इजीकीएल 45:9 - Sunuwar Bible

⁹ मिनु परमप्रभु, परमप्रभु यावेमी “ए इस्राएल ङा सासन पाइबपुकी। गेपुकीम हुश ख्राक्‍श पोक्‍तीनी। दिप्‍चा प्रोनीन। गेपुकीम थम रिम्‍शो नु ठीक गेय पने। आं मुर आन कली आन खिं रू रे मखेरीन। १राजा १२:४,११; १राजा २१; येरमीया २१:११-१२; मीका ३:१-३

इजीकीएल 45:9 ပူးပေါင်းရင်းမြစ်များ

अय्‍युब 20:19

मारदे हना मेकोपुकीमी प्रुङग आन कली दिप्‍शा श्‍येत गेम्‍तेक्‍म। मेकोपुकीम आन मसेल्‍शो खिं आंम के सेल्‍शो बाक्‍नीम।

अय्‍युब 22:9

गे आन वोंइश बेक्‍शो मीश मुर आन कली श्‍येत्‍थ गुइ सोइक्‍ताक्‍नी। मिनु रोम रोइक्‍च आन तचा माल्‍शो मगेनी। अय्‍युब २९:१२-१३

यसैया 1:17

रिम्‍शो पचा शेंसीन। ठीक निसाफ पतीक मालीन। दिप्‍चा पुंइसीशो आन कली वारच पने। रोम रोइक्‍च आन कली वारच पने। वोंइश बेक्‍शो मीश मुर आन कली वारच पतीन” देंत। येरमीया ७:५-६

येरमीया 22:3

परमप्रभु यावेमी मार देंत देंशा हना “गे ठीक निसाफ पने। ठीक गेय पने। रोइक्‍चा पुंइसीशो आन कली मरिम्‍शो पाइब आन गुइ रे प्रोनीन। अर्को रागी ङा मुर, रोम रोइक्‍च नु आन वोंइश बेक्‍शो मीश मुर आन कली मरिम्‍शो मपने। मिनु एको रागीम मारेइ दोस मताइब आन हुश मशाइक्‍पतीन। येरमीया २१:१२

येरमीया 6:7

इनारम दोपा आ ब्‍वाक्‍कु बारपाइक्‍बा, मोपा मेकोमी आ परमप्रभु यावे आ अरेशो मटितीके बारपाइक्‍ब। मेको आ आगाम काइ मरिम्‍शो पतीक नु मारेइ मारेइ खतम पोक्‍तीक आ पर्बम लोव़ नेंसीब। मेको आ रोइ नु आ सेल्‍शो गार गेना हना यो आं ङोंइती बाक्‍नीम।

इजीकीएल 44:6

मेको मटीब मुर, इस्राएल आ खिं ङा मुर आन कली परमप्रभु, परमप्रभु यावेमी इन कली ‘ए इस्राएल आ खिं ङा मुरपुकी, गे इन ग्रांग्रा दिशो गेय नेल्‍ल प्रोनीन।

इजीकीएल 7:11

हुश ख्राक्‍श पोक्‍तीके परमप्रभु यावे आ अरेशो मटीब आन कोक्‍के दुम्‍त। मेको आन दाते ङा मारेइ मलीब। मेको आन बाक्‍शो मारेइ मारेइ, आन शोंप नु आन ठेयब दुम्‍तीके मारेइ मलीब।

इजीकीएल 7:23

साङलो का सेलीन। मारदे हना रागी हुश ख्राक्‍शेम ब्रीशो बाक्‍ब। मिनु सहर हुश ख्राक्‍श पोक्‍बपुकीम ब्रीशो बाक्‍ब।

इजीकीएल 8:17

मिनु मेकोम आं कली “ए मुर, गे मेको तवी? मार, यहूदा आ खिं ङा मुर आन ग्रांग्रा दिशो गेय एकेर पचा माल्‍नीमी? मार, मेकोपुकीम रागी कली हुश ख्राक्‍श पोक्‍तीकेम प्रिंशा, आं कली मेको क्‍येङा गाइक्‍पाइक्‍चा माल्‍नीमी? कोव़ङो, मेको आन नेंम राशी वोइक्‍नीम। आन नेंम राशी वोइक्‍तीके थम मरिम्‍शो पतीके बाक्‍ब।

आमोस 5:15

मरिम्‍शो पतीक कली काइ मदाक्‍तीन। रिम्‍शो पतीक कली दाक्‍तीन। ठेयब लाप्‍चोमी ठीक निसाफ पने। मिनु मुर नेल्‍ल आन परमप्रभु यावेमी योसेफ आ लीशो मुर आन कली शिशी पाइ‍बा कों?” दे परमप्रभु यावेमी देंत। भजन संग्रह ३४:१५; रोमी १२:९

आमोस 5:24

तन्‍न ठीक निसाफ पतीक ब्‍वाक्‍क खोदेंशो पा शाइक्‍पतीन। ठीक पतीक गेनायो मसोव़ब खोला खोदेंशो पा शाइक्‍पतीन।

मीका 2:9

गेपुकीम आं मुर आन मीश आन कली आन दारशो खिं रे ग्रुंइनीनी। मेको आन आलपुकी रे आं गेशो आसीक गेना हना यो कली रोइश्‍शा लाइक्‍नीनी।

मीका 6:10

गो मेको आ अरेशो मटीब आ खिं ङा मरिम्‍शो पा चेम्‍शो शोंप प्रेंदु? इन आइक्‍च सेल्‍शो सराप रशो पुक्‍तीक प्रेंदु? लेवी १९:३५

जकरिया 7:9

मिनु मुर नेल्‍ल आन परमप्रभु यावेमी मार लोव़ पाप्‍तु देंशा हना “ठीक पा निसाफ पने, दाक्‍मुने नु शिशी पमुने, मीका ६:८

जकरिया 8:16

गेपुकीमी मार पचा माल्‍नीनी देंशा हना, गे इन दातेमी थमा लोव़ ला पमुने। इन ठेयब लाप्‍चोमी जिचा मबोक्‍चा ङा पा थमा नु ठीक निसाफ पने। एफिसी ४:२५

लूका 3:14

का निक्‍शी सिपाइपुकी यो जाक्‍शा “मिनु गो मार पक?” दे हिल्‍लो पामे बाक्‍त। मिनु मेको आन कली “सुइ आन कली हिंम हिंम पा जोल पा दोस गेशा आन मारेइ मारेइ मरोइक्‍तीन। इन गेय रे पा तशो क्‍येटम इन थुं नुशा बाक्‍कीन” दे माइक्‍मी बाक्‍त।

१ पत्रुस 4:3

ङोंइती परमप्रभु यावे कली मतुइक्‍थु मारेइ मारेइ पाइतीनी, मुल मेको गाप्‍त। थमा मसुइक्‍बपुकीमी मार पाइनीम देंशा हना, महिंब दुम्‍शा आन दला दाक्‍स पाइनीम। दुक्‍शा बाक्‍नीम, शुश जशा तूशा बाक्‍नीम नु ग्रांग्रा दिचा ङा मूर्ति पूजा पाइनीम। एफिसी २:२-३; तीतस ३:३