इजीकीएल 8:17 - Sunuwar Bible

¹⁷ मिनु मेकोम आं कली “ए मुर, गे मेको तवी? मार, यहूदा आ खिं ङा मुर आन ग्रांग्रा दिशो गेय एकेर पचा माल्‍नीमी? मार, मेकोपुकीम रागी कली हुश ख्राक्‍श पोक्‍तीकेम प्रिंशा, आं कली मेको क्‍येङा गाइक्‍पाइक्‍चा माल्‍नीमी? कोव़ङो, मेको आन नेंम राशी वोइक्‍नीम। आन नेंम राशी वोइक्‍तीके थम मरिम्‍शो पतीके बाक्‍ब।

इजीकीएल 8:17 ပူးပေါင်းရင်းမြစ်များ

उत्पत्ती 6:11

परमप्रभुमी मुर आन कली कोव़ङानु, नेल्‍ल मरिम्‍शो बाक्‍मा बाक्‍त। रागी नेल्‍ल हुश ख्राक्‍श पोक्‍तीकेमी ब्रीमाक्‍त। अर्को मरिम्‍शो पाइब यो बाक्‍मा बाक्‍त।

उत्पत्ती 6:13

मिनु परमप्रभुमी नोआह कली “गो मुर नेल्‍ल आन कली क्‍याम्‍नुङमी। मारदे हना मेको आन पर्बम रागी हुश ख्राक्‍श पोक्‍तीकेमी ब्री‍त। मुर नु रागी नेल्‍ल आन कली क्‍याम्‍नुङ। आमोस ८:२

२ राजा 21:16

मेको क्‍येङा लाक्‍शा यो मनस्‍सेम दोस मताइब शुश मुर आन हुश शाइक्‍पाइश्‍शा, यरूसलेम आ सुर का रे अर्को सुर सम्‍म प्रिंदा बाक्‍त। मिनु मेकोम यहूदा कली पाप पपदा बाक्‍त। मिनु मेकोपुकीम परमप्रभु यावे आ ङोंइती मार मरिम्‍शो बाक्‍मे, मेको पामे बाक्‍त। २राजा २४:४; भजन संग्रह १०६:३८

२ राजा 24:4

मारदे हना मनस्‍सेम दोस मताइब मुर आन कली साइश्‍शा, यरूसलेम कली हुशेम प्रिंशो बाक्‍माक्‍त। मिनु परमप्रभु यावेमी मेको कली माफ गेने मबिश्‍शो बाक्‍माक्‍त।

येरमीया 19:4

मेको मुरपुकीमी आं कली प्रोंइतीमी। मिनु एकेर अर्को रागी ङा देवी देवता आन कली चढ़ेशा, एको रागी ग्रांग्रा दिशो सेल्‍तेक्‍म। मेको देवी देवता आन किकी पिपी नु यहूदा ङा पिपम यो मतुइश्‍शो बाक्‍तेक्‍म। मिनु मेकोपुकीम रागी कली दोस मताइब आन हुशेम प्रिंताक्‍म।

येरमीया 20:8

गो लोव़ पची ना ठेयब सेंदा पा लोव़ पचा माल्‍नुङ। गो हुश ख्राक्‍श बोक्‍चा नु खतम दुम्‍चा आ पर्बम ला ग्रीनुङ। परमप्रभु यावे आ लोव़ नाक्‍त रेन आं कली शुक्‍शी पाइक्‍तीक नु मरिम्‍शो पाइक्‍तीके दुम्‍त।

येरमीया 44:3

मारदे मोदेंशो दुम्‍त देंशा हना, मेकेर ङा मुरुमी आं अरेशो मटिथु, गाइक्‍पाइक्‍‍तीमी। मेकोपुकीमी देवी देवता आन कली चढ़ेशा मेको आन नोले खोइक्‍तेक्‍म। ङोंइती मेकोपुकी, गेपुकी नु इन किकी पिपीमी यो मेको आन कली मतुइश्‍‍शो बाक्‍तेक्‍म।

येरमीया 6:7

इनारम दोपा आ ब्‍वाक्‍कु बारपाइक्‍बा, मोपा मेकोमी आ परमप्रभु यावे आ अरेशो मटितीके बारपाइक्‍ब। मेको आ आगाम काइ मरिम्‍शो पतीक नु मारेइ मारेइ खतम पोक्‍तीक आ पर्बम लोव़ नेंसीब। मेको आ रोइ नु आ सेल्‍शो गार गेना हना यो आं ङोंइती बाक्‍नीम।

बिलाप 1:5

मेको आ जोरी सत्रु आ होव़प दुम्‍तेक्‍म। मेको आन माल्‍शो शुश ताइनीम। मारदे हना परमप्रभु यावेमी मेको आ शुश हेंथे पशो तशा, यरूसलेम कली श्‍येत गेप्‍तु। मेको आ आल ग्‍याइश्‍शा लाइक्‍चा पुंइसीशा, आन जोरी सत्रु आन ङोंइती लाम्‍तेक्‍म।

इजीकीएल 11:6

गेपुकीम एको सहरम शुश मुर आन कली साइश्‍शा, आ लां नेल्‍ल बेक्‍शो मुरुम प्रिंपाइक्‍तीनी’ देंत।

इजीकीएल 16:26

गे इ माल्‍शो, इ नेक्‍था बाक्‍ब इजीप्‍त ङा मुर नु तेल्‍लेम पाप्‍तीवी। मोपा इ तेल्‍लेम पतीक बारपाइश्‍शा, आं कली थाम्‍पा गाइक्‍पाइक्‍ती।

