इजीकीएल 5:14 - Sunuwar Bible

¹⁴ गो इ कली श्‍येत्‍थ सेल्‍नुङ। गे रागी रागी ङा मुर आन दातेम नु इ नेक्‍था रे पा लाइब नेल्‍ल आन ङोंइती इ कली शुक्‍शी पाइक्‍चा पुंइसीब सेल्‍नन। ब्‍यवस्‍था २८:३७; येरमीया २४:९

इजीकीएल 5:14 ပူးပေါင်းရင်းမြစ်များ

नेहेम्‍याह 2:17

मिनु मेको नोले गो सहर ङा मुर नेल्‍ल आन कली “गे गो आंइ खतम दुम्‍‍शो नेल्‍ल तुइक्‍नीनी। यरूसलेम यो खतम दुम्‍शो बाक्‍ब। मिनु गारो ङा ठेयब लाप्‍चोपुकी मीम दुप्‍शो बाक्‍नीम। लो, गो नेल्‍ल गारशा, यरूसलेम ङा गारो सेल्‍शा, आंइ मुने साम्‍य” दे माइक्‍ता‍मी।

येरमीया 19:8

मिनु गो मेको सहर कली हिंचा ङा सेल्‍नुङ। मिनु मेको सहर गेना हना यो शुक्‍शी पतीक दुम्‍ब। मेकेर रे सु सु गाक्‍मा, मेको ग्रीचोक पा हिंनीम। मिनु आ खतम दुम्‍तीके आ पर्बम आबी, आबी देंनीम। येरमीया १८:१६

येरमीया 23:40

मिनु गो इन कली गेना हना यो शिशी मपथु, गेना हना यो मुने दोक्‍पाइक्‍नन्‍नी। मेको गेना यो मप्रेंसीब” दे परमप्रभु यावेमी देंत। येरमीया २०:११

येरमीया 42:18

मुर नेल्‍ल आन परमप्रभु यावे, इस्राएली आन परमप्रभुम “दोपा आं गाइश्‍शो नु चुरशो यरूसलेमम बाक्‍ब मुर आन तार मोंइसे, मोपान गेपुकी इजीप्‍त लाइतीनी हना, आं चुरतीके इन तार मोंइसीब। इन श्‍येत जशो तशा मुर हिंनीम। गेपुकी सराप राइब नु शुक्‍शी पाइक्‍चा पुंइसीब दुम्‍नीनी। गेपुकीम लेंशा एको रागी गेनायो कोव़चा मताइनीनी” देंशो बाक्‍ब। येरमीया २५:९; येरमीया ४४:१२

बिलाप 1:4

सियोन लतीक लां रोंका पाइनीम। मारदे हना सुइमी चाड मानेचा कली मेकेर रे मगाक्‍नीम। सहर ङा ठेयब लाप्‍चो नेल्‍ल श्‍येत्‍थ बाक्‍नीम। आ चढ़ेबपुकी हुकयी पाइनीम। आ मीश आल सुर्ता पाइनीम। मिनु सहरम श्‍येत जशो बाक्‍ब।

बिलाप 1:8

यरूसलेममी ठेयब पाप पाप्‍तु। मोपतीके मेको शुक्‍शी पाइक्‍चा पुंइसाक्‍व। ङोंइती मेको कली मान पाइब नेल्‍ले मुल महिक्‍नीम। मारदे हना मेकोपुकीमी मेको कली शिश्रा ताम्‍तेक्‍म। मेको आंमान हुकयी पा आ कुल ख्रुइक्‍ब।

बिलाप 5:18

सियोन डांडाम श्‍येत दुम्‍त। मेको सिवार आन बाक्‍तीके दुम्‍त।

इजीकीएल 12:20

मुर बाक्‍शो सहर नेल्‍ल श्‍येत्‍थ दुम्‍नीम। मिनु रागी नुप्‍ब। मिनु गेपुकीम गो परमप्रभु यावे नङ, दे तुइक्‍नीनी’ देंशो बाक्‍ब” देंत।

