होसे 4:9 - Sunuwar Bible

⁹ मिनु मुरपुकी दोदेंशो बाक्‍मा, मोदेंशो चढ़ेबपुकी बाक्‍नीम। गो मुरपुकी नु चढ़ेब नेल्‍ल आन कली सजाइ गेनुङ। मेकोपुकीमी दोदेंशो पामे, मोदेंशोन सजाइ गेनुङ।

होसे 4:9 ပူးပေါင်းရင်းမြစ်များ

हितोपदेस 11:31

ठीक पाइब मुरपुकीम रागीम बाक्‍मानु, आन ठीक पशो ङा इनाम ताइनीम। परमप्रभु यावे आ अरेशो मटीब नु मरिम्‍शो पाइबपुकीमी यो आन मरिम्‍शो पशो ङा इनाम ताइनीम। १ पत्रुस ४:१७-१८

हितोपदेस 12:14

मुरपुकी आंम लोव़म पतीके मान ताइनीम। मिनु गेय पाइब मुरपुकीमी आन गेय ङा इनाम ताइनीमी। हितोपदेस १८:२०

हितोपदेस 5:22

परमप्रभु यावे आ अरेशो मटीब मुर आ मरिम्‍शो पशोमी ग्‍याइक्‍चा पुंइसीब। मेको आ पाप आ ग्‍याइलीमी रेत्‍चा पुंइसीब।

यसैया 24:2

मुर आन कली दोदेंशो दुम्‍बा, चढ़ेब आन कली यो मोदेंशो दुम्‍ब। वाइल आन कली दोदेंशो दुम्‍बा, आन होव़प आन कली यो मोदेंशो दुम्‍ब। वाइलीम आन कली दोदेंशो दुम्‍बा, आन होव़पोक्‍म आन कली यो मोदेंशो दुम्‍ब। ग्‍याप्‍ब आन कली दोदेंशो दुम्‍बा, लेयब आन कली यो मोदेंशो दुम्‍ब। जेर थुइक्‍ब आन कली दोदेंशो दुम्‍बा, जेर गेब आन कली यो मोदेंशो दुम्‍ब।

यसैया 3:10

दोस मताइब मुर आन कली रिम्‍शो दुम्‍ब। मारदे हना मेकोमी आ गेय पशो रे जाइब।

येरमीया 5:31

परमप्रभु यावे आ लोव़ पाइबपुकीम जोल पा लोव़ पाइनीम। दोपा परमप्रभु यावे आ लोव़ पाइबपुकीम जोल पा लोव़ पाइनीमी, मोपा चढ़ेबपुकीम मुर आन कली हुकुम पाइनीम। मिनु आं मुरपुकी चहिं मोदेंशोन दुम्‍चा दाक्‍नीम। तन्‍न नोले ङा नाक्‍ती मार, पाइनीनी?” देंत। इजीकीएल १३:६

इजीकीएल 44:10

तन्‍न इस्राएली हेंथे गाक्‍मानु, लेवीपुकी हेंथे गाक्‍शा, आं कली प्रोंइशा, आन मूर्ति कली पूजा पशो बाक्‍तेक्‍म। मेकोपुकीम आन पाप आ सजाइ तचा माल्‍नीम।

इजीकीएल 44:12

तन्‍न लेवीपुकीम मुर आन कली आन मूर्ति पूजा पतीकेम वारच पाम्‍तेक्‍म। मोपा मेकोपुकी इस्राएल आ खिं ङा मुर आन कली मरिम्‍शो पपाइक्‍तेक्‍म। मोपतीके मेकोपुकी सजाइ तचा माल्‍नीम, दे कसम जाता।

होसे 1:4

मिनु परमप्रभु यावेमी होसे कली “मेको तौ आ नें येज्रेल वोतो। मारदे हना गो रीब पा येहू आ खिं कली येज्रेलमी पशो हुश ख्राक्‍श आ पर्बम क्‍येक्‍क लेत्‍नुङ। मिनु इस्राएल राज्‍य खतम पोक्‍नुङ। २राजा १०:१-१४

