उत्पत्ती 39:4 - Sunuwar Bible

⁴ मिनु योसेफ पोतीफर आ ङोंइती शिशी तवा बाक्‍त। मिनु आ खिंमी गेय पवानु, आ ठेयब गेय पाइब सेला बाक्‍त। मिनु अर्को गेय पाइबपुकी कली अरेब यो सेला बाक्‍त। आ मारेइ मारेइ योसेफ कली कोव़पदा बाक्‍त।

उत्पत्ती 39:4 ပူးပေါင်းရင်းမြစ်များ

उत्पत्ती 15:2

तन्‍न अब्राममी “आं कली मार गेनीनी ङा? आं के आल मबाक्‍नीम। आ अङस ताइब दमस्‍कस ङा एलीएजर दुम्‍ब।

उत्पत्ती 18:3

मिनु अब्राहाममी “आं परमप्रभु, आं कली दाक्‍ताक्‍नी हना, इन गेय पाइब रे मो मलने।

उत्पत्ती 19:19

नेनीन, गो इन शिशी ताता। गो आंइ कली दाक्‍शा, बेक्‍चा रे प्रोंइतीनी। गो पहाड प्रोक्‍ने मचबु। पहाडमी अर्को श्‍येतमी आं कली साइक्‍बा, कों।

उत्पत्ती 24:2

मिनु अब्राहाममी आ रू खिं नेल्‍ल कोव़ब नु वाइल आन कली अरेब ठेयब वाइल कली “इ गुइ आं फिला तारी वोतो।

उत्पत्ती 32:5

गो नु शुश ब्‍यफ, गधा, क्‍यारश भेडा, वाइलीम वाइल बाक्‍नीम। गो आं प्रभु, इन ङोंइती शिशी तङल, दे मुर आन कली सोइक्‍ताक्‍ङ’ देंत, देंचा माल्‍नीनी” दे अरेशा सोइक्‍तीमी बाक्‍त।

उत्पत्ती 33:10

मिनु याकूबमी “मदुम्‍ब। गो इन ङोंइती शिशी ताता हना, आं कोसेली ताक्‍कीन। मारदे हना गो इन कुल तशा, परमप्रभु आ कुल तशो खोदेंशो पा ग्‍येरसाक्‍यी। गे आं कली दाक्‍शा ब्राइतीनी। उत्‍पत्ती ३२:३१

उत्पत्ती 33:8

मिनु एसावमी “इ ङोंइती गाक्‍शो मार मार मारदे सोइक्‍ती?” दे हिल्‍लो पवा बाक्‍त। मिनु “आं प्रभु, इन ङोंइती शिशी तङल, दे सोइक्‍ताक्‍ङ” दे लोव़ लेत्‍ता बाक्‍त। उत्‍पत्ती ३२:१४-२१

उत्पत्ती 39:8

योसेफमी “गो गे नु मबाक्‍नुङ। आं होव़पमी आ मार मार नेल्‍ल आं कली ‘कोव़ङो’ दे जिम्‍मा गेती।

१ राजा 16:9

मिनु मेको आ लडाइ पाइब बग्‍गी चलेब, आन भाग निक्‍शीमी भाग का ङा ठेयब मुर जिम्रीमी मेको कली मरिम्‍शो पचा गोवा बाक्‍त। मेना पिप एलाह तिरचा सहरम आ खिं ङा मारेइ मारेइ कोव़ब अरचा आ खिं तिरचा सहरम बाक्‍शा, तूशा दुक्‍शो बाक्‍माक्‍त।

एस्‍तर 2:9

मिनु एस्‍तर कली तशा, मेको हेगे थाम्‍पान ग्येरसाक्‍व। मिनु मेकोमी एस्‍तर कली दारपाइक्‍चा कली ग्‍योम्‍तीक, किप्‍तीक, ख्रेक्‍तीक नु रिम्‍शो जचा थोव़क नेल्‍ल गेप्‍तु। मिनु पिप आ दरवार ङा ७ जना नेल्‍ल क्‍येङा रिम्‍शो गेय पाइब मीश आल यो एस्‍तर कली गेप्‍तु। मिनु मीश मुर आन कली वोइक्‍तीक खिंमी एस्‍तर नु आ कली वारच पाइब आन कली नेल्‍ल आन क्‍येङा रिम्‍शो नु गारशो बाक्‍तीक गेप्‍तु।

हितोपदेस 14:35

पिपमी जोक्‍‍शा गेय पाइब कली दाक्‍ब। तन्‍न मुने पचा ङा गेय पाइबमी पिप आ गाइश्‍शो ङा सजाइ ताइब। उत्‍पत्ती ४१:३७-४०

हितोपदेस 16:7

परमप्रभु यावेमी मुर आन पशो तशा ग्‍येरसाक्‍व हना, मेको कली आ जोरी सत्रु नु यो गारपाइश्‍शा वोइक्‍ब। उत्‍पत्ती ३१:२४; उत्‍पत्ती ३३:४

हितोपदेस 17:2

जोक्‍ब तुइक्‍ब वाइलमी आ होव़प आ मरिम्‍शो पाइब तौ कली अरेब। मिनु मेको वाइलमी खिं ङा तौ खोदेंशो पा रू ताइब।

हितोपदेस 22:29

जोक्‍ब गेय पाइब आन कली तनी? मेकोपुकी पिप आन कली गेय पाइब दुम्‍नीम। मेकोपुकीमी आइक्‍च मुर आन कली गेय मपाइनीम।

हितोपदेस 27:18

सुमी फोव़शी रवा खाल पाइबा, मेकोमी फल जचा ताइब। सुम आ होव़प कली रिम्‍शो पा कोव़बा, मेको मान पाइक्‍चा पुंइसीब।

हितोपदेस 3:4

मो पाप्‍तीवी हना, गे परमप्रभु आ आसीक ताइनेवे। मुर नेल्‍लेमी इ कली रिम्‍शो देंनीम।

प्रेरित 20:28

गे आंम कली कोव़ङीने। परमप्रभु यावे आ सोक्‍तीमी इन कली थमा सुइक्‍ब आन कली कोव़ब सेल्‍तु। गे परमप्रभु यावे आ मुर आन कली मुर आन कली कोव़ब रिम्‍शो गोठला दुमीन। मारदे हना मेकोपुकी आ तौ आ हुशेम ग्‍याप्‍शो बाक्‍नीमी। १तिमोथी ४:१६; १पत्रुस ५:२-४

रूथ 2:6

मिनु मेको गेय पाइब आन कली कोव़ब मुरुमी “एको मोआब रागी रे नाओमी नु जाक्‍शो मोआबी मीश आल बाक्‍ब।

१ सामुएल 16:22

मोपतीके सावलम येस्‍से कली “दाऊद आं गेयमीन बाक्‍ल। मारदे हना गो मेको तशा ग्‍येरसाक्‍यी” दे लोव़ कुरब सोइक्‍ता बाक्‍त।

१ सामुएल 2:26

मिनु सामुएल कोल्‍ना कोल्‍न लमेनु, परमप्रभु यावे नु मुर आन ङोंइती दाक्‍शो दुम्‍माक्‍त। लूका २:५२