इजीकीएल 18:12 - Sunuwar Bible

¹² प्रुङग नु मारेइ मथीब आन कली दिप्‍ब, मुर आन मार मार रोइक्‍ब। जाकटी वोइश्‍शो थोव़क मलेप्‍ब, मूर्ति आन कली पूजा पाइब नु ग्रांग्रा दिशो गेय पाइब।

इजीकीएल 18:12 ပူးပေါင်းရင်းမြစ်များ

२ राजा 21:11

“यहूदा ङा पिप मनस्‍सेम एको ग्रांग्रा दिशो गेय पशो बाक्‍ब। मेकोम ङोंइती बाक्‍शो एमोरी आन क्‍येङा यो शुश ग्रांग्रा दिशो गेय पशो बाक्‍ब। मिनु मेकोमी यहूदा ङा मुर आन कली मूर्ति पूजामी पाप पपाइश्‍शो बाक्‍ब” देंमाक्‍त।

२ राजा 23:13

मिनु पिपमी यरूसलेम आ पूर्ब गे बाक्‍शो डांडा ङा थान ग्रांग्रा दिशो सेल्‍पदा बाक्‍त। मेको खतम सेल्‍ब डांडा आ दक्‍खिन गे बाक्‍माक्‍त। मिनु मेकेर पिप सोलोमनमी सीदोनी आन ग्रांग्रा दिशो अश्‍‍तोरेथ देवी आ मूर्ति, मोआब ङा ग्रांग्रा दिशो देवता केमोश आ मूर्ति नु अम्‍मोनी आन ग्रांग्रा दिशो देवता मोलेक आ मूर्ति आन थान सेल्‍पाइश्‍शो बाक्‍माक्‍त। मिनु योसीयाहमी मेको आ सेल्‍शो पूजा पतीक थान प्रेश्‍शा ग्रांग्रा दिशो सेल्‍पदा बाक्‍त।मेको मोलेक देवता कली मिल्‍कोम यो देंशो बाक्‍त। १राजा ११:७

यसैया 3:14

मिनु परमप्रभु यावेमी आ मुर आन दाते ङा खाल्‍पापुकी नु हुकुम पाइब आन कली निसाफ पाइब। मेकोमी “गे अङगुर रू नेल्‍ल आंम के सेल्‍तीनी। प्रुङग आन के रोइश्‍शो मार मार इन खिंम बाक्‍नीम। यसैया ५:७

येरमीया 22:17

तन्‍न इ मिक्‍च नु इ थुंम ठीक पा मचेम्‍शो क्‍येट ला बाक्‍ब। गे दोस मताइब आन हुश शाइक्‍पाइक्‍नेवे। गे मुर आन कली दिप्‍शा हुश ख्राक्‍श पोक्‍नेवे। मरिम्‍शो पचा नु रोइक्‍चा ला दाक्‍नेवे।

येरमीया 22:3

परमप्रभु यावेमी मार देंत देंशा हना “गे ठीक निसाफ पने। ठीक गेय पने। रोइक्‍चा पुंइसीशो आन कली मरिम्‍शो पाइब आन गुइ रे प्रोनीन। अर्को रागी ङा मुर, रोम रोइक्‍च नु आन वोंइश बेक्‍शो मीश मुर आन कली मरिम्‍शो मपने। मिनु एको रागीम मारेइ दोस मताइब आन हुश मशाइक्‍पतीन। येरमीया २१:१२

इजीकीएल 16:49

इ लोक्‍ब सोदोम आ दोस मार बाक्‍त देंशा हना, मेको नु आ तमीपुकी ठेयब लेश्‍शा, शुश जशा ब्‍वशा, शोंप पाइश्‍शो दुम्‍शा बाक्‍तेक्‍म। मेकोपुकीम प्रुङग नु मारेइ मथीब आन कली वारच मपदेम।

इजीकीएल 18:16

मेकोम सुइ आन कली मरिम्‍शो मपाइब, मेकोमी जाकटी मताक्‍ब। मेकोम सुइ के मारेइ मरोइक्‍ब। तन्‍न शोव़लु बेक्‍शो आन कली आ जचा थोव़क गेब। शिश्रा बाक्‍शो आन कली वा फेक्‍पाइक्‍ब।

इजीकीएल 33:25

मोपतीके गे मेको आन कली ‘परमप्रभु, परमप्रभु यावेमी इन कली गेपुकी हुश सुन्‍दा श्‍ये ब्‍वाइनीनी। गे इन मूर्ति पूजा पाइनीनी। गेपुकीम हुश ख्राक्‍श पोक्‍‍नीनी। मिनु मार, एको रागी इन के दुम्‍बा ङा? १सामुएल १४:३२-३४

इजीकीएल 7:23

साङलो का सेलीन। मारदे हना रागी हुश ख्राक्‍शेम ब्रीशो बाक्‍ब। मिनु सहर हुश ख्राक्‍श पोक्‍बपुकीम ब्रीशो बाक्‍ब।

इजीकीएल 8:17

मिनु मेकोम आं कली “ए मुर, गे मेको तवी? मार, यहूदा आ खिं ङा मुर आन ग्रांग्रा दिशो गेय एकेर पचा माल्‍नीमी? मार, मेकोपुकीम रागी कली हुश ख्राक्‍श पोक्‍तीकेम प्रिंशा, आं कली मेको क्‍येङा गाइक्‍पाइक्‍चा माल्‍नीमी? कोव़ङो, मेको आन नेंम राशी वोइक्‍नीम। आन नेंम राशी वोइक्‍तीके थम मरिम्‍शो पतीके बाक्‍ब।

इजीकीएल 8:6

मिनु मेकोमी आं कली “ए मुर, मेको आन पशो तवी? मार पन पन बाक्‍मा, गे मेको तवी? इस्राएली आन खिं ङा मुरपुकीम आं कली आं बाक्‍तीक रे खेरचा कली मेको ग्रांग्रा दिशो गेय पना पन बाक्‍नीम। तन्‍न गे मेको क्‍येङा यो शुश ग्रांग्रा दिशो गेय ताइनेवे” देंत।

होसे 12:7

मिनु जोल पा नाक्‍तीक चलेब ग्‍याप्‍ब लेयब मुरुमी जोल पचा दाक्‍नीम।

लेवी 18:22

मीश मुर नु इप्‍शो खोदेंशो पा वोंइश मुर नु मइपो। मेको थम ग्रांग्रा बाक्‍ब।

आमोस 4:1

सामरीया ङा डांडाम बाक्‍ब, बाशान ङा बी खोदेंशो दोम्‍शो मीश मुर, गे प्रुङग आन कली दिप्‍नीनी। मारेइ मथीब आन कली फस पोक्‍नीनी। मिनु इन वोंइश आन कली “आंइ कली तूचा कली मार मार चाक्‍कीन” देंनीनी।

जकरिया 7:10

वोंइश बेक्‍शो मीश मुर, रोम रोइक्‍च, अर्को रागी ङा मुर नु प्रुङग आन कली मदिपीन। मरिम्‍शो पमुचा ममिम्‍तीन। प्रस्‍थान २२:२०-२१

याकूब 2:6

गे चहिं प्रुङग आन कली दिप्‍नीनी। मेको शुश क्‍येट थीब मुरपुकी इन कली श्‍येत गेब मुर मनमी ङा? मेकोपुकीमी इन कली अडडाम मचाक्‍दीत्‍नीमी ङा?