इजीकीएल 39:18 - Sunuwar Bible

¹⁸ गेपुकीम शुश सक्ति पाइश्‍शो मुर आन श्‍ये ब्‍वाइनीनी। मिनु रागी ङा पिप आन सासन पाइब, बाशान ङा सांड, पाठा, बोका नु ब्‍यफ आन हुश तूनीनी।

इजीकीएल 39:18 ပူးပေါင်းရင်းမြစ်များ

भजन संग्रह 22:12

ठेयब सांढेपुकीमी पुम्‍ताक्‍यीमी। बाशान रागी ङा हिंचा ङा सांढेपुकीमी यो पुम्‍ताक्‍यीमी।

भजन संग्रह 68:30

बुदी मीलु आन दातेम बाक्‍ब जन्‍तु खोदेंशो मुर आन कली हुइक्‍तीन। जात जात ङा बाछा आन दातेम बाक्‍ब ब्‍यफ खोदेंशो मुर आन हुल कली खेरीन। मेकोपुकी ब्रुमा नोले चांदी चाक्‍चा माल्‍नीम। लडाइ पचा दाक्‍ब जात जात ङा मुर आन कली ब्रपतीन।

यसैया 34:6

परमप्रभु यावे आ तरवार हुशेम ग्रुम्‍शो बाक्‍ब। बोंसो लुम्‍सीशो बाक्‍ब। मेको क्‍यारश भेडा आन हुश नु बोका आन चिच ङा बोंसो लुम्‍सीशो बाक्‍ब। मारदे हना बोज्रामी परमप्रभु यावेमी ठेयब चढ़ेतीक गेय पाइब। एदोम रागीमी शुश मुर आन कली साइक्‍ब। यसैया ६३:१

यसैया 34:7

ब्‍वाकी ङा ब्‍यफ मुरपुक नु गोल्‍नीम। बाछापुकी बोल्‍यो सांढे ब्‍यफपुक नु गोल्‍नीम। मेको आन रागी हुशेम जारशो बाक्‍ब। मेकेर ङा खप बोंसोम ब्रीशो बाक्‍ब।

येरमीया 46:5

गो मारदे मेको आन कली हिंशो तङमी? मेकोपुकी नोले शोंइसीशो बाक्‍नीम। मेको आन लडाइ पाइबपुकी आन थुं लुक्‍च लत। मेकोपुकी रीब पा प्रोक्‍तेक्‍म। मेकोपुकीमी नोले लेश्‍शा मकोव़नीम। तेइ तेइ हिंतीकेइ हिंतीके बाक्‍ब” दे परमप्रभु यावेम देंत। येरमीया २०:३

येरमीया 50:11

परमप्रभु यावेम “गे ग्‍येरसीनीनी। शुश ग्‍येरसीने। गे आं शोंप रोइक्‍ब बाक्‍नीनी। दांइ पाइब मगिक्‍शो बी खोदेंशो पा प्रेनीनी। गे शारा खोदेंशो पा ग्रीनीनी।

येरमीया 50:27

मेको आ सांढे ब्‍यफ नेल्‍ल सतीन। मेको आन कली क्‍योरचा कली लतीन। आबी, आबी, मेको आन नाक्‍ती जाक्‍त। मेको आन कली सजाइ गेतीक नाक्‍ती जाक्‍त।

येरमीया 51:40

मिनु परमप्रभु यावेमी “गो मेको आन कली क्‍योरचा कली कीशा लाइश्‍शो पाठा, सांड नु क्‍यारश खोदेंशो पा चाक्‍नुङमी।

इजीकीएल 29:5

मिनु गो इ कली नु इ खोला ङा ङांइ नेल्‍ल आन कली गोरशो रागीम ताइक्‍नन्‍नी। मिनु गे दिंमम गोल्‍नेवे। इन कली सुइम खुप्‍शा मथिम्‍नीम। गो इ कली रागी ङा जन्‍तु नु सरीङ ङा चिक्‍ब आन कली ब्‍वचा कली गेनुङ।

इजीकीएल 34:17

मिनु परमप्रभु, परमप्रभु यावेमी “ए गे आं क्‍यारश भेडा, गो भेडा नु भेडा आन दातेमी निसाफ पाइनुङ। गो सांड नु क्‍यारश आन दातेम निसाफ पाइनुङ। मत्ती २५:३२

इजीकीएल 34:8

परमप्रभु, परमप्रभु यावेमी “गो आं ब्रोंइशा बाक्‍शो खोदेंशो पा, आं भेडा सिखार दुम्‍तेक्‍म। गोठला मबाक्‍तीके ब्‍वाकी ङा जन्‍तु आन जचा थोव़क दुम्‍तेक्‍म। मिनु आं गोठलापुकीम आं भेडा आन कली ममलेम। तन्‍न आंम कली ला कोव़साक्‍म। आं भेडा आन कली चहिं मकोव़ङेम।

इजीकीएल 39:19

गो इन कली चढ़ेतीक भोज का गेङानु, गे रूथ्री बोंसो ब्‍वने चाप्‍नीनी। गे मदुक्‍नी सम्‍म हुश तूने चाप्‍नीनी।

आमोस 4:1

सामरीया ङा डांडाम बाक्‍ब, बाशान ङा बी खोदेंशो दोम्‍शो मीश मुर, गे प्रुङग आन कली दिप्‍नीनी। मारेइ मथीब आन कली फस पोक्‍नीनी। मिनु इन वोंइश आन कली “आंइ कली तूचा कली मार मार चाक्‍कीन” देंनीनी।

ब्‍यवस्‍था 32:14

मिनु बी आन दूध के दहि, भेडा आन दूध नु पाठा नु सांड आन बोंसो ब्‍वचा गेप्‍तु। बाशान ङा ब्‍यफ नु क्‍यारश आन श्‍ये ब्‍वचा गेप्‍तु। नेल्‍ल क्‍येङा रिम्‍शो चेरब फस जशा, अङगुर शांबु तूशा बाक्‍ते।

प्रकाश 19:21

मिनु लीशो मेको आस फौजपुकी चहिं मेको बुश शारा ङोइक्‍ब आ शोव़ रे ग्रूशो तरवारमी साइक्‍चा पुंइसाक्‍म। मिनु चिक्‍बपुकी मेको नेल्‍ल आन श्‍ये ब्‍वशा रूतेक्‍म।