इजीकीएल 16:57

मेना मेकोपुकीम इ परमप्रभु यावे आ अरेशो मटिशो मतुइश्‍शो बाक्‍तेक्‍म। मुल अराम ङा तमीपुकीमी इ कली शुक्‍शी पाइनीम। मेको आ नेक्‍था ङा मुर, पलिस्‍ती आ तमीपुकीमी नु एर ओंथ ङा मुर नेल्‍लेमी शुक्‍शी पा आइक्‍च मिम्‍नीम। अराम आ तमी एदोम यो बाक्‍ब।

इजीकीएल 22:4

गे हुश शाइक्‍पाइश्‍शा, दोस तशो बाक्‍नेवे। गे इ सेल्‍शो देवी देवता रे पा ग्रांग्रा दिशो दुम्‍‍नेवे। इ निसाफ नाक्‍त जाक्‍त। मिनु इ बर्स नुप्‍शो बाक्‍नीम। मोपतीके गो इ कली रागी रागी ङा मुर आन दातेम शिशी मताइब नु शुक्‍शी पाइक्‍तीक मुर सेल्‍त‍न। २राजा २१:१६; इजीकीएल ५:१५

इजीकीएल 23:32

परमप्रभु, परमप्रभु यावेमी “गे इ लोक्‍ब आ कचौरा तूचा माल्‍नेवे। मेको ठेयब श्‍येत जतीक बाक्‍ब। गे फाल्‍ने मचाप्‍चा ङा शुक्‍शी पाइक्‍चा पुंइसीब दुम्‍नेवे। मारदे हना इ श्‍येत ठेयब दुम्‍‍ब।

इजीकीएल 33:28

गो मेको रागी कली मुर मबाक्‍शो नु श्‍येत्‍थ सेल्‍नुङ। मिनु मेको आ ठेयब लेत्‍तीक जाम्‍ब। मिनु इस्राएल ङा डांडाम सुइ एर ओंथ पने मचाप्‍चा ङा पा मुर मबाक्‍तीके दुम्‍ब।

इजीकीएल 36:34

लां गाक्‍ब मुरपुकीमी इन मशोक्‍शो रू तचा क्‍येङा ङोंइती मेकेर मार मार शोक्‍चा कली लेंशा दोइनीम।

इजीकीएल 6:6

गेपुकी ते बाक्‍तीनी हना यो, इन सहर श्‍येत्‍थ दुम्‍नीम। इन डांडा ङा थान नेल्‍ल खतम दुम्‍नीम। मोपा इन चढ़ेतीक श्‍येत्‍थ दुम्‍शा नु इन मूर्ति ब्रोल्‍शा खतम दुम्‍नीम। इन धूप चोतीक जिक्‍नीम नु इन गेय जाम्‍शा लाइब।

दानीएल 9:16

परमप्रभु, इन ठीक पतीकेमी इन सहर यरूसलेम नु इन योव़शो डांडा आ पर्बम मगाइक्‍तीन, मचुरीन। आंइ पशो पाप नु आंइ किकी पिप आन मरिम्‍शो पशो आ पर्बम यरूसलेम नु इन योव़शो मुर आन नेक्‍था बाक्‍ब मुर रे पा शुक्‍शी पाइक्‍चा पुंइसीब दुम्‍तेक्‍म।

मीका 3:12

मोपा इन पतीके सियोन वाक्‍शो रू दुम्‍ब। यरूसलेम ब्रेश्‍‍शो खिं ङा फुल्‍लु देल्‍तीके दुम्‍ब। परमप्रभु यावे आ खिं ङा डांडा ब्‍वाकी दुम्‍शो बाक्‍ब” देंत। भजन संग्रह ७९:१; येरमीया ९:१०; येरमीया २६:१८

ब्‍यवस्‍था 28:37

मिनु परमप्रभु यावेमी इन कली खेरशा जात जात ङा मुर आन दातेमी इन पर्बम शुक्‍शी पा, देंतीके सेल्‍शा, शुक्‍शी पचा पुंइसीनीनी। १राजा ९:७; येरमीया २४:९