इजीकीएल 18:12

प्रुङग नु मारेइ मथीब आन कली दिप्‍ब, मुर आन मार मार रोइक्‍ब। जाकटी वोइश्‍शो थोव़क मलेप्‍ब, मूर्ति आन कली पूजा पाइब नु ग्रांग्रा दिशो गेय पाइब।

इजीकीएल 23:25

गो आं गाइश्‍शोमी इ कली सजाइ गेपाइक्‍नुङ। मिनु मेकोपुकी गे नु गाइश्‍शा चुरशा इ कली खतम पोक्‍नीम। मिनु मेकोपुकीम इ नें नु इ नोफा ख्रोइक्‍नीम। मिनु इ लीशो मुर तरवारम साइक्‍चा पुंइसीनीम। मेकोपुकीम इ तमी तौ आन कली ग्‍याइश्‍शा लाइक्‍नीम। इ लीशो मुर मीम दुप्‍शा बेक्‍नीम।

इजीकीएल 28:16

मिनु इ एर ओंथ नेल्‍ल ङा ग्‍याप्‍तीक लेयतीक आ पर्बम हुश ख्राक्‍श पोक्‍शा, पाप पाप्‍तीवी। मोपतीके गो इ कली ताइक्‍तीक थोव़क खोदेंशो पा आं डांडा रे ताइक्‍ताक्‍ङ। मिनु इ कली खाल पाइब करूबम इ कली मी ब्रशो फुल्‍लु आन दाते रे खेरते।

इजीकीएल 45:9

मिनु परमप्रभु, परमप्रभु यावेमी “ए इस्राएल ङा सासन पाइबपुकी। गेपुकीम हुश ख्राक्‍श पोक्‍तीनी। दिप्‍चा प्रोनीन। गेपुकीम थम रिम्‍शो नु ठीक गेय पने। आं मुर आन कली आन खिं रू रे मखेरीन। १राजा १२:४,११; १राजा २१; येरमीया २१:११-१२; मीका ३:१-३

इजीकीएल 7:11

हुश ख्राक्‍श पोक्‍तीके परमप्रभु यावे आ अरेशो मटीब आन कोक्‍के दुम्‍त। मेको आन दाते ङा मारेइ मलीब। मेको आन बाक्‍शो मारेइ मारेइ, आन शोंप नु आन ठेयब दुम्‍तीके मारेइ मलीब।

इजीकीएल 7:23

साङलो का सेलीन। मारदे हना रागी हुश ख्राक्‍शेम ब्रीशो बाक्‍ब। मिनु सहर हुश ख्राक्‍श पोक्‍बपुकीम ब्रीशो बाक्‍ब।

इजीकीएल 8:6

मिनु मेकोमी आं कली “ए मुर, मेको आन पशो तवी? मार पन पन बाक्‍मा, गे मेको तवी? इस्राएली आन खिं ङा मुरपुकीम आं कली आं बाक्‍तीक रे खेरचा कली मेको ग्रांग्रा दिशो गेय पना पन बाक्‍नीम। तन्‍न गे मेको क्‍येङा यो शुश ग्रांग्रा दिशो गेय ताइनेवे” देंत।

इजीकीएल 9:9

मिनु मेकोमी आं कली “इस्राएल नु यहूदा ङा मुर आन खिं ङा मुर आन दोस थम ठेयब बाक्‍ब। रागी नेल्‍ल हुश ख्राक्‍शेम ब्रीशो बाक्‍ब। मिनु सहर दूली पतीकेम ब्रीशो बाक्‍ब। मारदे हना मेकोपुकीम ‘परमप्रभु यावेमी एको रागी प्रोंइशो बाक्‍ब। मिनु परमप्रभु यावेमी मारेइ मताइब’ देंनीम। इजीकीएल ८:१२

आमोस 3:10

मेकोपुकी ठीक गेय पस मजोक्‍नीम। हुश ख्राक्‍श पोक्‍शा नु मार मार रोइश्‍शा खुइ पशो आन बोल्‍यो दरवारम खेक्‍शा वोइक्‍नीम” दे परमप्रभु यावेमी देंत।

आमोस 6:3

गे ‘श्‍येत जतीक नाक्‍त मजाक्‍ब’ दे मिम्‍नीनी। मिनु गे हुश ख्राक्‍श पोक्‍ब सासन पाइब चाक्‍नीनी। भजन संग्रह १०:५

मीका 2:2

मेकोपुकीम रिम्‍शो रू तशा वाल्‍शा, रोइक्‍नीम। रिम्‍शो खिं रोइक्‍नीम। मोपा मेकोपुकीमी मुर आन खिं नु आन थेरशो रू आंम के सेल्‍नीम। ब्‍यवस्‍था ५:२१; हितोपदेस २४:१५; यसैया ५:८

मीका 6:12

मेको आ शोंप पाइश्‍शो मुरपुकी हुश ख्राक्‍श पोक्‍तीकेम ब्रीशो बाक्‍नीम। मेको सहर ङा मुरपुकी जोल पाइनीम। मेको आन शोव़ जोल पतीकेमी ब्रीशो बाक्‍ब।

सेफन्‍याह 1:9

मेको नाक्‍त सु सु लाप्‍चो रे ओव़नीमी, मेको आन कली सजाइ गेनुङ। मारदे हना मेकोपुकीमी आन होव़प आ खिं तुम्‍‍मुचा, जिचा खेचा नु जोल पतीकेमी प्रिंनीम” देंत।