं पाप क्‍याम्‍चा मतव। मारदे हना सुमी ठेयब सुंइ‍सीबा, मेको महिक्‍शो दुम्‍ब। ठेयब मसुंइ‍सीब कली चहिं परमप्रभु यावेमी ठेयब सेल्‍ब” दे येसुमी माइक्‍मी बाक्‍त। मत्ती २१:३१; लूका १४:११; मत्ती २३:१२

२ कोरिन्‍थी 10:17

सु बोरनीमी, मेको प्रभु आ पर्बम नें बोरपदमेक्‍ल। येरमीया ९:२३-२४; १कोरिन्‍थी १:३१

२ कोरिन्‍थी 10:5

परमप्रभु यावे कली थमा सुइक्‍ब आन कली तेक्‍बमी पशो लोव़, ठेयब लेश्‍शा थमा मसुइक्‍तीक लोव़ खतम सेल्‍तक। मिनु ख्रीस्‍त आ लोव़ टीब दुम्‍पाइक्‍चा कली मटीब मिम्‍तीक नेल्‍ल ग्‍याइश्‍शा लाइक्‍ब खोदेंशो बाक्‍नीकी।

२ थिस्‍सलोनिकी 1:10

थमा सुइक्‍बपुकी चहिं आ जाक्‍ची नाक्‍त आ नें ठेयब सेल्‍शा, थमा सुइक्‍ब नेल्‍लेमी आ छेङछेङ तशा छक लाक्‍नीम। मारदे हना गेपुकी आंइ शेंशो लोव़ थमा सुइक्‍तीनी।

१ पत्रुस 5:5

मिनु गे ठिटापुकी, शेंब खाल्‍पा आन देंशो लोव़ टिने। गे नेल्‍ल ब्रेम्‍शो थुं पाइश्‍शो दुम्‍शा, गेय पमुने। मारदे हना परमप्रभु यावेमी ठेयब लेश्‍शो मुर आन कली मकोव़ब, ब्रेम्‍शो थुं पाइश्‍शो मुर आन कली ला शिशी पाइब। एफिसी ५:२१; अय्‍युब २२:२९; हितोपदेस ३:३४; मत्ती २३:१२; याकूब ४:६