इजीकीएल 18:17 - Sunuwar Bible

¹⁷ मेको मरिम्‍शो पतीक रे ङोन बाक्‍ब, जेर गेशा आ चाइक्‍ब मताक्‍ब। मेकोम आं निसाफ पतीक लोव़ नेल्‍ल पाइब। मिनु आं फुल्‍लुम मुशा ब्रेक्‍शो लोव़ नेल्‍ल खाप्‍ब। मेको मुर आ आफ आ मरिम्‍शो पशो आ पर्बम बेक्‍चा ममाल्‍ब। मेको थमा पा ब्रोंइब।

इजीकीएल 18:17 ပူးပေါင်းရင်းမြစ်များ

मलाकी 3:7

इन किकी पिपी आन बाक्‍ची ना रे आं फुल्‍लुम मुशा ब्रेक्‍शो लोव़ मटिथु, हेंथे लां खोइक्‍तीनी। आं गे लेतीन। मिनु गो इन गे लेत्‍नुङ” दे मुर नेल्‍ल आन परमप्रभु यावेमी देंत। तन्‍न गेपुकीमी “गो दोपा लेत्‍चा?” देंतीनी। जकरिया १:३

दानीएल 4:27

हजुर पिप, मोपतीके आं गेशो अर्ती इन कली दुम्‍ल। इन पाप कली ठीक पतीकेमी क्‍याम्‍दीन। मिनु इन मरिम्‍शो पशो, श्‍येत जाइब आन कली शिशी पतीकेमी क्‍याम्‍दीन। मो पाइतीनी हना, इन रिम्‍शो बाक्‍तीक शुश नाक्‍त सम्‍म लीब” देंत। हितोपदेस १९:१७; मत्ती ५:७

इजीकीएल 33:13

गो मेको ठीक पाइब मुर कली ‘गे थमा पा ब्रोंइनेवे’ देंङानु, मेकोम आ ठीक पतीकेम थमा सुइश्‍शा, मरिम्‍शो पाप्‍तु हना, मेको आ ङोंइती ठीक पशो मारेइ ममिम्‍सीब। मेको आ मरिम्‍शो पशो आ पर्बम बेक्‍ब।

इजीकीएल 20:30

मोपतीके परमप्रभु, परमप्रभु यावेमी इस्राएल आ खिं ङा मुर आन कली “गे यो इन किकी पिपी आन खोदेंशो पा इन कली ग्रांग्रा दिशो सेल्‍सीनीनी? मिनु मेको आन ग्रांग्रा दिशो मूर्ति आन नोले खोइक्‍नीनी?

इजीकीएल 20:18

गो गोरशो रागीम मेको आन आल आन कली ‘गे इन आम आफ आन शेंशो फुल्‍लुम मुशा ब्रेक्‍शो लोव़ मटिने। मेको आन निसाफ पतीक मपने। मेको आन मूर्तिम आंम इन कली ग्रांग्रा दिशो मसेल्‍सीन।

इजीकीएल 18:28

मारदे हना मेकोम मिम्‍शा, आ पशो मरिम्‍शो नेल्‍ल रे लेत्‍त हना, मेको थमा पा ब्रोंइब। मेको बेक्‍चा ममाल्‍ब।

इजीकीएल 18:13

मेकोम आ चाइक्‍ब ताक्‍शा ला जेर गेब, मार मोदेंशो मुर ब्रोंइचा ताइ‍बा ङा? मेको ब्रोंइचा मताइब। मोदेंशो ग्रांग्रा दिशो गेय नेल्‍ल पतीके, मेको थमा पा बेक्‍चान माल्‍ब। मेको आ हुश आ दोस मेको आंमा राइब।

इजीकीएल 3:21

तन्‍न गे मेको ठीक पाइब मुर कली ‘पाप मपावो’ दे हिंच कोंइताक्‍वी हना नु मेकोमी पाप मपाप्‍तु हना, मेको थमा पा ब्रोंइब। मारदे हना मेकोम हिंच कोंइशो टिशो बाक्‍ब। मिनु गे ब्रोंइ‍नेवे” देंत।

येरमीया 22:16

मेकोमी प्रुङग नु मारेइ मथीब आन कली ठीक निसाफ पाप्‍तु। मिनु मेको कली रिम्‍शोन दुम्‍त। मेको आं कली तुइक्‍ब मुरुम पाइनीम” दे परमप्रभु यावेम देंत।

