इजीकीएल 7:16 - Sunuwar Bible

¹⁶ मिनु ब्रोंइशा प्रोक्‍शो नेल्‍ल बेंसी ङा ढुकुर खोदेंशो पा पहाडम बाक्‍नीम। मेको आन मरिम्‍शो पशो आ पर्बम रोंका पा बाक्‍नीम।

इजीकीएल 7:16 ပူးပေါင်းရင်းမြစ်များ

एज्रा 9:15

परमप्रभु यावे, इस्राएली आन परमप्रभु गे ठीक पाइब बाक्‍नीनी। मुल गो इच्‍का खोइ लीशो बाक्‍नीक। गो आंइ मरिम्‍शो पतीकेमी इन ङोंइती बाक्‍नीकी। मो हना यो गो इन ङोंइती पिया पोक्‍ने मचाप्‍नीकी” देंती।

भजन संग्रह 55:2

आं पुंइशो नेंशा, लोव़ लेत्‍तीनी। गो श्‍येत जशा, आं थुं ग्‍येत्‍थ लुक्‍च दुम्‍शा, मारदे रोंका पा गाक्‍ती देंशा हना,

यसैया 1:9

मुर नेल्‍ल आन परमप्रभु यावेमी “का निक्‍शी मुर महें‍शो हना, गेपुकी सोदोम नु गोमोररा खोदेंशो दुम्‍नी वा” देंत। उत्‍पत्ती १९:२४-२५; रोमी ९:२९

यसैया 37:31

यहूदा आ खिं ङा लीशोपुकी लेंशा, सोशा बोशा, शाक्‍श थोक्‍शा, फल सित्‍नीम। शुश दुम्‍नीम।

यसैया 38:14

गो बेल्‍लुम नु बोकुला खोदेंशो पा ग्रीती। ढुकुर खोदेंशो पा रोंका पाता। गो शुश ग्‍येत्‍थ कोव़तीके आ मिक्‍च पारताक्‍यी। आं थुं लुक्‍च लत। गो “परमप्रभु, गो श्‍येत जाइनुङ। आं कली वारच पाइय्‍यीनी।

यसैया 59:11

गो नेल्‍ल वां खोदेंशो पा ग्रीनीकी। ढुकुर खोदेंशो पा रोंका पाइनीकी। गो ठीक निसाफ माल्‍ना माल्‍न बाक्‍नीकी, तन्‍न मथित्‍नीकी। पाप रे ब्रोंइतीक माल्‍नीकी, तन्‍न मेको आंइ क्‍येङा ङोन बाक्‍ब।

यसैया 59:12

इन ङोंइती आंइ हेंथे पशो शुश बाक्‍ब। आंइ पशो पापमी इन कली तुइक्‍पाइक्‍ब। गो मरिम्‍शो पाइब बाक्‍नीकी, दे तुइक्‍नीकी। आंइ हेंथे पशो थमा पा गोपुकी नु बाक्‍ब। गोपुकी आंइ मरिम्‍शो पशो तुइक्‍नीकी। येरमीया १४:७

येरमीया 3:21

गोरशो डांडाम वाइ ब्रेश्‍शो सेंदा का नेंसीब। मेको इस्राएल आ आल आन शुश ङाक्‍शो सेंदा बाक्‍ब। मारदे हना मेकोपुकी दूली लांम गाक्‍शो बाक्‍तेक्‍म। मेकोपुकीमी परमप्रभु यावे, आन परमप्रभु कली प्रेंशो बाक्‍तेक्‍म। येरमीया ३:२

येरमीया 31:9

मेकोपुकी ङाक्‍ना ङाक्‍न जाक्‍नीम। गो मेको आन कली शिशी पा लेश्‍शा चाक्‍नुङमी। गो मेको आन कली खोला आ नेक्‍था गाक्‍पाइक्‍नुङमी। दाइल मपांइसीचा ङा पित्‍थ लांम खुल्‍नुङमी। मारदे हना गो इस्राएल आ आफ दुम्‍शो बाक्‍नुङ। मिनु एफ्राइम आं ङोंइती जरमेशो तौ बाक्‍ब।

येरमीया 44:14

मोपा इजीप्‍तम बाक्‍शो यहूदा ङा लीशो मुर सुइ प्रोक्‍चा मताइनीम। सुइ मब्रोंइनीम। मिनु सुइ यहूदा रागी लेत्‍चा मताइनीम। मो हना यो मेकेर बाक्‍चा कली लचा दाक्‍नीम। ङोंइती प्रोक्‍शा लशो का निक्‍शी ला लेत्‍चा ताइनीमी” देंत।

येरमीया 44:28

तरवार रे ब्रोंइशोपुकी इजीप्‍त रे यहूदा रागीमी का निक्‍शी ला लेत्‍चा ताइनीम। मिनु इजीप्‍तम बाक्‍ब यहूदा ङा मुर नेल्‍लेमी ‘आं देंशो थमा बाक्‍म देय मेको आन लोव़ थमा बाक्‍ब’ दे नोले तुइक्‍नीम” देंत।

येरमीया 9:19

सियोन रे रोंका पशो नेंसाक्‍व। गोपुकी खतम दुम्‍तय। गोपुकी मुनेम सुम्‍सीशो बाक्‍नय। गोपुकीम आंइ रागी प्रोंइचा माल्‍नीकी। मारदे हना मेकोपुकीम आंइ खिं प्रेत्‍तेक्‍म” देंतेक्‍म।

इजीकीएल 14:22

मो हना यो मुर आन दाते ङा का निक्‍शी ब्रोंइशा बाक्‍नीम। मेको आं तमी तौ ग्रूशा इ बाक्‍तीक जाक्‍नीम। मिनु गे मेको आन मिम्‍शो नु आन पशो ताइनेवे। मिनु गो यरूसलेम कली श्‍येत गेशो नु क्‍याम्‍शो आ पर्बम इ थुं नाइक्‍नेवे।

इजीकीएल 34:6

आं भेडा लां प्रेंशा, पहाड मेर नु लाइश्‍शो डांडा मेर हिरसाक्‍म। आं भेडा रागी नेल्‍लेम ब्राम्‍तेक्‍म। मिनु सुइम मेको आन कली ममलेम। मेको आन पर्बम हिल्‍लो यो मपाम” देंशो बाक्‍ब। मत्ती ९:३६

इजीकीएल 36:31

मेना गे इन मरिम्‍शो पशो गेय नु मरिम्‍शो पशो आ पर्बम मिम्‍नीनी। मिनु गे इन मरिम्‍शो पशो नु मूर्ति पूजा पतीके आन आन पर्बम आंमान ग्रांग्रा दीसीनीनी। इजीकीएल २०:४३

नहुम 2:7

मेको सहर ङा पिपीम कली ग्‍याइश्‍शा, आ वा प्रुइश्‍शा लाइक्‍नीम। मेको आ वाइलीम नेल्‍ल ग्‍याइश्‍शा ङोन लाइक्‍चा पुंइसीनीम। मिनु मेकोपुकी कुचु तुप्‍शा ढुकुर खोदेंशो पा रोंका पा ङाक्‍नीम।

सेफन्‍याह 1:14

परमप्रभु यावे आ ठेयब नाक्‍त जाक्‍चा चिक्‍शो बाक्‍ब। मेको रीब पा जाक्‍ब। नोफा दाइश्‍शा नेनीन। परमप्रभु यावे आ ठेयब नाक्‍त, श्‍येत ङा नाक्‍त बाक्‍ब। लडाइ पाइबपुकी थम ठेयब सेंदा पा ग्रीनीम। योएल १:१५