इजीकीएल 38:13 - Sunuwar Bible

¹³ शेबा नु देदान, टारशीश ङा ग्‍याप्‍ब लेयबपुकी नु मेको आन ठिटा लडाइ पाइब नेल्‍लेम इ कली ‘मार, गे रोइक्‍थ जाक्‍शो नवे? मार गे रोइश्‍शो मार मार तचा कली, सुन चांदी लाइक्‍चा कली, बी ब्‍यफ, क्‍यारश भेडा नु शुश मार मार रोइक्‍चा कली, जाक्‍नी?’ ” देंशो बाक्‍नीम।

इजीकीएल 38:13 ပူးပေါင်းရင်းမြစ်များ

भजन संग्रह 57:4

गो गुप्‍स आन दातेमी बाक्‍शो बाक्‍नुङ। गो मुर ब्‍वाइब जन्‍तु आन दातेमी गोल्‍शो बाक्‍नुङ। मेको मुर आन ख्रुइ तूतीक नु ब्रा खोदेंशो बाक्‍नीम। मेको आन लें हेश्‍शो तरवार खोदेंशो बाक्‍ब।

यसैया 10:6

गो अस्‍सुर कली आं कली मटीब रागी कली लडाइ पथ सोइक्‍नुङ। अस्‍सुर कली आं कली गाइक्‍पाइक्‍ब मुर नु सोइक्‍नुङ। मारेइ मारेइ रोइक्‍पाइक्‍चा कली सोइक्‍नुङ। मिनु मेको आन कली लांम दिम्‍पाइक्‍चा कली सोइक्‍नुङ।

यसैया 33:23

गे इन जहाज ङा डोरी शुंइसीशो बाक्‍नीम। मुरपुकीम मेको डोंगा आ दातेम बाक्‍शो थाम बोल्‍यो पा राप्‍पाइश्‍शा सेल्‍ने मचबेम। मेकोपुकीम मेको आ वा क्‍युक्‍ने मचबेम। मेना रोइश्‍शो मार मार शुश योक्‍सीनीम। खोइल मदुक्‍बपुकीम यो रोइश्‍शो मार मार रे आन भाग ताक्‍नीम।

येरमीया 15:13

इन पापम पतीके इन रागी नेल्‍लेम इन शोंप नु इन मारेइ मारेइ गो मोशान रोइश्‍शो मार मार खोदेंशो पा योक्‍शा गेनुङमी। येरमीया १७:३

येरमीया 50:17

इस्राएल गुप्‍सपुकीम खेदा पा एर ओंथ ब्रपाइश्‍शो भेडा खोदेंशो दुम्‍शो बाक्‍ब। मेको कली ङोंइती अस्‍सुर ङा पिपम दाक्‍तु। मिनु नेल्‍ल क्‍येङा नोले बेबीलोन ङा पिप नेबुकदरेसरमी मेको आ रुश नेल्‍ल नेक्‍तु” देंत।

येरमीया 51:38

मेकेर ङा मुर नेल्‍ल गुप्‍स खोदेंशो पा ग्रीनीम। मेकोपुकी गुप्‍स आन चाइक्‍ब खोदेंशो पा ङरर ङरर पाइनीम।

इजीकीएल 25:13

गो आं गुइ एदोम आ पर्बम क्‍युक्‍नुङ। मिनु मेकेर ङा मुर नु बी ब्‍यफ, क्‍यारश भेडा नेल्‍ल आन कली साइक्‍नुङमी। मिनु गो मेको कली मुर मबाक्‍तीके सेल्‍नुङ। मिनु तेमान रे देदान सम्‍म ङा मुर नेल्‍ल तरवारम साइक्‍चा पुंइसीनीम।

इजीकीएल 27:12

गे नु शुश शोंप नु शुश मार मार बाक्‍तीके टारशीश ङा मुरपुकीम गे नु ग्‍याप्‍तीक लेयतीक गेय पा चांदी, फलाम, टिन नु सिसा चाक्‍शा फाइक्‍तेक्‍म।

इजीकीएल 27:15

रोडोस ङा मुरपुकीम गे नु ग्‍याप्‍तीक लेयतीक गेय पाम्‍तेक्‍म। मिनु समुन्‍द्र आ नेक्‍था ङा शुश रागी इ मार मार ग्‍याप्‍ब लेयब दुम्‍तेक्‍म। मेकोपुकीम इ कली हात्ती आ दारा नु शुश क्‍येट लाइब क्‍येर शी चाक्‍शा इ मार मार नु फाइक्‍तेक्‍म।

इजीकीएल 27:20

देदान ङा मुरपुकीम शारा आ लगम कली जीन वा चाक्‍शा इ मार मार नु फाइक्‍तेक्‍म।

इजीकीएल 27:25

टारसीस ङा जहाजपुकीम इ ग्‍याप्‍तीक लेयतीक गेय पाम्‍‍तेक्‍म। गे हेल्‍शो ग्‍याप्‍तीक लेयतीक मार मारमी ब्रीशो समुन्‍द्रम बाक्‍ते।

इजीकीएल 32:2

मार लोव़ पाप्‍तु देंशा हना “ए मुर, इजीप्‍त ङा पिप फाराओ आ पर्बम रोंका पावो। मिनु मेको कली ‘गे रागी रागी ङा मुर आन दातेम गुप्‍स का खोदेंशो मिम्‍साक्‍वे। गे समुन्‍द्र ङा ठेयब जन्‍तु का खोदेंशो बाक्‍ते। गे खोला ङा ब्‍वाक्‍कुम एर ओंथ पवीनु ब्‍वाक्‍कु कली पोक्‍ना पोक्‍न नु खोइलीम ब्‍वाक्‍कु कली ख्राक्‍ना ख्राक्‍न गाक्‍बाक्‍ते। मिनु खोला कली ग्रांग्रा दिशो सेल्‍बाक्‍ते’ देनो” देंत। इजीकीएल २९:३

योएल 3:8

मुल गो इन तमी तौ आन कली यहूदा ङा मुर आन कली लेयनुङमी। मिनु मेकोपुकीमी मेको आन कली ङोन साबा रागी ङा मुर आन कली लेयनीम” दे परमप्रभु यावेमी देंशो बाक्‍ब।

जकरिया 11:3

गोठला आन रोंका पशो नेनीन। मेको आन रिम्‍शो योव़तीके खतम दुम्‍शो बाक्‍ब। गुप्‍स आन ग्री‍शो नेनीन। यर्दन ङा ब्‍वाकी नेल्‍ल खतम दुम्‍शो बाक्‍ब।