येरमीया 16:19

मिनु मेकोपुकीमी “परमप्रभु यावे, गे आं सक्ति नु आं ख्रुइश्‍शा, ब्रोंइशा बाक्‍तीक बाक्‍नीनी। गे श्‍येत जची ना आं ख्रुइक्‍तीके बाक्‍नीनी। रागी रागी ङा मुर रागी ङा सुर रे इन ङोंइती जाक्‍नीम। मिनु मेकोपुकीमी ‘आंइ किकी पिपी आन देवी देवता जोल ला बाक्‍तेक्‍म। मेको शोर गाक्‍शो बाक्‍तेक्‍म। भजन संग्रह ३६:७

हितोपदेस 29:14

प्रुङग आन कली ठीक पा निसाफ पाइब पिप आ सासन गेना हना यो लीब। हितोपदेस १६:१२

हितोपदेस 29:7

ठीक पाइब मुरुम प्रुङग आन कली दोपा ठीक पचा, दे तुइक्‍नीम। तन्‍न परमप्रभु यावे आ अरेशो मटीबपुकीमी मारेइ मरुप्‍‍नीम।

हितोपदेस 14:31

सुम प्रुङग आन कली दिप्‍बा, मेकोमी प्रुङग आन कली सेल्‍ब कली शुक्‍शी पाइब। तन्‍न सुमी प्रुङग आन कली शिशी पाइबा, मेकोमी परमप्रभु यावे कली मान पाइब। हितोपदेस १७:५; अय्‍युब ३१:१३-१५; मत्ती २५:४०

अय्‍युब 29:16

मारेइ मथीब आन कली आन आफ खोदेंशो दुम्‍ती। गो अर्को रागी ङा मुर आन कली आन मुददा कोव़शा गेतामी। अय्‍युब ३१:१८

लेवी 18:30

मोपतीके गे ङोंइती ङा मुरपुकीमी पशो खोदेंशो पा मेको दूली ग्रांग्रा दिशो पाप मपने। मिनु आंम कली ग्रांग्रा दिशो मसेलीन। मारदे हना गो परमप्रभु यावे, इन परमप्रभु नङ’ देनो” देंत।

लेवी 18:26

तन्‍न गे आं फुल्‍लुम मुशा ब्रेक्‍शो लोव़ नु आं पावो, दे अरेशो लोव़ टिने। मिनु गे इस्राएली नु इन दातेमी बाक्‍ब अर्को रागी ङा मुर मोदेंशो ग्रांग्रा दिशो गेय मपने।

लेवी 18:4

गेपुकीमी आं पावो, दे अरेशो लोव़ नु आं फुल्‍लुम मुशा ब्रेक्‍शो लोव़ पचा माल्‍नीनी। मारदे हना गो परमप्रभु यावे, इन परमप्रभु नङ।

लूका 19:8

मिनु जक्‍कैमी प्रभु कली खिंम ओंइशा “हे प्रभु, आं शोंप क्‍येट नेल्‍ल उइक्‍थ पा योक्‍शा, मथीब आन कली गेनुङमी। सु सु कली हिम हिम पा मार मार ताक्‍गु, मेको आन कली ४ खेयप तेम्‍शा लेश्‍शा गेनुङमी” देंमाक्‍त। प्रस्‍थान २१:३७; इजीकीएल ३३:१४-१६

रोमी 2:7

सुमी परमप्रभु यावे आ राज्‍य माल्‍शा, रिम्‍शो गेय पना पन बाक्‍नीमी नु गेना हना यो ब्रोंइचा माल्‍नीमी, मेको गेना हना यो परमप्रभु यावे नु बाक्‍चा ताइनीम।

भजन संग्रह 119:1

सु सु रिम्‍शो पाइनीमी नु दोस मताइब बाक्‍नीमी, मेको ग्‍येरसीशो मुर बाक्‍नीम। मारदे हना मेकोपुकीमी परमप्रभु यावे आ अरेशो टिशो बाक्‍नीम। भजन संग्रह ११२:१-२

इजीकीएल 18:18

तन्‍न मेको आ आफोम चहिं आ दला दाक्‍स पशा, आ लोक्‍ब आन कली रोइक्‍ताक्‍व। आ मुर आन दातेम मरिम्‍शो पाप्‍तु। मेको आ मरिम्‍शो पशो आ पर्बम बेक्‍ब।

भजन संग्रह 119:3

मेको मुरपुकी काइ मरिम्‍शो मपथु, परमप्रभु आ लांम गाक्‍नीम।