होसे 10:10

गो गेना दाक्‍नुङा, मेना मेको आन कली सजाइ गेनुङ। मेको आन साप्‍पा मरिम्‍शो पशो आ पर्बम रागी रागी ङा मुर आन हुलमी मेको आन कली फ्रेंशा लाइक्‍नीम।

होसे 12:2

परमप्रभु यावेमी यहूदा आ मरिम्‍शो पशो ङा सजाइ गेप्‍तु। मेकोमी याकूब आ मरिम्‍शो पशो आ पर्बम सजाइ गेब। मेकोपुकीमी दोदेंशो पामे, मोदेंशो पा सजाइ गेब।

होसे 12:3

मेकोमी आ ममा आ कोंवजीम आ लोक्‍ब आ गेंग्रे ग्‍याइक्‍ताक्‍व। मिनु ठेयब दुम्‍शा, परमप्रभु यावे नु राम्‍शी पाप्‍तु। उत्‍पत्ती २५:२२,२६; उत्‍पत्ती ३२:२५-२९

होसे 7:2

गो मेको आन मरिम्‍शो पशो नेल्‍ल तुइश्‍शा मिम्‍नुङ। मेकोपुकीम मतुइक्‍नीम। मेकोपुकीमी मरिम्‍शो ला पाइनीम। मिनु मेको आन पाप गेना हना यो आं ङोंइती बाक्‍नीम” देंत।

होसे 8:13

मेकोपुकीमी आं कली चढ़ेनीम। मिनु श्‍ये ब्‍वाइनीम। तन्‍न परमप्रभु यावे मेकोपुकी नु मग्‍येरसीशो बाक्‍ब। मुल परमप्रभु यावेमी मेको आन मरिम्‍शो पशो मिम्‍शा, मेको आन कली सजाइ गेब। मिनु मेकोपुकी इजीप्‍त रागीमी लेश्‍शा लाइनीम।

होसे 9:15

मेको आन मरिम्‍शो पतीके नेल्‍ल गिल्‍गालम पाम्‍तेक्‍म। मेक रे गो मेको आन कली तशा ग्रांग्रा दि‍चा गोव़ता। मेको आन काइ मरिम्‍शो पतीके, गो आं खिं रे खेरनुङमी। मेको आन ठेयब मुर नेल्‍ल मटीब बाक्‍नीम।

होसे 9:9

गिबा ङा नाक्‍त खोदेंशो पा मेकोपुकी काइ मरिम्‍शो गेय पाम्‍तेक्‍‍म। परमप्रभु यावेमी मेको आन मरिम्‍शो पशो मिम्‍शा सजाइ गेब। होसे १०:९; न्‍यायाधीस १९:२२-३०; न्‍यायाधीस २०:१३

जकरिया 1:6

तन्‍न गो आं गेय पाइब, आं लोव़ पाइब आन कली पशो लोव़ नु आं फुल्‍लुम मुशा ब्रेक्‍शो लोव़ इन किकी पिपी आन पाला रे मुल सम्‍म मबाक्‍म ङा?’ मिनु मेकोपुकी परमप्रभु यावे गे लेत्‍चा माल्‍‍शा, मेकोपुकीमी ‘मुर नेल्‍ल आन परमप्रभु यावेमी आंइ मरिम्‍शो लां नु आंइ मरिम्‍शो पशो आ पर्बम आ देंशो खोदेंशो पा पाप्‍तु’ देंतेक्‍म” दे मुर नेल्‍ल आन परमप्रभु यावेमी देंत।

मत्ती 15:14

मेकोपुकीमी मारेइ पामेक्‍ल। मिक्‍च मताइब लां कोंइब नम। मिक्‍च मताइबमी मिक्‍च मताइब कली कीशा लां कोंइताक्‍व हना, निम्‍फा खाल्‍टाम बिक्‍नीस” देंत। मत्ती २३:२४; लूका ६:३९; रोमी २:१९